លោកហ៊ុន សែន ស្នើឲ្យជប៉ុនជួយកែច្នៃសំរាមនៅក្នុងទីក្រុងភ្នំពេញ
លោកនាយករដ្ឋមន្ត្រីហ៊ុន សែន នៅថ្ងៃទី៨ខែសីហានេះ បានស្នើដល់ភាគីជប៉ុនឲ្យជួយដល់កម្ពុជាក្នុងការកែច្នៃសំរាម ដែលជាបញ្ហាដ៏ប្រឈមមួយជាពិសេសនៅទីក្រុងភ្នំពេញ។ ការលើកឡើងរបស់លោក ហ៊ុន សែន ដូច្នេះបានធ្វើឡើងខណៈដែលលោកនិងគណៈប្រតិភូកម្ពុជា កំពុងទស្សនកិច្ចនៅប្រទេសជប៉ុនចាប់ពីថ្ងៃទី៦ដល់ថ្ងៃទី៩សីហា។
ចុះផ្សាយនៅថ្ងៃ៖
ស្តាប់ - ០១:៥០
នៅក្នុងដំណើរទស្សនកិច្ចនៅរោងចក្រកែច្នៃសំរាម SHIN-KOTO INCINERATION PLAN ដែលគ្រប់គ្រងដោយ អាជ្ញាធរសម្អាតទីក្រុងតូក្យូ លោកនាយករដ្ឋមន្ត្រី ហ៊ុន សែន បានបង្ហាញពីបំណងចង់ឲ្យមានរោងចក្រកែច្នៃសំរាមទំនើបដូចនៅជប៉ុន។ រោងចក្រកែច្នៃទំនើបបើតាមការរៀបរាប់របស់លោកហ៊ុន សែន នៅលើទំព័រហ្វេសប៊ុកផ្លូវការរបស់លោកគឺ ជារោងចក្រដែលមានកំពស់៦ជាន់ បំពាក់ដោយម៉ាស៊ីនកិនកម្ទេចសំរាម ហើយបែងចែកទៅតាមប្រភេទសំរាមនីមួយៗ ដែលផលិតចេញជាវត្ថុសម្រាប់ប្រើប្រាស់បានឡើងវិញ។
លោកនាយករដ្ឋមន្ត្រីសរសេរបន្ថែមថា កាកសំណល់មួយចំនួនគឺយកទៅធ្វើជី និងបំលែងទៅជាថាមពលអគ្គិសនីសម្រាប់ប្រើប្រាស់ផងដែរ។ ជាមួយគ្នានេះ លោកហ៊ុន សែន ក៏បានស្នើឲ្យភាគីជប៉ុនសិក្សាជាមួយអ្នកជំនាញកម្ពុជា អំពីការកែច្នៃសំរាម នៅភ្នំពេញ ដោយលោកយល់ថាសំរាមគឺជាបញ្ហាចំបងធំទី២ បន្ទាប់ពីបញ្ហាចរាចរណ៍នៅក្នុងរាជធានី។
ជាទូទៅសំរាមនៅក្នុងប្រទេសកម្ពុជា ជាពិសេសនៅទីក្រុងភ្នំពេញ ការប្រឈមនឹងបញ្ហាសំរាមកាន់តែមានភាពធ្ងន់ធ្ងរទៅៗ ខណៈដែលទីក្រុងមានកំណើនមនុស្សរាប់លាននាក់ ដែលជាមួយកំណើនមនុស្សនេះ កាកសំណល់ សំរាមក៏មានការកើនឡើងដែរពីមួយថ្ងៃទៅមួយថ្ងៃ។
បច្ចុប្បន្ន សាលារាជធានីភ្នំពេញក៏កំពុងតែសិក្សាពីលទ្ធភាពកែច្នៃសំរាមជាថាមពលអគ្គិសនីផងដែរ ដោយបរិមាណសំរាមក្នុង១ថ្ងៃត្រូវគេប៉ាន់ប្រមាណថា មានជាង២ពាន់តោន។ មន្ត្រីសាលារាជធានីភ្នំពេញ បាននឹងកំពុងជម្រុញខ្លាំងក្លាលើការគ្រប់គ្រងសំរាមនេះ ពោលគឺទាំងការសំអាត ប្រមូល ការដឹកជញ្ជូននិងកែច្នៃ ដើម្បីបង្កើនសោភ័ណ្ឌភាពទីក្រុង និងការទាញយកអត្ថប្រយោជន៍ពីសំរាមតាមរយៈគម្រោងកែច្នៃសំរាមជាសរីរាង្គ ឬទាញយកហ្គាសនិងអគ្គិសនីជាដើម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ