ក្រសួងសុខាភិបាល៖ ករណីពុលស្លាប់នៅខេត្តក្រចេះ គឺបណ្តាលមកពីស្រា
ក្រសួងសុខាភិបាល នៅព្រឹកថ្ងៃទី៧ឧសភានេះ បានចេញសេចក្តីប្រកាសព័ត៌មានដោយវាយតម្លៃជាបឋមថា ករណីពុលស្លាប់នៅក្នុងខេត្តក្រចេះ គឺបណ្តាលមកពីពុលស្រា។ ស្រា ដែលមានផ្ទុកជាតិមេតាណុលខ្ពស់ ដែលធ្វើឲ្យពុល។ យ៉ាងណាក៏ដោយ មូលហេតុដែលបណ្តាលមកពីការពុលទឹក ក្រសួងនៅមិនទាន់បោះបង់ចោលនៅឡើយទេ។ សូមបញ្ជាក់ថា តាមតុល្យការចុងក្រោយ ចំនួនអ្នកស្លាប់បានកើនឡើងដល់១៣នាក់ហើយ។
ចុះផ្សាយនៅថ្ងៃ៖
ស្តាប់ - ០២:០៤
មូលហេតុនេះ ត្រូវបានបញ្ជាក់ដោយមន្ទីរពិសោធន៍ជាតិសុខាភិបាល បន្ទាប់ពីការពិនិត្យទៅលើសំណាកស្រាមួយចំនួន ដែលផ្ញើមកពីភូមិចំនួនពីរ គឺភូមិស្រែនន និងភូមិអាលច ក្នុងឃុំកន្ទួត ស្រុកចិត្របុរី ខេត្តក្រចេះ។ លទ្ធផលនៃការធ្វើពិសោធន៍លើស្រាមួយចំនួនបានបង្ហាញថា ស្រាទាំងនោះ មានផ្ទុកជាតិមេតាណុលខ្ពស់ ដែលធ្វើឲ្យពុល។ នេះបើយោងតាមសេចក្តីប្រកាសព័ត៌មានជាបឋមរបស់ក្រសួងសុខាភិបាល នៅព្រឹកព្រលឹម ថ្ងៃទី ៧ ឧសភា នេះ។
តាមរយៈការអង្កេតស្រាវជ្រាវដោយក្រុមការងារឆ្លើយតបបន្ទាន់របស់ខ្លួន ក្រសួងសុខាភិបាល បានអះអាងថា មានករណីសង្ស័យលើការពិសារស្រា ដែលផលិតមិនត្រឹមត្រូវតាមបច្ចេកទេស ដោយអ្នកស្លាប់និងឈឺភាគច្រើន មានប្រវត្តិពិសារស្រា។ ហើយបើតាមការសាកសួររបស់ក្រុមការងារនៃក្រសួងសុខាភិបាល ក៏បានរកឃើញដែរថា មានករណីខ្លះទៀតមិនបានពិសារស្រាទេ តែពួកគាត់បានប្រើប្រាស់ទឹកព្រែកទេ។ ហេតុដូច្នេះហើយ តាមរយៈសេចក្តីប្រកាសរបស់ខ្លួននៅថ្ងៃនេះ ក្រសួងសុខភិបាល មិនទាន់បោះបង់ចោលទាំងស្រុង នូវមូលហេតុដែលបណ្តាលមកពីការពុលទឹកនៅឡើយទេ។ បើតាមសេចក្តីប្រកាសនេះ ការវិភាគសំណាកទឹក កំពុងធ្វើឡើង ហើយបើតាមរដ្ឋមន្រ្តីក្រសួងសុខាភិបាលលោក ម៉ម ប៊ុនហេង លទ្ធផលនេះ នឹងត្រូវបង្ហាញ នៅថ្ងៃទី ៨ ឧសភា។
គួរជំរាបជូនថា គិតត្រឹមរសៀលថ្ងៃទី ៧ ឧសភានេះ ចំនួនអ្នកស្លាប់ដោយសារករណីពុលនៅក្នុងខេត្តក្រចេះ បានកើនឡើងដល់១៣នាក់ហើយ ខណៈអ្នកជំងឺ១៣៤នាក់ កំពុងសម្រាកនៅមន្ទីរពេទ្យខេត្តក្រចេះ និង១២នាក់ ត្រូវបានបញ្ជូនមកសង្រ្គោះបន្ទាន់ នៅឯមន្ទីរពេទ្យកាល់ម៉ែត្រ ក្នុងក្រុងភ្នំពេញ។ នេះបើយោងតាមការឲ្យដឹងពីប្រធានមន្ទីរសុខាភិបាលខេត្តក្រចេះ លោក ឈ្នាង សុវត្ថា។
យ៉ាងណាក៏ដោយ ដើម្បីឆ្លើយតបទៅនឹងសភាពការណ៍បន្ទាន់នេះ ក្រសួងសុខាភិបាលបានដាក់ចេញនូវវិធានការមួយចំនួន ទី១.បញ្ឈប់ការបិត និងលក់ស្រាសក្នុងមូលដ្ឋានខាងលើ ទី២.បំរាមប្រជាជនក្នុងភូមិ កុំឲ្យប្រើប្រាស់ទឹកអូរក្នុងតំបន់សង្ស័យនិងជួយផ្គត់ផ្គង់ទឹកស្អាតដោយឥតគិតថ្លៃជូនដល់ប្រជាពលរដ្ឋ និងទី៣. អប់រំអនាម័យរស់នៅនិងហូបស្អាតដល់ប្រជាជនក្នុងភូមិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ