លោក ហ៊ុន សែនថា លោកកំពុងរង់ចាំចាប់ខ្លួន លោក សម រង្ស៊ី ដាក់គុកយ៉ាងអន្ទះសារ
ថ្លែងនៅក្នុងវេទិកាជួបសំណេះសំណាលជាមួយក្រុមកម្មករ កម្មការិនីក្នុងខេត្តកំពត នៅព្រឹកថ្ងៃសុក្រនេះ លោកនាយករដ្ឋមន្រ្តីហ៊ុន សែន បានឆ្លើយតបទៅនឹងដំណឹងនៃការចង់វិលចូលប្រទេសកម្ពុជាវិញរបស់លោកសម រង្ស៊ី នាពេលខាងមុខ។ បើតាមលោកនាយករដ្ឋមន្ដ្រី លោកកំពុងរង់ចាំយ៉ាងអន្ទះសារ ដើម្បីបានចាប់ខ្លួនលោកសម រង្ស៊ី បញ្ចូលទៅក្នុងពន្ធនាគារ តាមសាលក្រមរបស់តុលាការ។
ចុះផ្សាយនៅថ្ងៃ៖
ប្រមុខរដ្ឋាភិបាលកម្ពុជា លោកនាយករដ្ឋមន្រ្តីហ៊ុន សែន បានប្រកាសជាសាធារណៈបង្ហើរទៅកាន់លោកសម រង្ស៊ី ថា លោកកំពុងតែរង់ចាំ គឺរង់ចាំយ៉ាងអន្ទះសារតែម្តង ដើម្បីបានជួប និងចាប់បញ្ជូនលោកសម រង្ស៊ីបញ្ចូលទៅក្នុងពន្ធនាគារតាមសាលក្រមរបស់តុលាការ។ លោកនាយករដ្ឋមន្រ្តីក៏បានប្រកាសឲ្យដឹងផងដែរ ថា លោកស ខេង រដ្ឋមន្រ្តីក្រសូងមហាផ្ទៃ បានទទួលសាលក្រមពីតុលាការ ដើម្បីចាប់ខ្លួនលោកសម រង្ស៊ីហើយ នៅពេលណាដែលលោកសម រង្ស៊ី មកដល់ប្រទេសកម្ពុជា។
ប្រតិកម្មឆ្លើយតបរបស់ប្រមុខរដ្ឋាភិបាលកម្ពុជានាពេលនេះ ធ្វើឡើងក្រោយពីគណៈកម្មាធិការអចិន្ត្រៃយ៍របស់អតីតគណបក្សសង្រ្គោះជាតិពីក្រៅប្រទេស បានសម្រេចឲ្យ លោកសម រង្ស៊ី វិលចូលប្រទេសកម្ពុជាវិញនាពេលខាងមុខនេះ តែមិនទាន់កំណត់កាលបរិច្ឆេទនៅឡើយ។ មិនទាន់កំណត់កាលបរិច្ឆេទ ក៏ព្រោះថា គេត្រូវការពេលវេលារៀបចំផែនការឲ្យបានច្បាស់លាស់សិន ដោយក្នុងនោះ រួមមានការអមដំណើរលោកសម រង្ស៊ី ពីសំណាក់មិត្តភក្តិបរទេស ការត្រៀមកម្លាំងមនុស្សមកទទួល និងត្រៀមវិធានការផ្សេងៗ ដើម្បីទប់ទល់ប្រសិនបើមានការចាប់ខ្លួនលោកសម រង្ស៊ី ពេលមកដល់ប្រទេសកម្ពុជា។
លោកហ៊ុន សែន បានពន្យុះឲ្យក្រុមការងាររបស់អតីតបក្សប្រឆាំង បន្តរៀបចំផែនការដែលគ្រោងទុក ដើម្បីត្រៀមទទួលលោកសម រង្ស៊ី។ ហើយថា ទោះបីមានអង្គការសហប្រជាជាតិអមដំណើរមកជាមួយក៏ដោយ ក៏លោកនឹងចាត់ការទៅតាមផ្លូវច្បាប់លើអតីតប្រធានអតីតគណបក្សសង្រ្គោះជាតិដែរ។ ប៉ុន្តែលោកបានថ្លែងទៅកាន់សកម្មជនអតីតបក្សប្រឆាំងផងដែរ ថាកុំចង់មកជាប់ពន្ធនាគារជាមួយ លោក សម រង្ស៊ី អី។
សម្រាប់លោកនាយករដ្ឋមន្រ្តីហ៊ុន សែន ការវិលចូលប្រទេសកម្ពុជាវិញរបស់ លោក សម រង្ស៊ី ស្មើនឹងការរកអុសប្រទះនឹងឈើងាប់ដូច្នេះដែរ។ នេះ ក៏ព្រោះថា លោកសម រង្ស៊ី បានប្រកាសពីគម្រោងវិលចូលស្រុកវិញ ស្របពេលដែលអាជ្ញាធរកម្ពុជាកំពុងស្វែងរកចាប់ខ្លួនលោកទៅតាមសាលក្រមរបស់តុលាការ។ យ៉ាងណាក៏ដោយ លោកនាយករដ្ឋមន្រ្តីហ៊ុន សែន ដូចពេលកន្លងទៅដែរ ហាក់មិនមានជំនឿថា លោកសម រង្ស៊ី ហ៊ានវិលចូលប្រទេសកម្ពុជាវិញនោះទេ។ មិនតែប៉ុណ្ណោះ លោកថែមទាំងប្រដូច លោក សម រង្ស៊ី ទៅនឹងសត្វឈ្លូស ដែលពូកែខាងរត់គេចខ្លួននៅពេលមានបញ្ហាថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ