ថ្ងៃបិទបញ្ចប់យុទ្ធនាការឃោសនាបោះឆ្នោតនៅភ្នំពេញ គណបក្សធំពីរ បង្អួតសាច់ដុំដាក់គ្នា
គណបក្សប្រជាជនកម្ពុជា និងគណបក្សសង្គ្រោះជាតិ បានបង្អួតសាច់ដុំដាក់គ្នា នៅថ្ងៃចុងក្រោយនៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់នៅក្នុងទីក្រុងភ្នំពេញ នាថ្ងៃទី ២ មិថុនានេះ។ ក្នុងនោះ លោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា បានដឹកនាំក្បួនឃោសនាបោះឆ្នោតរបស់គណបក្សកាន់អំណាចជាលើកដំបូង ខណៈដែលលោក កឹម សុខា ប្រធានគណបក្សសង្គ្រោះជាតិ នឹងដឹកនាំក្បួនឃោសនារបស់គណបក្សប្រឆាំងចូលទីក្រុងភ្នំពេញ នៅរសៀលថ្ងៃនេះ។
ចុះផ្សាយនៅថ្ងៃ៖
ស្តាប់ - ០២:៤៨
ទីក្រុងភ្នំពេញ ហាក់មានសភាពអ៊ូអរខ្លាំង នៅថ្ងៃចុងក្រោយនៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃទី២ មិថុនានេះ។ នៅលើកំណាត់ផ្លូវព្រះមុនីវង្ស ពោលគឺចាប់ពីស្ពានអាកាសក្បាលថ្នល់ស្ថិតនៅភាគខាងត្បូងទីក្រុងភ្នំពេញ រហូតមកដល់រង្វង់មូលស្ពានជ្រោយចង្វារ ដែលស្ថិតនៅភាគខាងជើង គឺពោរពេញទៅដោយសមាជិក-សមាជិកា និងអ្នកគាំទ្រគណបក្សកាន់អំណាច។ ពួកគេបានឈរនៅអមសងខាងផ្លូវដោយដៃមានកាន់ទង់ជាតិ និងទង់គណបក្សប្រជាជនកម្ពុជា ដើម្បីរង់ចាំការមកដល់នៃក្បួនឃោសនាបោះឆ្នោតរបស់លោកនាយករដ្ឋមន្ត្រី ហ៊ុន សែន ដោយមានការប្រគុំតន្ត្រីកំដរផង។
សូមបញ្ជាក់ថា នេះគឺជាលើកទីមួយហើយ ដែលលោកនាយករដ្ឋមន្ត្រី ហ៊ុន សែន បានចុះដឹកនាំក្បួនឃោសនារបស់គណបក្សកាន់អំណាច ចាប់តាំងពីមានការបោះឆ្នោតនៅក្នុងប្រទេសកម្ពុជាមក។ លោក ហ៊ុន សែន បានឈរនៅលើរថយន្តទ្រុងមួយគ្រឿង អមដោយមន្ត្រីគ្រាក់ៗរបស់លោក ក្នុងនោះ ក៏គេឃើញមានតារាចម្រៀងល្បីឈ្មោះប្រចាំប្រទេស គឺ លោក ព្រាប សុវត្ថិ និងលោកឧកញ៉ា គិត ម៉េង ប្រធានសភាពាណិជ្ជកម្មរាជធានីភ្នំពេញ និងត្រូវជាម្ចាស់ក្រុមហ៊ុនទូរស័ព្ទ Mobitel និងទូរទស្សន៍ CTN ផងដែរ។ ក្បួនឃោសនារបស់លោកនាយករដ្ឋមន្ត្រី ហ៊ុន សែន ដែលមានអមដោយឧទ្ធម្ភាគច្រកមួយគ្រឿង ហោះឆ្វែលពីលើអាកាសផងនេះ មានអ្នកចូលរួមជាង២០ម៉ឺននាក់ ដែលចំនួននេះត្រូវបានលោកនាយករដ្ឋមន្ត្រី ហ៊ុន សែន អះអាងថា លើសពីការគ្រោងទុក។ នៅក្នុងក្បួនឃោសនានេះ លោកនាយករដ្ឋមន្ត្រី ហ៊ុន សែន បានកាន់ក្បាលម៉េក្រូ ដោយស្រែកឃោសនាក្នុងសារនយោបាយខ្លីៗថា “សូមបោះឆ្នោតជូនគណបក្សប្រជាជនកម្ពុជា។ “បោះឆ្នោតជូនគណបក្សប្រជាជនកម្ពុជា គឺដើម្បីរក្សាសន្តិភាព និងការអភិវឌ្ឍន៍។
សូមបញ្ជាក់ថា នៅក្នុងទីក្រុងភ្នំពេញនៅថ្ងៃនេះ ហាក់មានសភាពអ៊ូអរខ្លាំងជាងថ្ងៃធម្មតា។ អ៊ូអរ ដោយសារតែនៅថ្ងៃនេះ មិនមែនមានតែគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន មួយទេ ដែលបានហែក្បួនជាទ្រង់ទ្រាយធំនៅថ្ងៃចុងក្រោយនៃយុទ្ធនាការឃោសនាបោះឆ្នោតនេះ។ គណបក្សសង្គ្រោះជាតិ ដែលជាគណបក្សគូប្រជែងដ៏ស្រួចស្រាល់របស់គណបក្សកាន់អំណាច ក៏បានជួបជុំអ្នកគាំទ្រជាង៥ម៉ឺននាក់ នៅឯវត្តពោធិយ៉ារ៉ាម ហៅវត្តចាស់ ស្ថិតនៅត្រើយខាងកើតនៃដងទន្លេសាបផងដែរ។ គណបក្សប្រឆាំង ដែលដឹកនាំក្បួនដោយលោក កឹម សុខា ប្រធានគណបក្ស គ្រោងដង្ហែក្បួនចូលទីក្រុងភ្នំពេញនៅពេលរសៀលថ្ងៃនេះ។
អ្វីជាការកត់សំគាល់ គណបក្សធំៗពីរ ហាក់បានបង្អួតកម្លាំងដាក់គ្នានៅថ្ងៃចុងក្រោយ នៃយុទ្ធនាការឃោសនាបោះឆ្នោត រយៈពេល២សប្តាហ៍មកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ