លោក ហ៊ុន សែន អំពាវនាវឲ្យអន្តរជាតិបន្តផ្តល់ជំនួយដល់កិច្ចគាំពារ និងអភិវឌ្ឍន៍តំបន់អង្គរ
ពិធីអបអរខួប២៥ឆ្នាំនៃការបង្កើតគណៈកម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានអង្គរហៅកាត់ថា អាយ-ស៊ី-ស៊ី-អង្គរ បានប្រព្រឹត្តិទៅ ដូចការគ្រោងទុកនៅក្នុងខេត្តសៀមរាប។ ព្រឹត្តិការណ៍រយៈពេល២ថ្ងៃ ចាប់ពីថ្ងៃទី៤ដល់ថ្ងៃទី៥ខែធ្នូនេះ គឺត្រូវបានបើកកម្មវិធីដោយប្រមុខរដ្ឋាភិបាលនៅសណ្ឋាគារសុខាសៀមរាប និងយាងបិទកម្មវិធីដោយព្រះមហាក្សត្រនៅទីលានជល់ដំរី។ ព្រឹត្តិការណ៍នេះទើបតែរៀបចំឡើងបាន២លើកប៉ុណ្ណោះដែលលើកទី១កាលពីឆ្នាំ២០១៣។ តើការប្រារព្ធខួបអាយស៊ីស៊ីអង្គរធ្វើឡើងដើម្បីអ្វី?
ចុះផ្សាយនៅថ្ងៃ៖
ស្តាប់ - ០២:១៩
នៅចំពោះមុខអ្នកចូលរួមទាំងជាតិ និងអន្តរជាតិប្រហែលជាង៣០០នាក់នៅថ្ងៃទី៤ខែធ្នូឆ្នាំ២០១៨នេះក្នុងទឹកដីអង្គរ លោកប្រមុខរដ្ឋាភិបាលខ្មែរ ហ៊ុន សែន បានថ្លែងបើកពិធីអបអរខួប២៥ឆ្នាំ នៃការបង្កើត អាយ-ស៊ី-ស៊ី-អង្គរ ដោយបានអំពាវនាវដល់សហគមន៍អន្តរជាតិបន្តជួយគាំទ្រថវិកា និងបច្ចេកទេសដល់គម្រោងគាំពារ និងអភិវឌ្ឍន៍តំបន់អង្គរបន្តទៀត។ គម្រោងនេះត្រូវបានចំណាយថវិកាអស់រាប់រយលានដុល្លារតាំងពីបង្កើតឡើងរយៈពេល២៥ឆ្នាំមកនេះ។ នេះបើតាមការបញ្ជាក់របស់លោកស្រី ភឿង សកុណា រដ្ឋមន្រ្តីក្រសួងវប្បធម៌។
ជាមួយគ្នានេះ លោកស្រី ចៅស៊ុន កិរិយា ទីប្រឹក្សាអាជ្ញាធរជាតិអប្សរា បានប្រាប់អ្នកយកព័ត៌មានវិទ្យុបារាំងអន្តរជាតិដោយផ្ទាល់ថា ការប្រារព្ធព្រឹត្តិការណ៍អាយ-ស៊ី-ស៊ី-អង្គរ នៅឆ្នាំនេះ ក៏ដើម្បីស្វែងរកថវិកាពីសហគមន៍អន្តរជាតិក្នុងការបន្តគម្រោងគាំពារ និងអភិវឌ្ឍន៍តំបន់រមណីយដ្ឋានអង្គរបន្តទៀត។
គួរបញ្ជាក់ជូនថា បច្ចុប្បន្នប្រទេសបារាំង និងប្រទេសជប៉ុន គឺជាសហប្រធាននៃគណៈកម្មាធិការ អាយ-ស៊ី-ស៊ី-អង្គរ ក្នុងនោះក៏មានតំណាងអង្គការយូណេស្កូ និងអាជ្ញាធរជាតិអប្សរា ជាសមាជិកអចិន្ត្រៃយ៍។ រីឯសមាជិកភាពវិញ គឺមានរហូតដល់ចំនួន៣៧ប្រទេសមកពី៥ទ្វីប និងមានអង្គការអន្តរជាតិចំនួន១៣ផ្សេងទៀត។ ដោយឡែកចំនួនអ្នកជំនាញបច្ចេកទេសចូលរួមកិច្ចប្រជុំអាយ-ស៊ី-ស៊ី-អង្គរ ក៏បានកើនឡើងពីចំនួន៥០នាក់រហូតដល់៣៥០នាក់នាពេលបច្ចុប្បន្ន។ នេះបើតាមឯកសារជំនួយស្មារតីរបស់អាជ្ញាធរជាតិអប្សរា។
គណៈកម្មាធិការ អាយ-ស៊ី-ស៊ី-អង្គរនេះ បានបង្កើតឡើងកាលពីខែធ្នូឆ្នាំ១៩៩៣ បន្ទាប់ពីតំបន់រមណីដ្ឋានប្រវត្តិសាស្ត្រអង្គរត្រូវបានចុះបញ្ជីជាសម្បត្តិបេតិកភ័ណ្ឌពិភពលោកកាលពីឆ្នាំ១៩៩២។
គណៈកម្មាធិការនេះ មានអាណត្តិ១០ឆ្នាំ ហើយបន្ត១០ឆ្នាំទៀត ដោយសេចក្តីសម្រេចនៅទីក្រុងប៉ារីសកាលពីខែវិច្ឆិកាឆ្នាំ២០០៣។ ប៉ុន្តែទីបំផុតគណៈកម្មាធិការដដែល ក៏មានឱកាសបន្តអាណត្តិ១០ឆ្នាំជាលើកទី៣នៅក្នុងកិច្ចប្រជុំអន្តររដ្ឋាភិបាលនៅកម្ពជា កាលពីខែធ្នូឆ្នាំ២០១៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ