ខួប២ឆ្នាំនៃការបាញ់សម្លាប់លោក កែម ឡី៖ អង្គការអន្តរជាតិពីរ ទាមទារឲ្យរដ្ឋាភិបាលកម្ពុជាបន្តការស៊ើបអង្កេត
អង្គការអន្តរជាតិធំៗចំនួនពីរ បានទាមទារឲ្យអាជ្ញាធរកម្ពុជាបន្តបើកការស៊ើបអង្កេតករណីឃាតកម្មបាញ់សម្លាប់លោក កែម ឡី អ្នកវិភាគនយោបាយមិនសំចៃមាត់នៅកម្ពុជា។ ការទាមទារនេះ បានធ្វើឡើងចំពេល ខួបពីរឆ្នាំគត់ នៃឃាតកម្មបាញ់សម្លាប់អ្នកវិភាគល្បីឈ្មោះ នៅកណ្តាលទីក្រុងភ្នំពេញ កាលពីថ្ងៃទី ១០ កក្កដា ឆ្នាំ២០១៦ ។ ប៉ុន្តែ អ្នកនាំពាក្យគណបក្សប្រជាជនកម្ពុជា បានចាត់ទុកការទាមទាររបស់គណៈកម្មការអ្នកច្បាប់អន្តរជាតិនេះថា គឺជាការជ្រៀតជ្រែក និងរំលោភលើឯករាជ្យភាព និងសមត្ថកិច្ចនៃតុលាការកម្ពុជា ដែលមិនអាចទទួលយកបានឡើយ។
ចុះផ្សាយនៅថ្ងៃ៖
ស្តាប់ - ០២:៣៥
អង្គការអន្តរជាតិធំៗទាំងពីរនោះ រួមមាន គណៈកម្មការអ្នកច្បាប់អន្តរជាតិ ហៅកាត់ថា ICJ និងអង្គការសិទ្ធិមនុស្សអន្តរជាតិ Human Right Watch។ នៅក្នុងសេចក្តីថ្លែងការណ៍របស់ខ្លួន កាលពីថ្ងៃទី ៩ កក្កដា គណៈកម្មការអ្នកច្បាប់អន្តរជាតិ ហៅកាត់ថា ICJ ដែលមានមូលដ្ឋាននៅទីក្រុងបាងកកប្រទេសថៃ បានទាមទារឲ្យរដ្ឋាភិបាលកម្ពុជាបង្កើតគណៈកម្មការស៊ើបអង្កេតមួយ ដែលឯករាជ្យ និងមិនលម្អៀង ដើម្បីស្រាវជ្រាវឃាតកម្មលើលោកបណ្ឌិត កែម ឡី។ គណៈកម្មការនេះបានលើកឡើងក្នុងសេចក្តីថ្លែងការណ៍របស់ខ្លួនថា ការកាត់ទោសលើជនសង្ស័យម្នាក់ឈ្មោះ អឿត អាង ហៅជួបសម្លាប់ កាលពីថ្ងៃទី ២៣ មីនា ឆ្នាំមុន បានបន្សល់ទុកនូវសំណួរជាច្រើន ដែលមិនទាន់មានចម្លើយ។
ចំនែក អង្គការឃ្លាំមើលសិទ្ធិមនុស្សអន្តរជាតិ Human Right Watch ដែលមានមូលដ្ឋាននៅសហរដ្ឋអាមេរិក ក៏បានចេញសេចក្តីថ្លែងការណ៍ដូចគ្នានេះដែរ។ អង្គការអន្តរជាតិមួយនេះ បានលើកឡើងនៅក្នុងសេចក្តីថ្លែងការណ៍មួយថា អាជ្ញាធរកម្ពុជានៅមិនទាន់បានចាត់វិធានការស៊ើបអង្កេតឲ្យបានគ្រប់គ្រាន់នៅឡើយ ចំពោះឃាតកម្មលើអ្នកអត្ថាធិប្បាយនយោបាយនៅកម្ពុជារូបនេះ។ ពីទីក្រុងញូយ៉ក Human Right Watch បានលើកឡើងថា រដ្ឋាភិបាលកម្ពុជាគួរតែអញ្ជើញមន្រ្តីសិទ្ធិមនុស្សរបស់អង្គការសហប្រជាជាតិ មកស៊ើបអង្កេតលើករណីនេះ ដើម្បីធានាថា ការស៊ើបអង្កេតធ្វើឡើងដោយឯករាជ្យ និងស្វែងរកការពិត។ អង្គការអន្តរជាតិទាំងពីរខាងលើ បានដាក់ការព្រួយបារម្ភ នូវកង្វះខាតនៃការស៊ើបអង្កេតរបស់អាជ្ញាធរកម្ពុជានាពេលកន្លងមក ខណៈដែលជនដៃដល់តែម្នាក់ប៉ុណ្ណោះ ត្រូវបាននាំយកមកកាត់ទោស។
ប៉ុន្តែយ៉ាងណាក៏ដោយ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានចាត់ទុកការទាមទាររបស់គណៈកម្មការអ្នកច្បាប់អន្តរជាតិនេះថា គឺជាការជ្រៀតជ្រែក និងរំលោភលើឯករាជ្យភាព និងសមត្ថកិច្ចនៃតុលាការកម្ពុជា ដែលមិនអាចទទួលយកបានឡើយ។ បើតាមលោក សុខ ឥសាន ករណីឃាតកម្មលើលោក កែម ឡី ត្រូវបានតុលាការកម្ពុជាស៊ើបអង្កេត និងជំនុំជម្រះក្តីរួចហើយ។ ទន្ទឹមគ្នានេះ លោកបានចោទជាសំណួរវិញថា តើស៊ើបអង្កេតធ្វើអ្វីទៀត បើសំណុំរឿងនេះបានកាត់សេចក្តីរួចទៅហើយ? និងថា តើក្រុមឯករាជ្យនោះ យកមកពីណា ដើម្បីទទួលបានឯករាជ្យ?
គួររំលឹកជូនថា លោក កែម ឡី អាយុ៤៥ឆ្នាំ ត្រូវបានឃាតករបាញ់សម្លាប់ កាលពីថ្ងៃទី ១០ ខែកក្កដា ឆ្នាំ ២០១៦ ខណៈដែលលោកបានចូលផឹកកាហ្វេនៅក្នុងហាង Star Mart នៃស្ថានីយ៍ប្រេងឥន្ធនៈកាល់តិច (Caltex) បូកគោ។ នៅថ្ងៃទី ១០ កក្កដា ឆ្នាំ២០១៨នេះ គឺជាខួប២ឆ្នាំគត់ នៃឃាតកម្មលើអ្នកវិភាគល្បីឈ្មោះរូបនេះ។ នៅថ្ងៃនេះ មានអតីតសហការី និងមិត្តភ័ក្រជាច្រើនរបស់លោក កែម ឡី បាននាំគ្នាទៅដាក់កម្រងផ្កា នៅឯស្ថានីយ៍ប្រេងឥន្ធនៈកាល់តិច ដើម្បីជាការរំលឹកវិញ្ញាណក្ខន្ធរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ