លោក សម រង្ស៊ី ៖ លោកនាយករដ្ឋមន្ត្រីហ៊ុន សែន ដោះលែងអ្នកទោស ដោយសារសម្ពាធពីអន្តរជាតិ
លោកនាយករដ្ឋមន្ត្រី ហ៊ុន សែន ត្រូវបង្ខំចិត្តដោះលែងអ្នកទោសនយោបាយទាំងអស់ ក្នុងពេលឆាប់ៗខាងមុខនេះ ដោយសារតែសម្ពាធពីសហគមន៍អន្តរជាតិ។ នេះបើតាមការលើកឡើងរបស់ លោក សម រង្ស៊ី ភ្លាមៗ បន្ទាប់ពីលោកនាយករដ្ឋមន្ត្រី ហ៊ុន សែន មិនឲ្យអ្នកណានិយាយថា ការស្នើដោះលែងអ្នកទោស ធ្វើឡើងដោយសារតែការគាបសង្កត់ពីសហគមន៍អន្តរជាតិឡើយ។
ចុះផ្សាយនៅថ្ងៃ៖
លោក សម រង្ស៊ី អតីតប្រធានអតីតគណបក្សសង្រ្គោះជាតិ បានសរសេរសារ តាមបណ្តាញសង្គមរបស់លោកកាលពីយប់ថ្ងៃទី២៣ សីហា ថា ដោយសារតែលោក ហ៊ុន សែន ទាល់ច្រក ក្រោយពីការបោះឆ្នោតក្លែងក្លាយ ថ្ងៃ ២៩ កក្កដា កន្លងទៅនេះ និងដោយសារតែសម្ពាធពីសហគមន៍អន្តរជាតិ ដែលដកភាពស្របច្បាប់ពីរដ្ឋាភិបាលរបស់គាត់ ហើយត្រៀមដាក់ទណ្ឌកម្ម កាន់តែខ្លាំងឡើងៗ មកលើរបបផ្តាច់ការរបស់គាត់ លោក ហ៊ុន សែន ត្រូវបង្ខំចិត្តដោះលែងអ្នកទោសនយោបាយទាំងអស់ ក្នុងពេលឆាប់ៗខាងមុខនេះ។
ការអះអាងរបស់លោក សម រង្ស៊ី បានធ្វើឡើងប៉ុន្មានម៉ោងប៉ុណ្ណោះ បន្ទាប់ពីលោកនាយករដ្ឋមន្ត្រី ហ៊ុន សែន កាលពីព្រឹកថ្ងៃទី២៣ ខែសីហា ថាលោកគ្រោងស្នើសុំលើកលែងទោសទ្រង់ទ្រាយធំនៅក្នុងឆ្នាំនេះ។ ប៉ុន្តែលោកមានលក្ខខណ្ឌមួយទៅកាន់មន្ត្រីអតីតបក្សប្រឆាំងទាំងអស់ គឺកុំនិយាយថា គម្រោងស្នើលើកលែងទោសនេះកើតចេញពីការគាបសង្កត់ពីសហគមន៍អន្តរជាតិឲ្យសោះ។ លោកអះអាងថា លោកស្អប់ពាក្យនេះខ្លាំងណាស់ ហើយថែមទាំងព្រមាន ពួកគេទាំងនោះ ជាពិសេសលោក សម រង្ស៊ី តែម្តងឲ្យមានការប្រុងប្រយ័ត្នចំពោះការប្រើប្រាស់ពាក្យទាំងអស់នេះមកលើរូបលោក។
លោក សម រង្ស៊ី សរសេរលើបណ្តាញសង្គមឆ្លើយតបទៅលោក ហ៊ុន សែន ថា ក្រៅពីការដោះលែងអ្នកទោសនយោបាយទាំងអស់ លោក ហ៊ុន សែន ត្រូវបំពេញថែមនូវលក្ខខណ្ឌ ដែលអនុញ្ញាតឲ្យគណបក្សសង្គ្រោះជាតិដំណើរការឡើងវិញ អនុញ្ញាតឲ្យថ្នាក់ដឹកនាំគណបក្សសង្គ្រោះជាតិ ១១៨រូបមានសិទ្ធិធ្វើ នយោបាយ ផ្តល់តំណែងដល់សមាជិកក្រុមប្រឹក្សាឃុំ-សង្កាត់របស់អតីតគណបក្សនេះ និងទម្លាក់ចោលការចោទប្រកាន់លើមន្ត្រីបក្សប្រឆាំង និងសង្គមស៊ីវិលជាដើម។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា គម្រោងស្នើលើកលែងទោសនេះ មិនជាប់ពាក់ព័ន្ធនឹងសហគមន៍អន្តរជាតិណាមួយឡើយ។ ផ្ទុយទៅវិញ វាគឺជាបំណងដែលកើតចេញពីចិត្តធម៌របស់លោក ចំពោះប្រជាពលរដ្ឋខ្មែរ ដើម្បីឲ្យពួកគេបានទៅជួបជុំក្រុមគ្រួសារឡើងវិញ។ លោកនាយករដ្ឋមន្ត្រីក៏បានអះអាងឲ្យដឹងដែរថា មនុស្សទាំង១២នាក់ ដែលទំនងលោកចង់សំដៅទៅលើសកម្មជនអតីតបក្សសង្គ្រោះជាតិ ក៏បានសរសេរលិខិតសុំទោសរូបលោករួចរាល់ហើយ។
សម្រាប់លោកនាយករដ្ឋមន្ត្រី ប្រសិនមានអ្នកណាមួយហ៊ានធ្វើអត្ថាធិប្បាយថា ការស្នើលើកលែងទោសរបស់លោកនេះ បណ្តាលមកពីសម្ពាធពីបរទេសនោះ លោកនឹងមិនទាន់ធ្វើការស្នើនោះទេ ពោលគឺលោកនឹងទុកពេលឲ្យអ្នកកំពុងជាប់ឃុំទាំង១២នាក់ ធ្វើលិខិតថ្កោលទោសដល់អ្នកហ៊ាននិយាយបែបនេះជាមុនសិន ទើបលោកព្រមស្នើលើកលែងទោសដល់ពួកគេ។
សូមជម្រាបជូនថា សកម្មជនអតីតគណបក្សប្រឆាំងទាំងនេះ ត្រូវបានតុលាការក្រុងភ្នំពេញ ផ្ដន្ទាទោសដាក់ពន្ធនាគារចន្លោះពី៧ឆ្នាំទៅ ២០ឆ្នាំ ក្រោមការចោទប្រកាន់ពីបទចូលរួម និងដឹកនាំកុប្បកម្មរំដោះទីលានប្រជាធិបតេយ្យ ដែលបានធ្វើឡើងកាលថ្ងៃទី ១៥ ខែកក្កដា ឆ្នាំ២០១៤កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ