លោក ហ៊ុន សែន៖ កម្ពុជាបានសហការយ៉ាងល្អជាទីបំផុតជាមួយនឹងភ្នាក់ងារUN
នៅថ្ងៃនេះ លោកនាយករដ្ឋមន្ត្រី ហ៊ុន សែន បានថ្លែងថា រដ្ឋាភិបាលកម្ពុជាបានសហការយ៉ាងល្អជាទីបំផុតជាមួយនឹងភ្នាក់ងាររបស់អង្គការសហប្រជាជាតិដែលបានបំពេញបេសកកម្មនៅកម្ពុជា។ ជាការថ្លែងនៅចំពោះមុខមន្ត្រីជាន់ខ្ពស់របស់អង្គការសហប្រជាជាតិ ដែលកំពុងបំពេញទស្សនៈកិច្ចនៅកម្ពុជា ដើម្បីពង្រឹងកិច្ចសហប្រតិបត្តិការ។
ចុះផ្សាយនៅថ្ងៃ៖
ស្តាប់ - ០១:៥៤
លោកនាយករដ្ឋមន្ត្រី ហ៊ុន សែន ក្នុងជំនួបជាមួយលោកស្រី អាមីដា សាល់សៃ អាលីហ្សាបាណា (Armida Salsiah Alisjahbana) អគ្គលេខាធិការរង នៃគណៈកម្មការសេដ្ឋកិច្ច និងសង្គម របស់អង្គការសហប្រជាជាតិ ប្រចាំតំបន់អាស៊ីនិងប៉ាស៊ីហ្វិក (UN-ESCAP) បញ្ជាក់ថា មិនមានប្រទេសច្រើនទេ ដែលបង្កើតគណៈកម្មការជាតិ សម្រាប់ធ្វើការសម្របសម្រួលជាមួយនឹង UN-ESCAP ហើយមិនត្រឹមតែប៉ុណ្ណោះ កម្ពុជាបានសហការយ៉ាងល្អជាទីបំផុតជាមួយនឹងភ្នាក់ងារអង្គការសហប្រជាជាតិទាំងអស់នៅក្នុងប្រទេស។ លោកហ៊ុនសែនអះអាងថាជារៀងរាល់ឆ្នាំ តែងតែមានកិច្ចប្រជុំរវាងភ្នាក់ងារអង្គការសហប្រជាជាតិទាំងអស់ ជាមួយនឹងនាយករដ្ឋមន្ត្រី ហើយព្រឹត្តិការណ៍រវាងភ្នាក់ងារអង្គការសហប្រជាជាតិ និងលោកនាយករដ្ឋមន្ត្រីនេះ គឺធ្វើយ៉ាងណាសហការ និងជំរុញនូវប្រសិទ្ធភាពការងារ ឲ្យកាន់តែល្អប្រសើរថែមទៀត។
លោកស្រី អាមីដា បានប្រាប់លោកនាយករដ្ឋមន្ត្រី ហ៊ុន សែន ថាគណៈកម្មការសេដ្ឋកិច្ច និងសង្គម របស់អង្គការសហប្រជាជាតិ ប្រចាំតំបន់អាស៊ីនិងប៉ាស៊ីហ្វិក (UN-ESCAP) ទទួលស្គាល់នូវសុខសន្តិភាព ស្ថិរភាព និងការអភិវឌ្ឍរបស់កម្ពុជា។
វិទ្យុបារាំងអន្តរជាតិមិនអាចសុំការបញ្ជាក់បន្ថែមពីអង្គការសហប្រជាជាតិប្រចាំប្រទេសកម្ពុជាបានទេ។ ប៉ុន្តែលោកស្រី ផូលីន ថាម៉េស៊ីស ប្រធានអង្គការសហប្រជាជាតិប្រចាំប្រទេសកម្ពុជា បានសរសេរនៅលើបណ្តាញធ្វីតធឺថាទស្សនៈកិច្ចរបស់លោកស្រី អាមីដា នាពេលនេះគឺធ្វើឡើង ដើម្បីពង្រឹងកិច្ចសហប្រតិបត្តិការរវាងគណៈកម្មការសេដ្ឋកិច្ច និងសង្គមជាមួយប្រទេសកម្ពុជា ដើម្បីការអភិវឌ្ឍន៍នៅក្នុងប្រទេស។
សូមជម្រាបជូនថានេះគឺជាដំណើរទស្សនៈកិច្ចលើកទី១របស់លោកស្រី អាមីដា សាល់សៃ អាលីហ្សាបាណាមកកាន់កម្ពុជាក្នុងនាមជាអគ្គលេខាធិការរង នៃគណៈកម្មការសេដ្ឋកិច្ច និងសង្គមរបស់អង្គការសហប្រជាជាតិ។ តាមរយៈដំណើរទស្សនៈកិច្ចនេះ លោកស្រីបានជួបជាមួយមន្ត្រីជាន់ខ្ពស់របស់រដ្ឋាភិបាលកម្ពុជា និងលោកនាយករដ្ឋមន្ត្រីហ៊ុនសែនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ