ក្រោយស្ងាត់មួយរយៈ លោក ហ៊ុន សែន ចេញមុខប្រតិកម្មខ្លាំងៗទៅនឹងការវាយប្រហាររបស់លោក សម រង្ស៊ី
ក្រោយពីបាត់មុខជាសាធារណៈមួយរយៈ នៅព្រឹកថ្ងៃពុធនេះ លោកនាយករដ្ឋមន្រ្តីហ៊ុន សែន បានបង្ហាញមុខជាថ្មី ដើម្បីចូលរួមចែកសញ្ញាបត្រដល់និស្សិតសាលា «ប៊ែលធីអន្តរជាតិ»។ ឆ្លៀតឱកាសនេះ លោក ហ៊ុន សែន បានធ្វើការឆ្លើយតបខ្លាំងៗទៅនឹងការវាយប្រហាររបស់លោក សម រង្ស៊ី ពាក់ព័ន្ធនឹងការអប់រំនៅកម្ពុជាក៏ដូចជា បញ្ហាសញ្ញាបត្រសាលា West Point និង គម្រោងចូលស្រុកវិញនៅថ្ងៃទី០៩ ខែវិច្ឆិកា។
ចុះផ្សាយនៅថ្ងៃ៖
ស្តាប់ - ០២:១៣
បញ្ហាដំបូងដែលលោកនាយករដ្ឋមន្រ្តី ហ៊ុន សែន បានលើកមកនិយាយនៅព្រឹកថ្ងៃពុធនេះ គឺបញ្ហាសញ្ញាបត្រសាលាបណ្ឌិតយោធា West Point ដែលកូនប្រុសរបស់លោកគឺលោក ហ៊ុន ម៉ាណែត ទទួលបាន។ សញ្ញាបត្រនេះ ត្រូវបានលោក សម រង្ស៊ី វាយប្រហារថា លោក ហ៊ុន ម៉ាណែត ទទួលបាននូវប្រភេទទី២ ដែលជាប្រភេទសញ្ញាបត្រការទូត ឫលោកចាត់ទុកថា ជាសញ្ញាបត្រក្លែងក្លាយសម្រាប់និស្សិតបរទេស។ លោក ហ៊ុន សែន បានចាត់ទុកការលើកឡើងនេះ ថាជាការប្រមាថយ៉ាងធ្ងន់ធ្ងរមកជាតិសាសន៍ខ្លួនឯង និង បានទាមទារឱ្យស្ថានទូតអាមេរិកនៅភ្នំពេញចេញមកបញ្ជាក់ពីរឿងនេះ ព្រោះថា មានតែរដ្ឋាភិបាលអាមេរិកទេ ដែលអាចបញ្ជាក់ពីតម្លៃនៃសញ្ញាបត្រដែលលោក ហ៊ុន ម៉ាណែត ទទួលបានពីសាលា West Point នេះបាន។
ក្រៅពីបញ្ហាសញ្ញាបត្រនេះ លោកប្រមុខរដ្ឋាភិបាលកម្ពុជាក៏បានប្រតិកម្មខ្លាំងៗផងដែរពាក់ព័ន្ធនឹងគម្រោងចូលស្រុកវិញរបស់លោកសម រង្ស៊ី នៅថ្ងៃទី០៩ វិច្ឆិកា។ ថ្ងៃទី០៩ វិច្ឆិកា ជាថ្ងៃបុណ្យឯករាជ្យជាតិ និងមុនមួយថ្ងៃនៃការប្រារព្ធពិធីបុណ្យអុំទូក អកអំបុក និងសំពះព្រះខែ។ លោក ហ៊ុន សែន បានគូសបញ្ជាក់ច្បាស់ៗថា បុណ្យអុំទូកនៅឆ្នាំនេះ គឺនៅតែធ្វើឡើងដដែលបើទោះស្ថានភាពទឹកយ៉ាងណាក៏ដោយ។ លោកក៏បានប្រកាសឱ្យរៀបចំពិធីបុណ្យឯករាជ្យជាតិ និង បុណ្យអុំទូកភ្ជាប់គ្នាតែម្តង។ មិនតែប៉ុណ្ណោះ លោកថែមទាំងបានប្រកាសឱ្យយកថ្ងៃទី០៩ វិច្ឆិកា ដើម្បីបរិភោគអំបុករួមគ្នាថែមទៀតដែលលោកប្រសិទ្ធនាមឱ្យថា«អំបុកការពារជាតិ ការពារសាសនា និង ព្រះមហាក្សត្រ»។
ដោយឡែក ពាក់ព័ន្ធនឹងដីកាចាប់ខ្លួនលោកសម រង្ស៊ីវិញ លោកនាយករដ្ឋមន្រ្តីហ៊ុន សែន បានអះអាងថា បានបញ្ជូនទៅកាន់ប្រទេសសមាជិកអាស៊ានទាំងអស់រួចរាល់ហើយ។ ជាមួយគ្នានេះ លោកនាយករដ្ឋមន្រ្តីហ៊ុន សែន ក៏បានគូសបញ្ជាក់ជាថ្មីថា សកម្មភាពទាំងឡាយរបស់លោកសម រង្ស៊ី មិនមែនជាការបញ្ចេញមតិទេ តែគឺជាទង្វើធ្វើរដ្ឋប្រហាររបបរាជានិយម និងរដ្ឋប្រហារផ្តួលរំលំរដ្ឋាភិបាលស្របច្បាប់។
ជាមួយការលើកឡើងបែបនេះ លោកហ៊ុន សែន ក៏បានពន្យុះឱ្យលោកសម រង្ស៊ី និង បក្ខពួកចូលស្រុកវិញនៅថ្ងៃទី០៩ វិច្ឆិកាឱ្យដូចការគ្រោងមក នឹងអាលលោកបានចាត់ការទៅតាមផ្លូវច្បាប់។ ទោះជាព្រមានលោកសម រង្ស៊ី បែបនេះ តែលោកនាយករដ្ឋមន្រ្តីក៏បានផ្តាំទៅកាន់អ្នកគាំទ្រអតីតបក្សប្រឆាំង និង ប្រជាពលរដ្ឋកុំឱ្យចូលរួមគាំទ្រសកម្មភាពរបស់លោក សម រង្ស៊ី ឱ្យសោះ ព្រោះជាទង្វើក្បត់ជាតិដែលត្រូវតែអនុវត្តតាមច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ