ក្រុមហ៊ុនចំនួន៨ត្រូវបានបង្កើតឡើងដើម្បីបញ្ជូនពលការិនីទៅធ្វើការតាមផ្ទះនៅហុងកុង
រដ្ឋមន្ត្រី ក្រសួងការងារលោក អ៊ិត សំហេង បានប្រាប់ទៅក្រុមហ៊ុន នាំពលការិនីទៅធ្វើការជាជំនួយការផ្ទះនៅទីក្រុងហុងកុង ឲ្យយកចិត្តទុកដាក់ គោរពច្បាប់ជាធរមាន ដើម្បីធានាដល់សុវត្ថិភាព និងលក្ខខណ្ឌការងារឲ្យកាន់តែប្រសើរឡើង។ ការលើកឡើងដូច្នេះ ធ្វើឡើងខណៈដែលលោករដ្ឋមន្ត្រី បានចូលរួមនៅក្នុងពិធីសម្ពោធក្រុមហ៊ុន នាំពលការិនីទៅធ្វើការនៅហុងកុង Easy Reach International Co., Ltd នារសៀលថ្ងៃចន្ទនេះ ដែលជាក្រុមហ៊ុនទី៨។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅក្នុងពិធីសម្ពោធដំណើរការជាផ្លូវការនូវក្រុមហ៊ុនបញ្ជូនពលការិនីទៅធ្វើការជាជំនួយការផ្ទះ ឬមេផ្ទះនៅហុងកុង លោក អ៊ិត សំហេង រដ្ឋមន្ត្រីក្រសួងការងារ បានថ្លែងថា កម្ពុជាបានបញ្ជូនពលករទៅបំរើការងារនៅក្រៅប្រទេសមានចំនួនសរុប ១,២លាននាក់។ ពួកគេត្រូវបានបញ្ចូន ដោយក្រុមហ៊ុនឯកជននានា ទៅបំរើការងារនៅតាមប្រទេសចំនួន៦ រួមមាន ប្រទេសថៃ កូរ៉េខាងត្បូង ម៉ាឡេស៊ី ជប៉ុន សឹង្ហបុរី និងហុងកុង។ ពលករទាំងនេះ បានផ្ញើថវិកាមកកម្ពុជា ដើម្បីជួយទ្រទ្រង់ជីវភាពក្រុមគ្រួសាររបស់ពួកគេ ប្រមាណជា ២ពាន់លានដុល្លារក្នុងមួយឆ្នាំៗ។
ដោយឡែក ប្រទេសកម្ពុជាត្រូវបានចាត់ទុកថាជាការសាកល្បង នៅក្នុងការបញ្ជូនពលការិនី ទៅបំរើការងារជាស្ត្រីមេផ្ទះនៅហុងកុង កាលពីឆ្នាំ២០១៧ កន្លងទៅ បន្ទាប់ពីក្រសួងការងារកម្ពុជា បានចុះអនុស្សរណៈ នៃកិច្ចព្រមព្រៀងជាមួយសមាគមអភិវឌ្ឍន៍ធនធានមនុស្សកម្ពុជានៅហុងកុង ក្នុងការធ្វើកិច្ចសហប្រតិបត្តិការផ្តល់សេវាគាំពារ និងសេវាគាំទ្រនានាសម្រាប់ពលការិនីជំនួយការផ្ទះនៅហុងកុង។
រហូតមកទល់ពេលនេះ មានពលការិនីសរុបចំនួន៥៥នាក់ហើយ ដែលត្រូវបានបញ្ជូនទៅបំរើការងារលើវិស័យនេះ នៅហុងកុង ខណៈមានក្រុមហ៊ុនចំនួន៨ បានប្រតិបត្តិការលើការងារនេះ។ ក៏ប៉ុន្តែនៅក្នុងគម្រោងលើកដំបូងនៃការសាកល្បង ក្រសួងការងារ បាន អនុញ្ញាតឲ្យមានការជ្រើសរើសពលការិនីប្រមាណ១០០០នាក់ ទៅធ្វើការនៅហុងកុង។
តាមការបញ្ជាក់ពីលោក អ៊ិត សំហេង រដ្ឋាភិបាលនៃតំបន់រដ្ឋបាលពិសេសហុងកុង បានដាក់ឲ្យមាននូវកិច្ចសន្យាការងារស្តង់ដារសម្រាប់គាំពារបន្ថែមជូនដល់ពលករបរទេសបំរើការងារតាមផ្ទះ រួមមានប្រាក់ឈ្នួលទាបបំផុត ត្រឹមប្រមាណជា ៥៧០ដុល្លារអាមេរិក ដែលនឹងត្រូវពិនិត្យឡើងវិញជាទៀងទាត់ នូវការផ្តល់អាហារ ឬប្រាក់ហូបចុកចំនួន ១៣៣ដុល្លារអាមេរិក ក្នុង១ខែ ការស្នាក់នៅសមរម្យដោយឥតគិតថ្លៃ ការចេញថ្លៃសំបុត្រយន្តហោះត្រឡប់ទៅប្រទេសរបស់ពលករវិញ និងទទួលបានការព្យាបាលជំងឺដោយឥតគិតថ្លៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ