មន្រ្តីអូស្រ្តាលីព្រមានបិទទិដ្ឋាការមន្រ្តីកម្ពុជា និងមិនទទួលស្គាល់ការបោះឆ្នោត
មន្រ្តីក្រសួងការបរទេសអូស្រ្តាលីកាលពីម្សិលមិញ បានព្រមានថា រដ្ឋាភិបាលអូស្រ្តាលី កំពុងពិចារណាបិទទិដ្ឋាការចំពោះមន្រ្តីជាន់ខ្ពស់របស់រដ្ឋាភិបាលកម្ពុជាដែលពាក់ព័ន្ធក្នុងការរំលោភសិទ្ធិមនុស្ស និងបំផ្លាញដល់មូលដ្ឋានគ្រឹះនៃលទ្ធិប្រជាធិបតេយ្យនៅកម្ពុជា។ ការព្រមាននេះគឺជាការឆ្លើយតបនៅចំពោះមុខគណៈកម្មាធិការកិច្ចការបរទេស ការពារជាតិនិងពាណិជ្ជកម្មនៃព្រឹទ្ធសភាអូស្រ្តាលី ដែលចោទសួរមន្រ្តីក្រសួងការបរទេសរបស់ខ្លួនចំពោះវិធានការណ៍មកលើរដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០១:៥០
លោកស្រី ជូលី ហិចឆ័រ (Julie Heckscher) មន្រ្តីនាយកដ្ឋានកិច្ចការបរទេស និងពាណិជ្ជកម្មនៃក្រសួងការបរទេសអូស្រ្តាលី បានអះអាងថា រដ្ឋាភិបាលអូស្រ្តាលីនៅតែបារម្ភខ្លាំងអំពីវិបត្តិស្ថានការណ៍នយោបាយនៅកម្ពុជា ដែលអាចប៉ះទង្គិចដល់លទ្ធផលបោះឆ្នោតជាតិនាខែកក្កដាខាងមុខ។
នៅចំពោះមុខគណៈកម្មាធិការកិច្ចការបរទេស ការពារជាតិ និងពាណិជ្ជកម្មនៃព្រឹទ្ធសភាអូស្រ្តាលី ថ្ងៃទី៣១ ខែឧសភា ម្សិលមិញ លោកស្រី ជូលី ហិចឆ័រ បានព្រមានថា ដំណើរការបោះឆ្នោតនៅកម្ពុជាពេលខាងមុខនឹងមិនអាចជឿទុកចិត្តបានទេ ដរាបណាគណបក្សប្រឆាំងរងការធ្វើទុក្ខបុកម្នេញធ្ងន់ធ្ងរនោះ។ លោកស្រីបន្តថា រដ្ឋាភិបាលអូស្រ្តាលីនឹងបន្តយកចិត្តទុកដាក់ខ្ពស់ក្នុងការតាមដានស្ថានការណ៍នយោបាយនៅកម្ពុជា នៅមុនការបោះឆ្នោតជាតិ នាខែកក្កដា ខាងមុខនេះ។
បើតាមលោកស្រី ជូលី ហិចឆ័រ រដ្ឋាភិបាលអូស្រ្តាលី កំពុងពិចារណាបិទទិដ្ឋាការចំពោះមន្រ្តីជាន់ខ្ពស់របស់រដ្ឋាភិបាលកម្ពុជាដែលពាក់ព័ន្ធក្នុងការរំលោភសិទ្ធិមនុស្ស និងបំផ្លាញដល់មូលដ្ឋានគ្រឹះនៃលទ្ធិប្រជាធិបតេយ្យនៅកម្ពុជា។
ក៏ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជា បានចាត់ទុកការលើកឡើងរបស់លោកស្រី ជូលី ហិចឆ័រ ថាជាការជ្រៀតជ្រែកកិច្ចការផ្ទៃក្នុងកម្ពុជា និងថាវាគ្រាន់តែមតិរបស់មន្រ្តីថ្នាក់ទាបប៉ុណ្ណោះ មិនមែនជាជំហររបស់ក្រសួងការបរទេសអូស្ត្រាលីនោះទេ។
តាម លោក សុខ ឥសាន ប្រសិនបើអូស្ត្រាលីបិទទិដ្ឋាការដល់មន្រ្តីកម្ពុជាមែន លោកយល់ថា ជាការរំលោភលើធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។
រហូតមកទល់ពេលនេះ មានតែសហរដ្ឋអាមេរិកទេដែលចេញមុខ មុនគេក្នុងការបិទទិដ្ឋាការដល់មន្រ្តីជាន់ខ្ពស់រដ្ឋាភិបាលកម្ពុជា ខណៈក្រុមតំណាងរាស្រ្តរបស់ប្រទេសមហាអំណាចមួយនេះ កំពុងដំណើរការធ្វើច្បាប់បង្កកទ្រព្យសម្បត្តិរបស់ក្រុមមន្រ្តីកម្ពុជាថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ