រដ្ឋាភិបាល៖ ឧត្តមក្រុមប្រឹក្សាពិគ្រោះនិងផ្ដល់យោបល់ មានប្រយោជន៍ជាងគណបក្សប្រឆាំងក្នុងរដ្ឋសភា
កិច្ចប្រជុំរវាងលោកនាយករដ្ឋមន្ដ្រី ហ៊ុន សែន និងសមាជិកឧត្តមក្រុមប្រឹក្សាពិគ្រោះនិងផ្ដល់យោបល់ បានរៀបចំធ្វើតាមការគ្រោងទុក នៅព្រឹកថ្ងៃពុធ ទី២៨សីហានេះ នៅវិមានសន្តិភាព។ កិច្ចប្រជុំនេះ ធ្វើឡើងដើម្បីពិនិត្យ កែលម្អ និងជំរុញប្រសិទ្ធភាពការងាររបស់ឧត្តមក្រុមប្រឹក្សាពិគ្រោះនិងផ្ដល់យោបល់។ ឧត្តមក្រុមប្រឹក្សាពិគ្រោះនិងផ្ដល់យោបល់ ដែលចុះបំពេញបេសកកម្មបានជិត៣០០លើក នៅក្នុងរយៈពេលមួយឆ្នាំកន្លងមកនេះ។ សម្រាប់ប្រមុខរដ្ឋាភិបាលកម្ពុជា ការងាររបស់ឧត្តមក្រុមប្រឹក្សាពិគ្រោះនិងផ្ដល់យោបល់ មានប្រយោជន៍ជាងគណបក្សប្រឆាំងក្នុងរដ្ឋសភានាពេលកន្លងមក។
ចុះផ្សាយនៅថ្ងៃ៖
ស្តាប់ - ០២:៥៨
បន្ទាប់ពីបានធ្វើការតាមដានអស់រយៈពេលពេញមួយឆ្នាំ លោកនាយកដ្ឋមន្ដ្រី ហ៊ុន សែន បានវាយតម្លៃថា ការងាររបស់ឧត្តមក្រុមប្រឹក្សាពិគ្រោះនិងផ្ដល់យោបល់ មានប្រយោជន៍ដល់កំណែទម្រង់របស់រដ្ឋាភិបាល ច្រើនជាងគណបក្សប្រឆាំងនៅក្នុងរដ្ឋសភានាពេលកន្លងមក។ នេះបើតាមលោក ឈឹម ផលវរុណ ប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះនិងផ្ដល់យោបល់ ដែលបានស្រង់ប្រសាសន៍លោកនាយករដ្ឋមន្ដ្រី ប្រាប់អ្នកសារព័ត៌មាន នារសៀលថ្ងៃពុធ ទី២៨សីហានេះ។ មានប្រយោជន៍ព្រោះបើតាមលោក ឈឹម ផលវរុណ ឧត្តមក្រុមប្រឹក្សាពិគ្រោះនិងផ្ដល់យោបល់ ដែលមានសមាសភាពមកពីគណបក្សចំនួន១៦នោះ បានផ្ដល់ធាតុចូលនិងការរិះគន់ក្នុងន័យស្ថាបនាដល់លោកនាយករដ្ឋមន្ដ្រី ដោយពុំមានចរិតកេងចំណេញនយោបាយ ឬវាយប្រហាររដ្ឋាភិបាល ដូចគណបក្សប្រឆាំងនៅក្នុងរដ្ឋសភានាពេលកន្លងមកឡើយ។
បើទោះបីជាការងាររបស់ឧត្តមក្រុមប្រឹក្សាពិគ្រោះនិងផ្ដល់យោបល់នាពេលកន្លងមក មិនបានសម្រេចលទ្ធផល១០០ភាគរយក៏ដោយ ក៏លោក ឈឹម ផលវរុណ លើកឡើងថា យន្តការនេះ បានឆ្លុះបញ្ចាំងឲ្យឃើញពីការអនុវត្តវប្បធម៌នយោបាយប្រជាធិបតេយ្យសេរីពហុបក្ស ការគោរពភាពចម្រុះនៃទស្សនៈ និងការទទួលខុសត្រូវរៀងៗខ្លួន។ និងថា ភាពរស់រវើកនៃឧត្តមក្រុមប្រឹក្សាពិគ្រោះនិងផ្ដល់យោបល់ បានជួយកាត់បន្ថយភាពអសកម្មរបស់មន្ដ្រីថ្នាក់ជាតិនិងថ្នាក់ក្រោមជាតិបានមួយកម្រិតដែរ។
សូមជម្រាបជូនថា នេះគឺជាលើកទី២ហើយ ដែលសមាជិកឧត្តមក្រុមប្រឹក្សាពិគ្រោះនិងផ្ដល់យោបល់បានជួបប្រជុំជាមួយប្រមុខរដ្ឋាភិបាលកម្ពុជា។
ឧត្តមក្រុមប្រឹក្សាពិគ្រោះនិងផ្ដល់យោបល់ ត្រូវបានបង្កើតឡើងនៅខែកញ្ញា ឆ្នាំ២០១៨ ដោយមានសមាជិកមកពីគណបក្សនយោបាយចំនួន១៦។ ចាប់តាំងពីបង្កើតឡើងរហូតមកទល់ពេលនេះ សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ បានចុះបំពេញបេសកកម្ម ដោះស្រាយបញ្ហាជូនពលរដ្ឋនៅតាមមូលដ្ឋានបានចំនួន២៩៥លើក និងដាក់របាយការណ៍ជូនប្រមុខរដ្ឋាភិបាលកម្ពុជា តាមរយៈលេខាធិការដ្ឋាន បានចំនួន២៥១របាយការណ៍។
ជាការកត់សម្គាល់ ការងាររបស់ឧត្តមក្រុមប្រឹក្សាពិគ្រោះនិងផ្ដល់យោបល់ ភាគច្រើនផ្ដោតលើប្រធានបទ ទំនាស់ដីធ្លី ការរំលោភយកដីរដ្ឋ បទល្មើសព្រៃឈើ បទល្មើសជលផល បញ្ហាបរិស្ថាន ការរំលោភអំណាច ការចាក់លុបឆ្នេរ បឹង ព្រែក និងអូរជាដើម។ ក្រៅពីបេសកកម្មនៅតាមមូលដ្ឋាន ក្រុមប្រឹក្សាពិគ្រោះនិងផ្ដល់យោបល់ បានផ្ដល់ធាតុចូលលើសេចក្ដីព្រាងច្បាប់ចំនួន៩ មុនពេលសេចក្ដីព្រាងទាំងនោះត្រូវដាក់ចូលក្នុងកិច្ចប្រជុំគណៈរដ្ឋមន្ដ្រី។ ក៏មានផងដែរការអញ្ជើញថ្នាក់ដឹកនាំក្រសួងស្ថាប័ននានា ដើម្បីផ្លាស់ប្ដូរយោបល់ និងផ្ដល់មតិទិតៀនក្នុងន័យស្ថាបនា ដែលក្នុងរយៈពេល១២ខែកន្លងមកនេះ បានប្រព្រឹត្តធ្វើចំនួន១០ដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ