លោក ហ៊ុន សែន បង្ហាញក្តីកង្វល់រឿងបណ្ឌិតមានចំនួនច្រើននាក់ពេកនៅកម្ពុជា
ប្រមុខរដ្ឋាភិបាលកម្ពុជា លោកនាយករដ្ឋមន្រ្តី ហ៊ុន សែន បានបង្ហាញក្តីកង្វល់ជាសាធារណៈអំពីចំនួនបណ្ឌិតនៅក្នុងប្រទេសកម្ពុជា។ ជាចំនួនដែលលោកគិតថា ហាក់ច្រើនជាងប្រទេសគេផ្សេងបើធៀបនឹងចំនួនប្រជាជនសរុប។ លោកនាយករដ្ឋមន្រ្តីហ៊ុន សែន បានលើកឡើងពីកង្វល់នេះនៅក្នុងពិធីសម្ពោធ «អគារឥន្ទ្រទេវី» របស់រាជបណ្ឌិត្យសភាកម្ពុជានៅព្រឹកថ្ងៃព្រហស្បតិ៍នេះ។
ចុះផ្សាយនៅថ្ងៃ៖
ស្តាប់ - ០២:២៤
នៅចំពោះមុខក្រុមបណ្ឌិត និង អ្នកទើបបញ្ចប់ថ្នាក់អនុបណ្ឌិតជាច្រើននាក់នៅរាជបណ្ឌិត្យសភាកម្ពុជា លោកនាយករដ្ឋមន្រ្តីហ៊ុន សែន បានបង្ហាញក្តីកង្វល់ពីចំនួនបេក្ខបណ្ឌិតនិងបណ្ឌិតដែលបញ្ចប់ការសិក្សានៅរាជបណ្ឌិត្យសភាកម្ពុជា។ នៅរាជបណ្ឌិត្យសភាកម្ពុជានេះ បើគិតពីឆ្នាំ២០០១ ដល់ឆ្នាំ២០១៩នេះ មានអ្នកបញ្ចប់ថ្នាក់បណ្ឌិតចំនួន១០៨នាក់ ហើយអ្នកកំពុងសិក្សាថ្នាក់បណ្ឌិតមានចំនួន៥៤៦នាក់។ សម្រាប់លោកហ៊ុន សែន ចំនួនបេក្ខបណ្ឌិតនិងបណ្ឌិតនេះហាក់មានចំនួនច្រើនពេកហើយ គឺច្រើនជាងគេតែម្តងនៅលើពិភពលោក។ ដូច្នេះហើយ លោកនាយករដ្ឋមន្រ្តី ចង់ឱ្យត្រួតពិនិត្យបញ្ហានេះឡើងវិញ ជាពិសេស គឺទៅលើនីតិវិធីនៃការបញ្ចប់ថ្នាក់បណ្ឌិត ដើម្បីធានាបានថា អ្នកដែលបញ្ចប់ថ្នាក់បណ្ឌិត គឺមានសមត្ថភាពគ្រប់គ្រាន់។
ឆ្លើយតបភា្លមៗនឹងការលើកឡើងរបស់នាយករដ្ឋមន្រ្តីនេះ លោកបណ្ឌិតសុខ ទូច ដែលជាប្រធានរាជបណ្ឌិត្យសភាកម្ពុជា បានអះអាងថា ការបញ្ចប់ថ្នាក់បណ្ឌិតនៅរាជបណ្ឌិត្យសភាកម្ពុជានេះ គឺមានលក្ខណៈតឹងរ៉ឹងណាស់ ហើយមួយឆ្នាំៗ គឺមានបេក្ខជនតិចតួចណាស់ដែលអាចបញ្ចប់និក្ខេបបទថ្នាក់បណ្ឌិតដោយជោគជ័យនៅទីនេះ។ ជាក់ស្តែង លោកថា ក្នុងចំណោមបេក្ខបណ្ឌិតដល់ទៅ២០០នាក់ គឺមានតែ៣នាក់ប៉ុណ្ណោះដែលអាចបញ្ចប់ថ្នាក់បណ្ឌិតនៅរាជបណ្ឌិត្យសភាកម្ពុជានេះ។
បើទោះបែបនេះក្តី លោកនាយករដ្ឋមន្រ្តីហ៊ុន សែន នៅតែមានកង្វល់។ កង្វល់ គឺទៅលើបញ្ហាគ្រូនាំណែការធ្វើនិក្ខេបបទ គឺគាត់ម្នាក់ត្រូវទទួលចំនួនបេក្ខបណ្ឌិតប៉ុន្មាននាក់ ហើយគ្រូនោះមានសមត្ថភាពគ្រប់គ្រាន់ហើយឫនៅក្នុងដឹកនាំធ្វើនិក្ខេបបទថ្នាក់បណ្ឌិតនេះ។ បន្ថែមលើនេះ លោកប្រមុខរដ្ឋាភិបាលកម្ពុជាបានណែនាំឱ្យពង្រឹងលើចំនួនក្រុមប្រឹក្សាការពារនិក្ខេបបទ ដែលបច្ចុប្បន្ននៅរាជ្យបណ្ឌិត្យសភាកម្ពុជាមានតែចំនួន៧នាក់។ ចំនួន៧នាក់នេះ លោកនាយករដ្ឋមន្រ្តីចាត់ទុកថា ជាចំនួនមួយតិចនៅឡើយ បើប្រៀបធៀបនៅប្រទេសគេផ្សេងដែលមានដល់ទៅ១៥នាក់ឡើងឯណោះ។
សូមបញ្ជាក់ថា គិតមកដល់ពេលនេះ ចំនួនបណ្ឌិតជាក់លាក់នៅកម្ពុជាមិនទាន់អាចកំណត់បាននៅឡើយទេ។ ប៉ុន្តែកាលពីឆ្នាំសិក្សា២០១៧-២០១៨ មានបេក្ខបណ្ឌិតតែ២នាក់ប៉ុណ្ណោះដែលបានបញ្ចប់ថ្នាក់បណ្ឌិតដោយជោគជ័យនៅកម្ពុជា។ នេះបើតាមក្រសួងអប់រំ។ ចំណែកបេក្ខជនដែលបញ្ចប់ថ្នាក់បណ្ឌិតពីក្រៅប្រទេសវិញ គឺមានចំនួន៩០នាក់ ប៉ុន្តែនេះ គឺគ្រាន់តែក្នុងមុខជំនាញវិស្វកម្មតែមួយមុខប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ