សមត្ថកិច្ចចាប់ថ្នាំបំរើផ្លូវភេទជាង២ម៉ឺនគ្រាប់ នៅផ្ទះលក់ឱសថសម័យ បុរាណចិនចំនួន៣
គណៈកម្មាធិការប្រយុទ្ធប្រឆាំងផលិតផលក្លែងក្លាយ នៅព្រឹកថ្ងៃអង្គារនេះ បានប្រកាសថាគណៈកម្មការ ដែលដឹកនាំដោយក្រសួងមហាផ្ទៃមួយនេះ បានរកឃើញឱសថប្រភេទស្រើបស្រាល និងជំនួយផ្លូវភេទជាច្រើន ដោយឱសថទាំងនេះ មិនបានចុះបញ្ជិការ និងហួសសុពលភាព។ ផលិតផលទាំងនេះ ត្រូវបានគេដាក់លក់នៅតាមវិថី Charles de Gaulle ក្រុងភ្នំពេញ ចំនួន៣ទីតាំង ដែលមានឈ្មោះថា«លក់ឱសថ សម័យ បុរាណចិន»។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
នៅក្នុងពិធីសន្និសីទកាសែតមួយ ឯក្រសួងមហាផ្ទៃ លោក មាជ សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ បានថ្លែងថាសមត្ថកិច្ចបានរិបអូសឱសថ ប្រភេទបង្កើនចំណង់ផ្លូវភេទ បង្កើនភាពស្រើបស្រាល ឬថ្នាំសម្រើប បានចំនួនជិត២ម៉ឺនគ្រាប់ ពីទីតាំងទាំង៣ខាងលើ។ ក៏ប៉ុន្តែអ្នកទទួលខុសត្រូវដែលជាពលរដ្ឋខ្មែរ មានឈាមជ័រជាចិននោះ នៅមិនទាន់មានការឃាត់ខ្លួននៅឡើយ។
លោកថា ឱសថទាំងនេះ មិនត្រូវបានអនុញ្ញាតឲ្យប្រើប្រាស់ទេ ប្រសិនបើរកទៅឃើញថាធ្វើឲ្យប៉ះពាល់ដល់ប្រព័ន្ធប្រសាទ ហើយបើថ្នាំទាំងនេះ ជាប្រភេទភ្ញោចអារម្មណ៍ផ្លូវភេទវិញនោះ តាមច្បាប់កម្ពុជា អ្នកជួញដូរនឹងត្រូវប្រឈមមុខជាប់ពន្ធនាគារពី៥ឆ្នាំទៅ១០ឆ្នាំ និងពិន័យជាប្រាក់ចំនួន៥០លានរៀល។
ទោះយ៉ាងណា ម្ចាស់ទីតាំងទាំង៣ ដែលគេស្គាល់ថាជាកន្លែងលក់ឱសថសម័យ បុរាណចិន ដ៏ធំនោះ ត្រូវបានដាក់ក្នុងការឃ្លាំមើលពីសមត្ថកិច្ច និងតុលាការ ដោយរង់ចាំការស្រាវជ្រាវ ប្រមូលព័ត៌មាន និងការពិសោធន៍រកលទ្ធផលគ្រប់ជ្រុងជ្រោយ។ នេះបើតាមគណៈកម្មការប្រយុទ្ធប្រឆាំងផលិតផលក្លែងក្លាយ។
យោងទៅតាមចម្លើយរបស់អ្នកលក់ ឱសថខុសច្បាប់ មិនមានចុះបញ្ជិការទាំងនេះ ត្រូវបាននាំមកពីតំបន់ផ្សេងៗនៃប្រទេសចិន និងចូលមកកម្ពុជាតាមច្រកព្រំដែនផ្លូវគោក និងតាមយន្តហោះ ដែលករណីនេះត្រូវបានស្តីបន្ទោសថាមានការឆកល្វែងដោយសមត្ថកិច្ចមួយចំនួន។
សូមបញ្ជាក់ថាឱសថបំរើឲ្យតម្រូវការផ្លូវភេទ ត្រូវបានគេដាក់លក់តាមប្រព័ន្ធអនឡាញយ៉ាងព្រោងព្រាធ រួមមានគេហទំព័រ និងបណ្តាញសង្គមហ្វេសប៊ុក។ ករណីនេះ លោក មាជ សុផាន់ណា បញ្ជាក់ប្រាប់អ្នកកាសែតថា សមត្ថកិច្ចរបស់លោក កំពុងធ្វើការស្រាវជ្រាវតាមបច្ចេកទេសជំនាញផងដែរ ដើម្បីឈានទៅចាត់វិធានការប្រឆាំងការឃោសនាលក់ឱសថបំរើផ្លូវភេទតាមអនឡាញនេះ។ ប្រធានគណៈកម្មការរូបនេះ ក៏បានអំពាវនាវដល់ពលរដ្ឋខ្មែរផងដែរ សុំឲ្យចៀសវាងការប្រើប្រាស់ឱសថទាំងអស់នេះ និងព្យាយាមប្រតិបត្តិផ្លូវភេទបែបធម្មជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ