ប្រមុខរដ្ឋស្តីទី តែងតាំងទីប្រឹក្សារដ្ឋាភិបាលអាណត្តិទី៦ ជាង២០០នាក់ ក្នុងនោះ១១នាក់ជាជនបរទេស
នៅក្នុងអាណត្តិទី៦ នៃរដ្ឋាភិបាលកម្ពុជានេះ ព្រះមហាក្សត្រ តាមរយៈប្រមុខរដ្ឋស្តីទីបានតែងតាំងទីប្រឹក្សារដ្ឋាភិបាលសរុបចំនួន ២០៧នាក់។ ក្នុងចំណោមអ្នកទាំង២០៧នាក់នេះ មានជនបរទេសចំនួន១១នាក់ ក្រៅពីនេះជាពលរដ្ឋខ្មែរទាំងអស់ ដែលពួកគេមានឋានៈស្មើចាប់ពីឧបនាយករដ្ឋមន្ត្រី រហូតដល់អនុរដ្ឋលេខាធិការ។
ចុះផ្សាយនៅថ្ងៃ៖
ស្តាប់ - ០២:៣១
តាមរយៈព្រះរាជក្រឹត្យ ចុះថ្ងៃទី២២កញ្ញា ដែលចុះហត្ថលេខាដោយប្រមុខរដ្ឋស្តីទី លោក សាយ ឈុំ ទីប្រឹក្សារដ្ឋាភិបាលដែលមានឋានៈស្មើនឹងឧបនាយករដ្ឋមន្ត្រី នៅក្នុងអាណត្តិទី៦នៃរដ្ឋាភិបាលនេះ មានចំនួន៣រូប រួមមានលោក ហេង វង្សប៊ុនឆាត លោក ណាឌី តាន់ និងលោក ឯក សំអុល។
ជាមួយគ្នានេះ ទីប្រឹក្សា ដែលមានឋានៈស្មើទេសរដ្ឋមន្ត្រី មានចំនួន ១៣រូប ដែលអ្នកទាំងនេះ សុទ្ធសឹង ជាអ្នកនយោបាយ និងជាមន្ត្រី ដែលមានគុណបំណាច់ និងធ្លាប់បំរើការងារនៅតាមស្ថាប័ននានា របស់រដ្ឋ ដែលដឹកនាំដោយ គណបក្សកាន់អំណាច នាពេលកន្លងមក។ រីឯ ទីប្រឹក្សារដ្ឋាភិបាល ដែលមានឋានៈស្មើនឹងរដ្ឋមន្ត្រី ក៏មានច្រើនដែរ គឺមានរហូតដល់ទៅ ៦៣នាក់ ខណៈ ទីប្រឹក្សា ដែលមានឋានៈស្មើរដ្ឋលេខាធិការមានចំនួន ៤៥នាក់ និងស្មើអនុរដ្ឋលេខាធិការចំនួន ៨៣នាក់។
ព្រះរាជក្រឹត្យដដែល បានបង្ហាញដែរថា រដ្ឋាភិបាលកម្ពុជាអាណត្តិនេះ ក៏មានទីប្រឹក្សាបរទេសចំនួន១១នាក់ដែរ ដោយពួកគេមានឋានៈស្មើនឹងរដ្ឋមន្ត្រី និងរដ្ឋលេខាធិការ។ បើតាមការបញ្ជាក់ក្នុងព្រះរាជក្រឹត្យ ក្នុងចំណោមទីប្រឹក្សាបរទេសចំនួន១១នាក់នេះ មាន៤នាក់ មិនទទួលប្រាក់បៀវត្សពីរដ្ឋាភិបាលកម្ពុជា។
ជុំវិញការតែងតាំងទីប្រឹក្សារដ្ឋាភិបាលចំនួនជាង២០០នាក់នៅពេលនេះ អ្នកតាមដានសង្គមនានា បានមើលឃើញថា មនុស្សដែលមានគុណភាព សម្រាប់ជួយការងាររដ្ឋាភិបាល ក្នុងការអភិវឌ្ឍប្រទេស មិនមានច្រើនទេ ក្នុងចំណោមទីប្រឹក្សាទាំងនេះ និងថាជាការខាតបង់ថវិកាជាតិ។ ក៏ប៉ុន្តែលោក ផៃ ស៊ីផាន អ្នកនាំពាក្យរដ្ឋាភិបាល បានលើកឡើងផ្ទុយពីការរិះគន់ខាងលើថា ការងាររបស់ក្រុមទីប្រឹក្សាទាំងអស់សុទ្ធតែមានអត្ថប្រយោជន៍ និងបានឆ្លើយតបទៅនឹងតម្រូវការចាំបាច់របស់រដ្ឋាភិបាល។
សូមរំលឹកថា កាលពីថ្ងៃទី៦ ខែកញ្ញា កន្លងទៅនេះ ព្រះមហាក្សត្រកម្ពុជា គឺព្រះបាទសម្តេចព្រះបរមនាថ នរោត្តម សីហមុនី បានត្រាស់បង្គាប់បញ្ចប់មុខតំណែងទីប្រឹក្សារដ្ឋាភិបាល ទីប្រឹក្សា ជំនួយការទាំងអស់របស់ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រីប្រតិភូអមនាយករដ្ឋមន្ត្រី ទីប្រឹក្សា ជំនួយការទាំងអស់របស់ខុទ្ទកាល័យនាយករដ្ឋមន្ត្រី និងថ្នាក់ដឹកនាំស្ថាប័នរដ្ឋដទៃទៀត ដែលសុទ្ធសឹងជាទីប្រឹក្សា និងជំនួយការនៅក្នុងតំណែងរដ្ឋាភិបាលអាណត្តិចាស់។ ក៏ប៉ុន្តែ សម្រាប់រដ្ឋាភិបាលអាណត្តិទី៦នេះ តួនាទីទីប្រឹក្សា និងជំនួយការរដ្ឋាភិបាល ស្ថាប័នរដ្ឋ និងទីប្រឹក្សាឬជំនួយការថ្នាក់ដឹកនាំ ត្រូវបានតែងតាំងជាបន្តបន្ទាប់ ដោយមានការបង្កើនចំនួនច្រើនជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ