គិតត្រឹមថ្ងៃនេះ លោកកឹម សុខា ត្រូវបានឃុំខ្លួនក្នុងពន្ធនាគាររយៈពេលពេញ១ឆ្នាំហើយ
ថ្ងៃទី០៣ កញ្ញា ឆ្នាំ២០១៧-ថ្ងៃទី០៣ កញ្ញា ឆ្នាំ២០១៨ គឺរយៈពេលពេញមួយឆ្នាំគត់ដែលលោកកឹម សុខា ប្រធានអតីតគណបក្សសង្រ្គោះជាតិត្រូវបានតុលាការក្រុងភ្នំពេញឃុំខ្លួននៅក្នុងពន្ធនាគារត្រពាំងផ្លុង នាខេត្តត្បូងឃ្មុំ។ ឆ្លៀតឱកាសនេះ វណ្ណ សុគន្ធា សូមរំឮកជូនប្រិយមិត្តអ្នកស្តាប់ឡើងវិញអំពីហេតុដើមនៃការចាប់និងឃុំខ្លួនលោកកឹម សុខានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
នៅម៉ោងប្រមាណជាង១២ រំលងអធ្រាតឈានចូលថ្ងៃទី០៣ ខែកញ្ញា ឆ្នាំ២០១៧ អាជ្ញាធរកម្ពុជាជាច្រើននាក់បានឆ្មក់ចូលផ្ទះលោកកឹម សុខានៅទួលគោក ដើម្បីចាប់ខ្លួនលោកកឹម សុខា និងក្រុមអង្គរក្សរបស់លោកចំនួន៨នាក់ទៀត។ ការចាប់ខ្លួននេះ បានធ្វើឡើងតែប៉ុន្មានម៉ោងប៉ុណ្ណោះ ក្រោយពីមានការបង្ហោះនូវវីដេអូឃ្លីបមួយនៅតាមសារព័ត៌មានហ្វ្រេសញូវ។ ជាវីឌីអូឃ្លីបដែលលោក កឹម សុខា បានថ្លែងនៅក្នុងប្រទេសអូស្ត្រាលី តាំងពីខែធ្នូ ឆ្នាំ២០១៣ អំពីការតស៊ូរបស់លោកក្នុងការប្រឆាំងនឹងរបបដឹកនាំរបស់លោកនាយករដ្ឋមន្ត្រី ហ៊ុន សែន។ លោកកឹម សុខា ក៏បានលើកឡើងដែរថា លោកត្រូវបានណែនាំពីសាស្រ្តាចារ្យបរទេសក្នុងការធ្វើកិច្ចការនេះ ហើយគេឲ្យលោកយកម៉ូឌែលតាមនៅប្រទេសយូហ្គោស្លាវី និង នៅស៊ែបី។
គឺចំណុចនេះហើយ ដែលអាជ្ញាធរកម្ពុជាបានយកធ្វើជាភស្តុតាងចោទលោកកឹម សុខា ពីបទក្បត់ជាតិឈានដល់ការចាប់ខ្លួនទាំងយប់នេះ។ ក្រោយការចាប់ខ្លួន លោកកឹម សុខា ត្រូវអាជ្ញាធរបញ្ជូនទៅឃុំខ្លួននៅក្នុងពន្ធនាគារត្រពាំងផ្លុង ក្នុងខេត្តត្បូងឃ្មុំ។ ចំណែកក្រុមអង្គរក្សរបស់លោក ត្រូវបានអាជ្ញាធរដោះលែងឲ្យមានសេរីភាពឡើងវិញ។
ក្រុមមេធាវីលោកកឹម សុខា បានហៅការចាប់ខ្លួន និងឃុំខ្លួនលោកកឹម សុខានេះ ថាជាការអនុវត្តខុសនឹងច្បាប់ ហើយភ្លាមៗនោះ ពួកគេបានប្តឹងទៅតុលាការប្រឆាំងនឹងដីកាឃុំខ្លួនលោកកឹម សុខា។ ប៉ុន្តែតុលាការទាំងគ្រប់ជាន់ថ្នាក់បានទាត់ចោលបណ្តឹងប្រឆាំងដីកានេះ។ ក្រោយមក ក្រុមមេធាវីក៏បានដាក់ពាក្យបណ្តឹងជាបន្តបន្ទាប់ ដើម្បីស្នើសុំឲ្យតុលាការដោះលែងលោកកឹម សុខា នៅក្រៅឃុំបណ្តោះអាសន្ន។ ប៉ុន្តែតុលាការទាំងសាលាឧទ្ធរណ៏ និងតុលាការកំពូលសុទ្ធតែច្រានចោលទាំងអស់។
តាំងពីត្រូវបានឃុំខ្លួនមក លោកកឹម សុខា បានបង្ហាញមុខជាសាធារណៈតែម្តងគត់ កាលពីអំឡុងដើមខែកុម្ភៈ ឆ្នាំ២០១៨ ដែលនៅពេលនោះ លោកត្រូវបានបញ្ជូនមកចូលរួមសវនាការសាលាឧទ្ធរណ៍នៅក្នុងរាជធានីភ្នំពេញ។ លោកមានសភាពស្គមស្គាំងជាងមុន ហើយមានជំងឺប្រចាំកាយពីរ បីប្រភេទផង។ តែទោះបីជាបែបនេះក្តី តុលាការនៅតែមិនព្រមដោះលែងលោកឲ្យនៅក្រៅឃុំបណ្តោះអាសន្នដដែល។
គិតមកត្រឹមថ្ងៃទី០៣ កញ្ញានេះ លោកកឹម សុខា ត្រូវបានឃុំខ្លួននៅក្នុងពន្ធនាគារត្រពាំងផ្លុង ក្នុងខេត្តត្បូងឃ្មុំរយៈពេលពេញមួយឆ្នាំហើយ។ លោកត្រូវបានតុលាការពន្យារការឃុំខ្លួនចំនួនពីរដង ដោយម្តងនៅពេលលោកជាប់ឃុំផុតកំណត់ច្បាប់៦ខែ និងម្តងទៀត គឺកាលពីសប្តាហ៍មុននេះ លោកត្រូវបានតុលាការពន្យារការឃុំខ្លួនរយៈពេល៦ខែទៀត។ លោកកឹម សុខា ត្រូវបានបន្តឃុំខ្លួន ដើម្បីធ្វើការស៊ើបអង្កេតពីបទ“សន្និដ្ឋិភាពជាមួយបរទេស”។ ប្រសិនបើតុលាការរកឃើញកំហុសមែននោះ លោកកឹម សុខា អាចនឹងប្រឈមជាប់ទោសបទល្មើសនេះ ត្រូវជាប់ពន្ធនាគារពី ១៥ ដល់ ៣០ ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ