ខៀវ សំផន អតីតប្រមុខរដ្ឋ របបកម្ពុជាប្រជាធិបតេយ្យ ប្រើសេរីភាពចុងក្រោយក្នុងពន្ធនាគារ
ខៀវ សំផន គឺជា អតីតប្រមុខរដ្ឋនៃរបបកម្ពុជាប្រជាធិបតេយ្យ ដែលត្រូវបាន តុលាការកូនកាត់ខ្មែរក្រហម ចាប់ឃុំខ្លួន នៅថ្ងៃទី១៩ ខែវិច្ឆិកា ឆ្នាំ២០០៧ ហើយសម្រេចទោស ដាក់ពន្ធនាគារអស់មួយជីវិត បន្ទាប់ពី ការដួលរលំនៃរបបខ្មែរក្រហមជាង ៣ទសវត្ស។ តើ ខៀវ សំផន មានប្រវត្តិយ៉ាងណា ?
ចុះផ្សាយនៅថ្ងៃ៖
ស្តាប់ - ០៣:៣៩
ខៀវ សំផន កើតនៅថ្ងៃទី២៧ ខែកក្កដា ឆ្នាំ១៩៣១ នៅស្រុករំដួល ខេត្តស្វាយរៀង។ គាត់ជា កូនច្បង ក្នុងគ្រួសារមួយ ដែលមានបងប្អូនប្រុសស្រី ប្រាំនាក់ និងមានឳពុកជា ចៅក្រម។ កុមារភាពរបស់ ខៀវ សំផន គឺជា សិស្សដែលមាន បញ្ញាវ័យឆ្លាត មានមហិច្ឆតាខ្ពស់ និងជាមនុស្សចូលចិត្តនៅដាច់ឆ្ងាយពីគេឯង។
ខៀវ សំផន បានចូលរៀន នៅវិទ្យាល័យព្រះស៊ីសុវត្ថិ ទីក្រុងភ្នំពេញ មុនពេល ទទួលបាន អាហារូបករណ៍ ទៅសិក្សា បរិញ្ញាប័ត្រផ្នែកវិទ្យាសាស្ត្រសេដ្ឋកិច្ច នៅប្រទេសបារាំង ក្នុងឆ្នាំ១៩៥៣។ ទីនោះហើយ ដែលគាត់ ក្លាយជា អគ្គលេខាធិការ នៃក្រុមបញ្ញាជននិស្សិតកុម្មុយនីសខ្មែរនិយមឆ្វេង មុនពេល បញ្ចប់ថ្នាក់បណ្ឌិតសេដ្ឋកិច្ច នៅប្រទេសបារាំង ក្នុងឆ្នាំ១៩៥៨។
ក្នុងឆ្នាំ១៩៥៩ ក្រៅពី ធ្វើជា សាស្ត្រាចារ្យ នៅ មហាវិទ្យាល័យច្បាប់ នាក្រុងភ្នំពេញ ខៀវ សំផន បានបង្កើត កាសែតនិយមឆ្វេងមួយ សរសេរជាភាសាបារាំង ឈ្មោះថា "L’Observateur"។ កាសែតនេះ ត្រូវបានបិទ នៅឆ្នាំ១៩៦០ ដោយសាររិះគន់រដ្ឋាភិបាល សម្តេច នរោត្តម សីហនុ ហើយ ប៉ូលីសចាប់ វាយគាត់ សម្រាតខោអាវ នៅលើដងផ្លូវសាធារណៈ ក្នុងទីក្រុងភ្នំពេញ និង ដាក់គុករយៈពេល មួយខែ ដោយគ្មានការជំនុំជម្រះឡើយ។
ខៀវ សំផន ធ្លាប់បានជាប់ឆ្នោតជា តំណាងរាស្ត្រមណ្ឌលកណ្ដាល បានពីរអាណត្តិ គឺក្នុងឆ្នាំ១៩៦២ និង១៩៦៦។ ខៀវ សំផន ក៏ធ្លាប់បានរត់ទៅលាក់ខ្លួននៅក្នុងព្រៃ នៅឆ្នាំ១៩៦៧ ហើយលេចមុខជាថ្មីជាមួយ ចលនាតស៊ូរបស់់ខ្មែរក្រហម ក្រោយការចោទប្រកាន់ពីសំណាក់សម្តេច នរោត្តម សីហនុ ទាក់ទងនឹងអំពើបះបោរនៅសំឡូត។
ក្រោយព្រឹត្តិការណ៍រដ្ឋប្រហារ ឆ្នាំ១៩៧០ រណសិរ្សរួបរួមជាតិកម្ពុជា ត្រូវបានបង្កើតឡើង ដែលមានសម្តេច នរោត្តម សីហនុ ជាប្រធាន ខៀវ សំផន ជា អនុប្រធានរណសិរ្ស។ បន្ទាប់មក រាជរដ្ឋាភិបាលរួបរួមជាតិកម្ពុជា ត្រូវបានបង្កើតឡើងនៅប៉េកាំង នៅថ្ងៃទី៥ ខែឧសភា ឆ្នាំ១៩៧០ ខៀវ សំផន ត្រូវបានតែងតាំងជា ឧបនាយករដ្ឋមន្ត្រី និងជា រដ្ឋមន្ត្រីក្រសួងការពារជាតិ។ ខៀវ សំផន បន្តកាន់តំណែងនេះ រហូតដល់ខែមេសា ឆ្នាំ១៩៧៥ ទើបផ្លាស់ទៅធ្វើជា អគ្គបញ្ជាការកងទ័ពជាតិ និង ឧបនាយករដ្ឋមន្ត្រី ដដែល។ នៅខែមេសា ឆ្នាំ១៩៧៦ ក្រោយពីខ្មែរក្រហមបានឡើងកាន់អំណាច ខៀវ សំផន ត្រូវបាន តែងតាំងឲ្យធ្វើជា ប្រមុខរដ្ឋ នៃកម្ពុជាប្រជាធិបតេយ្យ ជំនួសសម្តេច នរោត្តម សីហនុ ដែលបាន សុំលាឈប់ពីតំណែង។
លុះ របបកម្ពុជាប្រជាធិបតេយ្យត្រូវបានដួលរលំ នៅឆ្នាំ១៩៧៩ ខៀវ សំផន បានឡើងមកកាន់តំណែងជា នាយករដ្ឋមន្ត្រីនៃកម្ពុជាប្រជាធិបតេយ្យជំនួស ប៉ុល ពត។ ហើយអំឡុងឆ្នាំ១៩៧៩ ដល់ឆ្នាំ១៩៩២ លោក ខៀវ សំផន នៅតែជា តំណាងជាន់ខ្ពស់ របស់ភាគីខ្មែរក្រហម ក្នុងរដ្ឋាភិបាលត្រីភាគី ហើយនៅ ឆ្នាំ១៩៨៩ គាត់បានធ្វើជា តំណាងកម្ពុជា ក្នុងសន្និសីទអន្តរជាតិ ស្តីពីកម្ពុជានៅ ទីក្រុងប៉ារីស។
បន្ទាប់ពីចុះចូលជាមួយ រដ្ឋាភិបាលកម្ពុជា ក្នុងឆ្នាំ១៩៩៨ គាត់ បានចាកចេញពីចលនា ខ្មែរក្រហម និងបន្តរស់នៅក្នុងខេត្តប៉ៃលិន រហូតដល់ពេលត្រូវបានចាប់ឃុំខ្លួន ដោយ អង្គជំនុំជម្រះវិសាមញ្ញាក្នុងតុលាការកម្ពុជា នៅថ្ងៃទី១៩ ខែវិច្ឆិកា ឆ្នាំ២០០៧ និងចោទប្រកាន់ពី បទឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម។ អង្គជំនុំជម្រះសាលាដំបូង បានបើកសវនាការបឋមនៅខែមិថុនា ឆ្នាំ ២០១១ ហើយនៅទីបំផុត អង្គជំនុំជម្រះសាលាកំពូល នៃ តុលាការខ្មែរកូនកាត់ក្រហម បានសម្រេចលើកចុងក្រោយ នៅថ្ងៃទី២៣ ខែវិច្ឆិកា ឆ្នាំ២០១៦ កំណត់ទោស ខៀវ សំផន ដាក់ពន្ធនាគារអស់មួយជីវិត បើទោះបីជា គាត់ តែងតែប្រកាសជារឿយៗថា គាត់មិនមានអំណាចអ្វីឡើយ នៅក្នុងជួរថ្នាក់ដឹកនាំរបស់ខ្មែរក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ