លោក ហ៊ុន សែន ប្រាប់ប្រធានរដ្ឋសភាឡាវថា កម្ពុជាគាំទ្រទំនប់វារីអគ្គិសនីដនសាហុង
កម្ពុជា គាំទ្រប្រទេសឡាវក្នុងការកសាងទំនប់វារីអគ្គិសនីដនសាហុង។ នេះគឺជាការបញ្ជាក់ជាថ្មីម្ដងទៀតរបស់លោក ហ៊ុន សែន នាយករដ្ឋមន្ដ្រីខ្មែរ ទៅកាន់ប្រធានរដ្ឋសភាឡាវ លោកស្រី ផានី យ៉ាធូទូ កាលពីល្ងាចថ្ងៃទី២៦វិច្ឆិកាម្សិលមិញ នៅឯវិមានសន្តិភាព។ ក្រៅពីប្រធានរឿងទំនប់វារីអគ្គិសនីដនសាហុង ប្រមុខរដ្ឋាភិបាលកម្ពុជានិងប្រធានរដ្ឋសភាឡាវ ក៏បានជជែកពិភាក្សាគ្នាអំពីកិច្ចសហប្រតិបត្តិការក្នុងវិស័យសំខាន់ៗផ្សេងទៀតផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
គ្រាន់តែនៅក្នុងខែវិច្ឆិកានេះ លោកនាយករដ្ឋមន្ដ្រី ហ៊ុន សែន បានសម្ដែងការគាំទ្រចំពោះការសាងសង់ទំនប់វារីអគ្គិសនីដនសាហុងនៅប្រទេសឡាវចំនួនពីរលើក។ លើកទី១ គឺនៅក្នុងជំនួបជាមួយនាយករដ្ឋមន្ដ្រីឡាវ ក្នុងឱកាសដែលកម្ពុជាធ្វើជាម្ចាស់ផ្ទះកិច្ចប្រជុំកំពូល កម្ពុជា ឡាវ វៀតណាម CLV លើកទី៩ ក្នុងខេត្តសៀមរាប នៅថ្ងៃទី២៣វិច្ឆិកា។ និងលើកទី២ គឺនៅក្នុងជំនួបរវាងលោក ហ៊ុន សែន និង លោកស្រី ផានី យ៉ាធូទូ ប្រធានរដ្ឋសភាឡាវ ដែលអញ្ជើញមកបំពេញទស្សនកិច្ចនៅកម្ពុជារយៈពេល៣ថ្ងៃ។
កាលពីថ្ងៃទី២៣វិច្ឆិកា ប្រមុខរដ្ឋាភិបាលកម្ពុជា បានបញ្ជាក់ប្រាប់លោក ថងលុន ស៊ីលូលីត នាយករដ្ឋមន្ដ្រីឡាវថា កម្ពុជាមិនជំទាស់លើគម្រោងអភិវឌ្ឍទំនប់វារីអគ្គិសនីដនសាហុងឡើយ។ មិនជំទាស់ដោយសារតែបើតាមការពិនិត្យរបស់កម្ពុជា ទំនប់វារីអគ្គិសនីដនសាហុង មិនបានផ្ដល់ផលប៉ះពាល់ទៅលើប្រភពទឹកនិងចលនាត្រីទេ។
នៅក្នុងជំនួបនាល្ងាចថ្ងៃទី២៦វិច្ឆិកា លោក ហ៊ុន សែន បានពន្យល់ពីជំហរដដែលនេះ ទៅកាន់ប្រធានរដ្ឋសភាឡាវ ដោយអះអាងថា កម្ពុជាគាំទ្រការសាងសង់ទំនប់វារីអគ្គិសនីដនសាហុងនៅប្រទេសឡាវ ខណៈប្រទេសឡាវបានសន្យាថា នឹងលក់ថាមពលអគ្គិសនីតម្លៃថោកសមរម្យមកឲ្យកម្ពុជាផងដែរ ដើម្បីអភិវឌ្ឍខេត្តមួយចំនួននៅតាមតំបន់ព្រំដែន។
ប្រមុខរដ្ឋាភិបាលកម្ពុជាក៏បានជម្រាបប្រាប់លោកស្រី ផានី យ៉ាធូទូ អំពីការបើកច្រកអន្ដរជាតិរវាងប្រទេសទាំងពីរនៅ ណងនុយឃឿន-ត្រពាំងគ្រៀល នៅថ្ងៃទី១០មករាឆ្នាំ២០១៧។ ការអនុញ្ញាតរបស់កម្ពុជាឲ្យឡាវប្រើប្រាស់ផ្លូវគមនាគមន៍និងកំពង់ផែកម្ពុជាដើម្បីដឹកជញ្ជូនទំនិញនាំចេញ ខណៈប្រទេសឡាវគ្មានសមុទ្រ។ និងការដោះដូរអ្នកទោសដោយមិនគិតពីចំនួនផងដែរ។
ឆ្លើយតបចំពោះការគាំទ្រនិងកិច្ចសហប្រតិបត្តិការរបស់កម្ពុជា លោកស្រីប្រធានរដ្ឋសភាឡាវ បានថ្លែងអំណរគុណ។ ដោយឡែក ចំពោះការព្រមព្រៀងដោះដូរអ្នកទោសរវាងប្រទេសទាំងពីរ លោកស្រីប្រធានរដ្ឋសភាឡាវបានសម្ដែងការសាទរ ដោយបានអះអាងថា កិច្ចការនេះពុំធ្លាប់មានពីមុនមកទេ គឺមានតែចំពោះកម្ពុជានិងឡាវតែប៉ុណ្ណោះ។ លោកស្រីក៏បានលើកឡើងពីការបង្កើនអាហារូបករណ៍ដល់និស្សិតនៃប្រទេសទាំងពីរផងដែរ ដែលពីមុនមានចំនួនតែ១០នាក់ក្នុង១ឆ្នាំ ឲ្យឡើងដល់១៥នាក់ក្នុងមួយឆ្នាំ ខណៈតម្លៃអាហារូបករណ៍ត្រូវតម្លើងពី១៥០ដុល្លារដល់១៨០ដុល្លារក្នុងមួយឆ្នាំ ដើម្បីជួយសម្រួលស្ថានភាពរស់នៅនិងសិក្សារបស់និស្សិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ