លោក ហ៊ុន សែន៖ សាររបស់មេដឹកនាំសិង្ហបុរី ជាការគាំទ្រនិងចង់ឱ្យរបបខ្មែរក្រហមវិលមកកម្ពុជាវិញ
សាររបស់នាយករដ្ឋមន្ត្រីសិង្ហបុរីពាក់ព័ន្ធបញ្ហាសង្រ្គាមនៅកម្ពុជាកំពុងធ្វើឱ្យមានប្រតិកម្មជាបន្តបន្ទាប់ទាំងពីសំណាក់មន្រ្តីវៀតណាម និង កម្ពុជា។ ចុងក្រោយនេះ គឺប្រមុខរដ្ឋាភិបាលកម្ពុជាតែម្ដង ដែលបានបញ្ចេញសារមិនពេញចិត្ត និងសោកស្តាយតាមហ្វេសប៊ុក តបទៅកាន់នាយករដ្ឋមន្រ្តីសិង្ហបុរី លោកលី ស៊ានឡុង។ សម្រាប់នាយករដ្ឋមន្រ្តីកម្ពុជា ការលើកឡើងរបស់លោកលី ស៊ានឡុង បង្ហាញថា សិង្ហបុរី បានបង្ហាញពីការគាំទ្ររបបប្រល័យពូជសាសន៍ និង ចង់ឱ្យរបបនេះកើតមានឡើងវិញ។
ចុះផ្សាយនៅថ្ងៃ៖
ស្តាប់ - ០២:២៧
ប្រតិកម្មរបស់នាយករដ្ឋមន្រ្តីកម្ពុជាផ្ទុះឡើងបន្ទាប់ពីសមភាគីសិង្ហបុរី លោក លី ស៊ានឡុង សរសេរលើហ្វេសប៊ុក ដោយលើកឡើងថា សមាជិក ASEAN ដែលកាលនោះមានសមាជិក៥ប្រទេស បានរួមគ្នាប្រឆាំងការឈ្លានពានរបស់វៀតណាមមកលើកម្ពុជា និងប្រឆាំងរដ្ឋាភិបាលកម្ពុជាដែលបានជំនួសខ្មែរក្រហម។ គឺត្រង់ពាក្យវៀតណាមឈ្លានពានកម្ពុជា និងរួមគ្នាការប្រឆាំងរដ្ឋាភិបាលកម្ពុជាដែលមកជំនួសខ្មែរក្រហមនេះហើយ ដែលធ្វើឱ្យលោកនាយករដ្ឋមន្រ្តីហ៊ុន សែន កើតទុក្ខមិនសុខចិត្តបញ្ចេញសារតបតទាំងយប់ ដោយបង្ហាញនូវការសោកស្តាយយ៉ាងខ្លាំងទៅកាន់នាយករដ្ឋមន្រ្តីសិង្ហបុរី។
សម្រាប់ប្រមុខរដ្ឋាភិបាលកម្ពុជា ការលើកឡើងរបស់នាយករដ្ឋមន្រ្តីសិង្ហបុរីនេះបង្ហាញថា កាលនោះសិង្ហបុរី បានគាំទ្ររបបប្រល័យពូជសាសន៍ ចង់ឲ្យរបបប្រល័យពូជសាសន៍វិលត្រឡប់មកកម្ពុជាវិញ និង ប្រឆាំងនឹងការរស់ឡើងវិញរបស់ប្រជាជនកម្ពុជា។ មិនតែប៉ុណ្ណោះ លោកនាយករដ្ឋមន្រ្តី បានអះអាងថា ការលើកឡើងរបស់លោកលី ស៊ានឡុង ក៏ជាការប្រមាថដល់ពលិកម្មសាច់ស្រស់ឈាមស្រស់របស់កងទ័ពស្ម័គ្រចិត្តវៀតណាម ដែលបានជួយរំដោះកម្ពុជាឲ្យរួចផុតពីរបបប្រល័យពូជសាសន៍។ លោកហ៊ុន សែន បន្ថែមទៀតថា សាររបស់នាយករដ្ឋមន្រ្តីសិង្ហបុរីនាពេលនេះ ក៏បានបង្ហាញដល់ប្រជាជនសិង្ហបុរី និងពិភពលោកថា មេដឹកនាំសិង្ហបុរីនាពេលនោះ បានរួមចំណែកសម្លាប់ប្រជាជនកម្ពុជាយ៉ាងពិតប្រាកដ។
សារប្រតិកម្មពីប្រមុខដឹកនាំកម្ពុជានេះ ក៏បានបន្ទរបន្ថែមដោយអ្នកនាំពាក្យក្រសួងការបរទេសកម្ពុជាដែរតាមរយៈសេចក្តីថ្លែងការណ៍មួយនៅថ្ងៃសុក្រនេះ។ អ្នកនាំពាក្យក្រសួងការបរទេសកម្ពុជាបានសម្តែងនូវការសោកស្តាយយ៉ាងខ្លាំងចំពោះពាក្យសម្តីរបស់នាយករដ្ឋមន្ត្រីសិង្ហបុរីដែលសរសេរលើហ្វេសប៊ុកកាលពីថ្ងៃទី៣១ ឧសភាកន្លងទៅ។
មិនមែនតែកម្ពុជាទេ វៀតណាមឯណោះវិញក៏មិនបាននៅស្ងៀមដែរចំពោះពាក្យសម្តីរបស់មេដឹកនាំសិង្ហបុរីនេះដែរ។ អ្នកនាំពាក្យក្រសួងការបរទេសវៀតណាមកាលពីថ្ងៃទី០៤ មិថុនា បានចាត់ទុកសំណេររបស់លោកលី ស៊ានឡុង ថា មិនបានបង្ហាញពីសច្ចភាពនៃប្រវត្តិសាស្រ្ត ដែលនាំឲ្យមានការប៉ះពាល់អវិជ្ជមានដល់ការយល់ឃើញរបស់សាធារណជន។ អ្នកនាំពាក្យក្រសួងការបរទេសវៀតណាមបានចង្អុលប្រាប់នាយករដ្ឋមន្រ្តីសិង្ហបុរីថា សាលក្រមកាត់ទោសលើមេដឹកនាំខ្មែរក្រហមរបស់តុលាការកូនកាត់ខ្មែរក្រហម គឺជាតឹកតាងបង្ហាញពីការពិតនៃប្រវត្តិសាស្រ្តដែលកើតឡើងនៅកម្ពុជា។ និយាយដល់ការកាត់ទោសមេដឹកនាំខ្មែរក្រហមនេះ លោកនាយករដ្ឋមន្រ្តីហ៊ុន សែនវិញ បានចោទសួរត្រង់ទៅកាន់លោកលី ស៊ានឡុងថា តើមេដឹកនាំសិង្ហបុរី ចាត់ទុកការកាត់ទោសមេដឹកនាំខ្មែរក្រហមកន្លងទៅនេះថា ជាការត្រឹមត្រូវដែរឬទេ?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ