កម្ពុជាថ្កោលទោសចំពោះក្រុមហ៊ុនបរទេសដែលយករូបភាពទង់ជាតិនិងប្រាសាទ ទៅរចនាជាសម្ភារៈប្រើប្រាស់ក្នុងបន្ទប់ទឹក និងផ្ទះបាយ
កម្ពុជាបានប្រតិកម្មខ្លាំងៗទៅកាន់បណ្ដាលក្រុមហ៊ុនបរទេសដែលយកទង់ជាតិនិងរូបភាពប្រាសាទខ្មែរ ដែលបានចុះបញ្ជីជាសម្បតិ្តបេតិកភណ្ឌពិភពលោករួចហើយនោះ រចនាជាសម្ភារៈប្រើប្រាស់ក្នុងបន្ទប់ទឹកនិងផ្ទះបាយ។ ជុំវិញបញ្ហាគួរឲ្យសោកស្តាយនេះ ស្ថានទូតខ្មែរប្រចាំសហរដ្ឋអាមេរិក បានសេចក្ដីប្រកាសព័ត៌មានមួយ ធ្វើការស្តីបន្ទោសទៅលើក្រុមហ៊ុនអាមេរិកឈ្មោះAmazon ដែលកំពុងតែលក់ទំនិញទាំងនេះនៅលើគេហទំព័ររបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
«តក់ស្លុតនិងស្រងាកចិត្ត»ជាសាររបស់ឯកអគ្គរដ្ឋទូតខ្មែរប្រចាំនៅសហរដ្ឋអាមេរិកផ្ញើទៅកាន់អគ្គនាយកក្រុមហ៊ុនAmazon។ Amazon ជាក្រុមហ៊ុនមួយដែលផ្គត់ផ្គង់ទំនិញតាមអនឡាញបានយករូបភាពប្រាសាទអង្គរវត្តដោយរួមមាន ប្រាសាទតាព្រហ្ម ប្រាសាទបាយ័ននិងប្រាសាទបឹងមាលា រចនាជាគម្របបង្គន់ កំរាលបន្ទប់ទឹក កំរាលជើងមុខបង្គន់ វាំងននងូតទឹក និងកំរាលផ្ទះបាយ។
ទង្វើនេះត្រូវបានកម្ពុជាចាត់ទុកថា ប៉ះពាល់យ៉ាងធ្ងន់ធ្ងរដល់កិត្តយសរបស់ខ្លួន និងជារឿងស្អប់ខ្ពើម។ ស្អប់ខ្ពើមព្រោះក្រៅពីប្រាសាទគេឃើញការប្រើប្រាស់រូបភាពទង់ជាតិខ្មែររចនាជាកម្រាលបន្ទប់ទឹកទៀតផង។ ជំហ៊ានដំបូងកម្ពុជា ថ្កោលទោសនិងទាមទារក្រុមហ៊ុនAmazonបញ្ឈប់ជាបន្ទាន់នូវការលក់របស់ខ្លួន ដោយដកចេញពីគេហទំព័រនូវផលិតផលទាំងនេះ។
សូមជម្រាបថា ប្រតិកម្មរបស់ស្ថានទូតខ្មែរប្រចាំនៅសហរដ្ឋអាមេរិក ធ្វើឡើងទន្ទឹមនឹងប្រជាជនកម្ពុជានៅក្នុងស្រុកផ្ទុះប្រតិកម្មជាបន្តបន្ទាប់តាមបណ្ដាញសង្គមចំពោះករណីនេះ។ មុនមានអន្តរាគមន៍របស់ស្ថានទូតខ្មែរនៅសហរដ្ឋអាមេរិក រដ្ឋមន្ត្រីក្រសួងវប្បធម៌ និងវិចិត្រសិល្បៈនិងអាជ្ញាធរជាតិអប្សរា ក៏បានផ្ញើលិខិតមួយច្បាប់ទៅក្រុមហ៊ុនAmazonដែរ ដើម្បីសុំឲ្យក្រុមហ៊ុនគិតគូរឡើងវិញដកការរចនារូប ដែលទាញចេញប្រាសាទអង្គរវត្ត ក៏ដូចជាប្រាសាទនានាមកបង្ហាញលើ Online Shopping របស់ខ្លួន។ ក្នុងនោះក្រសួងវប្បធម៌ ក៏បានផ្ញើលិខិតទៅកាន់ក្រសួងប្រៃសណីយ៍កម្ពុជា ជួយទប់ស្កាត់ការចែកចាយរូបភាពទាំងនេះលើអ៊ិនធើណេតដែរ។
ជាការកត់សម្គាល់ នេះមិនមែនជាលើកដំបូងឡើយ ដែលរូបភាពតំណាងឲ្យសម្បត្តិវប្បធម៌កម្ពុជា ត្រូវបានគេយកប្រើប្រាស់ក្នុងរូបភាពប្រហាក់ប្រហែលនេះ។ លោក ឈត ប៊ុនថង មន្ដ្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជាថ្លែងថា កម្ពុជាគួរមានវិធានការទុកជាមុន ប្រសើរជាងបញ្ហាកើតឡើងហើយនាំគ្នាប្រតិកម្ម។ ជាវិធានការដែលមានចែងក្នុងច្បាប់ដើម្បីឈានដល់ការដាក់ទោសចំពោះអ្នកប្រព្រឹត្ត។ ការមើលឃើញដោយឡែក លោក ឈត ប៊ុនថង ថា កម្ពុជាខ្លួនឯងក៏មានការថ្លោះធ្លោយដែរ ដែលដាក់រូបប្រាសាទអង្គរវត្ត ឬប្រាសាទព្រះវិហារលើកំប៉ុងស្រាបៀរ។ រូបភាពអាចជាលេសមួយដែលក្រុមហ៊ុនបរទេសមើលគំរូតាម។ នេះបើតាមលោក ឈត ប៊ុនថង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ