បញ្ហាស្រូវធ្លាក់ថ្លៃ៖ កម្ពុជាស្នើឲ្យវៀតណាមជួយទិញស្រូវពីកម្ពុជាតាមតម្លៃទីផ្សារវៀតណាម
រដ្ឋមន្ដ្រីក្រសួងកសិកម្មកម្ពុជា បានស្នើទៅកាន់ភាគីវៀតណាម ឲ្យជួយទិញស្រូវអង្ករពីកម្ពុជា ខណៈកម្ពុជាកំពុងជួបប្រទះបញ្ហាស្រូវធ្លាក់ថ្លៃ និងចំពេលដែលកម្ពុជាត្រូវសហភាពអឺរ៉ុបតម្រូវឲ្យបង់ពន្ធលើការនាំចូលអង្ករទៅអឺរ៉ុប។ សំណើរបស់រដ្ឋមន្ដ្រីក្រសួងកសិកម្មកម្ពុជា លោក វេង សាខុន ដូច្នេះ ធ្វើឡើងនៅក្នុងកិច្ចប្រជុំជាមួយឯកអគ្គរដ្ឋទូតវៀតណាមប្រចាំកម្ពុជា នៅថ្ងៃទី៣០ ខែមករា ម្សិលមិញ។
ចុះផ្សាយនៅថ្ងៃ៖
ស្តាប់ - ០១:៥០
ខណៈតម្លៃស្រូវនៅកម្ពុជាកំពុងធ្លាក់ថ្លៃនៅក្រោម៧០០រៀលក្នុងមួយគីឡូក្រាម លោករដ្ឋមន្ដ្រីកសិកម្ម វេង សាខុន បានស្នើឲ្យប្រទេសវៀតណាម ជួយទិញស្រូវពីកម្ពុជាក្នុងតម្លៃត្រឹម៧០០រៀលឡើងទៅ។ ប្រសិនបើវៀតណាមអាចជួយកម្ពុជាក្នុងបញ្ហានេះបានពី២ទៅ៣សប្ដាហ៍ លោករដ្ឋមន្ដ្រីកសិកម្ម ជឿថា បញ្ហាស្រូវអង្ករកម្ពុជា នឹងអាចធូរស្បើយវិញជាក់ជាពុំខាន។
ជាការឆ្លើយតប លោក Vu Quang Minh ឯកអគ្គរដ្ឋទូតវៀតណាមប្រចាំនៅកម្ពុជា បានអះអាងថា វៀតណាមនឹងរៀបចំកិច្ចប្រជុំបន្ទាន់មួយជាមួយពាណិជ្ជករវៀតណាម មុនពេលធ្វើរបាយការណ៍លម្អិតជូននាយករដ្ឋមន្ដ្រីវៀតណាម ដើម្បីជំរុញឲ្យពាណិជ្ជករវៀតណាម ជួយប្រមូលទិញស្រូវពីកម្ពុជាក្នុងតម្លៃសមរម្យ។ ទន្ទឹមគ្នានេះ វៀតណាម នឹងជំរុញឲ្យមានការចុះអនុស្សរណៈនៃការយោគយល់គ្នា ស្ដីពីការធ្វើពាណិជ្ជកម្មរវាងកម្ពុជានិងវៀតណាម ជាពិសេសលើផលិតផលស្រូវអង្ករ និងថ្នាំជក់ ដោយអត្រាពន្ធសូន្យ ក្នុងរយៈពេលដ៏ខ្លីខាងមុខ ខណៈទូរទស្សន៍វៀតណាមនឹងចុះទៅកន្លែងប្រមូលផលស្រូវ ដើម្បីផ្សព្វផ្សាយដល់ពាណិជ្ជករវៀតណាម ឲ្យជួយទិញស្រូវពីកម្ពុជាក្នុងតម្លៃសមរម្យ។
គួរជម្រាបជូនថា តម្លៃស្រូវនៅកម្ពុជាតាមបណ្ដាខេត្តមួយចំនួនបានធ្លាក់ចុះក្រោម៧០០រៀលក្នុងមួយគីឡូក្រាម ក្រោយពេលអឺរ៉ុបប្រកាសពីការយកពន្ធអង្ករកម្ពុជាដែលនាំទៅកាន់ទីផ្សារអឺរ៉ុប។ ភ្លាមៗក្រោយការប្រកាសរបស់សហភាពអឺរ៉ុប ប្រទេសចិនបានសន្យាទិញអង្ករកម្ពុជាចំនួន៤០ម៉ឺនតោនក្នុងឆ្នាំ២០១៩នេះ។ តំណាងកសិករកម្ពុជា បានទទូចឲ្យរដ្ឋាភិបាលកម្ពុជាចរចាជាមួយចិន ដើម្បីពន្លឿនការទិញអង្ករពីកម្ពុជា ខណៈតម្លៃស្រូវនៅកម្ពុជាកំពុងធ្លាក់ចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ