លោក ហ៊ុន សែន ជំរុញឲ្យអាមេរិករឹបអូសប្រាក់កូនៗរបស់ លោក និងប្រាក់របស់មន្ត្រី បើមាននៅក្រៅប្រទេស
ប្រមុខរដ្ឋាភិបាលកម្ពុជា លោក ហ៊ុន សែន បានជំរុញឲ្យសហរដ្ឋអាមេរិកពន្លឿនការរឹបអូសយកប្រាក់របស់កូនៗលោក និងប្រាក់របស់មន្រ្តីរដ្ឋាភិបាលកម្ពុជាមួយចំនួន ប្រសិនបើពួកគេមានលុយចាយមិនអស់ហើយយកទៅផ្ញើទុកនៅក្រៅប្រទេសនោះ។ ការថ្លែងបែបនេះរបស់នាយករដ្ឋមន្រ្តីកម្ពុជានៅថ្ងៃចន្ទនេះគឺជាការឆ្លើយតបនឹងការអនុម័តច្បាប់នាពេលថ្មីៗនេះ របស់រដ្ឋសភាអាមេរិក ក្នុងគោលដៅដាក់ទណ្ឌកម្មលើមន្រ្តីកម្ពុជាដែលធ្វើខូចលទ្ធិប្រជាធិបតេយ្យ។
ចុះផ្សាយនៅថ្ងៃ៖
នៅក្នុងពិធីពិនិត្យការដ្ឋានសាងសង់ពហុកីឡដ្ឋានជាតិថ្មីនៅខណ្ឌជ្រោយចង្វារនៅព្រឹកថ្ងៃចន្ទ លោកនាយករដ្ឋមន្រ្តី ហ៊ុន សែន បានថ្លែងជាឧទាហរណ៍ថា ប្រសិនបើច្បាប់ស្តីពី«ដំណើរការប្រជាធិបតេយ្យនៅកម្ពុជា»ត្រូវបានឆ្លងផុតព្រឹទ្ធសភា និងប្រធានាធិបតីអាមេរិកមែន ក៏វាមិនប៉ះពាល់អ្វីដល់ប្រជាជនខ្មែរជិត១៦លាននាក់ឡើយ។
បើតាមលោក ហ៊ុន សែន ច្បាប់នេះ នឹងប៉ះពាល់តែលើមន្រ្តីរបស់លោកយ៉ាងច្រើនណាស់១០០នាក់តែប៉ុណ្ណោះ។ តែលោកមិនជឿថា មន្រ្តីរបស់លោក និងកូនៗរបស់លោក គឺលោកស្រី ហ៊ុន ម៉ាលី និងលោក ហ៊ុន ម៉ានិត មានលុយរាប់រយលានដុល្លាររក្សាទុកនៅក្រៅប្រទេសឡើយ ខណៈដែលលោកបង្ហើបថា គឺមានតែកូនរបស់លោក អ៊ិត ប្រាង រដ្ឋលេខាធិការក្រសួងរ៉ែ និងថាមពល ប៉ុណ្ណោះ ដែលមានចំការទំពាំងបាយជូនៅអាមេរិក។
នៅខណៈដែលច្បាប់នេះមិនទាន់អាចប្រើប្រាស់បាននៅឡើយ តែលោក ហ៊ុន សែន បានជំរុញឲ្យអាមេរិកពន្លឿនការរឹបអូសប្រាក់របស់កូនៗលោក និងប្រាក់របស់មន្រ្តីរដ្ឋាភិបាលកម្ពុជាមួយចំនួនទៀត ប្រសិនបើពួកគេមានលុយចាយមិនអស់ ហើយយកទៅផ្ញើទុកនៅក្រៅប្រទេសមែននោះ។
សូមរំឭកថា សភាតំណាងរាស្ត្រសហរដ្ឋអាមេរិក ឬសភាជាន់ទាប កាលពីថ្ងៃទី១៦កក្កដា បានអនុម័តជាឯកច្ឆ័ន្ទលើសេចក្តីស្នើច្បាប់ស្តីពីលទ្ធិប្រជាធិបតេយ្យកម្ពុជា ឬH.R. 526។ ខ្លឹមសារនៃច្បាប់នេះ នឹងដាក់ទណ្ឌកម្មលើមន្រ្តីជាន់ខ្ពស់នៅកម្ពុជាដែលស្និទនឹងលោកនាយករដ្ឋមន្រ្តី ហ៊ុន សែន ជាប់ពាក់ព័ន្ធនឹងការរំលោភសិទ្ធិមនុស្ស ដែលគេសំដៅដល់ការរំលាយគណបក្សសង្រ្គោះជាតិ។
ទោះជាបែបនេះក្តី លោកនាយករដ្ឋមន្រ្តី ហ៊ុន សែន ជឿថា ច្បាប់នេះនឹងមិនអាចចេញរួចឡើយ ដោយលោកអះអាងថា ប្រធានាធិបតីអាមេរិក លោក ដូណាល់ ត្រាំ នឹងមិនល្ងង់រុញកម្ពុជាចេញទំនាក់ទំនងរបស់ខ្លួនទេ។
សូមបញ្ជាក់ថា សេចក្តីស្នើច្បាប់នេះ ត្រូវបានខកខានអនុម័តម្តងហើយ កាលពីចុងឆ្នាំ២០១៨ ដោយសារតែសភាអាមេរិកឈប់សម្រាក។ យ៉ាងណាក៏ដោយ សេចក្តីស្នើច្បាប់ដែលមានខ្លឹមសារដាក់ទណ្ឌកម្មលើមន្រ្តីរដ្ឋាភិបាលកម្ពុជានៅពេលនេះ គឺត្រូវឆ្លងកាត់សភាជាន់ខ្ពស់ឬព្រឹទ្ធសភាអាមេរិកមួយជំហានទៀត មុននឹងបញ្ជូនទៅលោកប្រធានាធិបតី ដូណាល់ ត្រាំ ធ្វើការចុះហត្ថលេខាដាក់ឲ្យប្រើជាផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ