ចំណាត់ថ្នាក់ប្រឆាំងការជួញដូរមនុស្សនៅកម្ពុជា នៅតែមិនទាន់ល្អប្រសើរ
កម្ពុជា រក្សាបានចំណាត់ថ្នាក់លេខពីរក្នុងបញ្ជីការប្រឆាំងនឹងការជួញដូរមនុស្សក្នុងឆ្នាំ ២០១៧នេះ។ យ៉ាងណាក៏ដោយ របាយការណ៍ដែលចេញផ្សាយដោយក្រសួងការបរទេសសហរដ្ឋអាមេរិក កាលពីថ្ងៃអង្គារ អះអាងថា បញ្ហាជួញដូរមនុស្សនៅកម្ពុជាក្នុងឆ្នាំ ២០១៧នេះ មិនមានភាពល្អប្រសើរច្រើននោះទេ បើធៀបនឹងឆ្នាំមុន។
ចុះផ្សាយនៅថ្ងៃ៖
របាយការណ៍ស្តីពីការប្រឆាំងនឹងការជួញដូរមនុស្ស បញ្ជាក់ថា ភាពមិនល្អប្រសើរនេះដោយសារតែរដ្ឋាភិបាលកម្ពុជាមិនទាន់បានបំពេញតាមស្តង់ដាឲ្យបានជាអប្បបរិមាក្នុងការលុបបំបាត់ការជួញដូរមនុស្ស។ ក្នុងនោះមានដូចជា ការមិនស៊ើបអង្កេត ឬយកមកកាត់ទោសក្រុមមន្ត្រី ដែលពាក់ព័ន្ធនឹងបទល្មើស។
របាយការណ៍បានបន្ថែមទៀតថា ការជួញដូរកម្លាំងពលកម្មជនជាតិខ្មែរនៅបរទេសនៅតែកើតឡើង ដោយសារតែមន្ត្រីជំនាញ មិនបានត្រួតពិនិត្យទីភ្នាក់ងារជ្រើសរើសពលករឱ្យបានដិតដល់ ហើយទីភ្នាក់ងារទាំងនោះលក់សិទ្ធិបន្តទៅឱ្យមេខ្យល់ជាដើម។ ខណៈសមត្ថភាពទន់ខ្សោយរបស់មន្ត្រីស្ថានទូតកម្ពុជានៅក្រៅប្រទេសក៏ជាផ្នែកមួយនៃការបន្តឱ្យមានការជួញដូរមនុស្ស។
ចំណែកអំពើពុករលួយនៅគ្រប់កម្រិត បានដាក់កំហិតដល់លទ្ធភាពរបស់មន្ត្រីពាក់ព័ន្ធក្នុងការចាប់ជនល្មើសឱ្យទទួលខុសត្រូវ។ បើក្រលេកទៅមើល ស្ថានបេសកកម្មការទូតកម្ពុជានៅក្រៅប្រទេស វិញប្រឈមនឹងបញ្ហាកង្វះធនធានមនុស្ស ឬសមត្ថភាពក្នុងការផ្តល់ជំនួយជាមូលដ្ឋាន ឬធ្វើមាតុភូមិនិវត្តន៍ជនរងគ្រោះនៅឡើយ បើទោះបីជារដ្ឋាភិបាលខិតខំបណ្តុះបណ្តាលអ្នកការទូតពីការការពារពលករចំណាកស្រុកក៏ដោយ។
យ៉ាងណាក៏ដោយក្រសួងការបរទេសសហរដ្ឋអាមេរិក បានទទួលស្គាល់ពីការខិតខំប្រឹងប្រែងរបស់រដ្ឋាភិបាលកម្ពុជាតាមរយៈការកាត់ទោសជនល្មើសធម្មតាក្នុងចំនួនដ៏ច្រើន ព្រមទាំងការផ្តល់ថវិកាបន្ថែមទៀតដល់គណៈកម្មាធិការជាតិប្រឆាំងនឹងការជួញដូរមនុស្ស និងបង្កើតនូវផែនការសកម្មភាពជាតិសម្រាប់ទប់ស្កាត់រាល់ទម្រង់នៃការជួញដូរមនុស្ស។
ជាការឆ្លើយតបទៅនឹងបញ្ហានេះ ក្រសួងការបរទេសសហរដ្ឋអាមេរិកតាមរយៈរបាយការណ៍របស់ខ្លួន បានស្នើឱ្យរដ្ឋាភិបាលកម្ពុជា ធ្វើយ៉ាងណាបង្កើនសេវាជួយជនរងគ្រោះ ជាពិសេសក្រុម ដែលត្រូវបានកេងប្រវ័ញ្ចនៅលើទូកនេសាទ។
សូមរំលឹកជូនថា ស្ថានភាពការជួញដូរមនុស្សនៅកម្ពុជា ត្រូវបានសហរដ្ឋអាមេរិកដាក់ចំណាត់ថ្នាក់លេខ២ដែរ កាលពីឆ្នាំ២០១៦ ល្អជាងចំណាត់ថ្នាក់លេខ២ក្នុងបញ្ជីតាមដាន កាលពីឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ