បញ្ហា EBA៖ ពលរដ្ឋខ្មែរចេញវីដេអូសំណូមពររដ្ឋាភិបាលខ្មែរឲ្យស្តារលទ្ធិប្រជាធិបតេយ្យឡើងវិញ
តាមរយៈបណ្តាញសង្គមហ្វេសប៊ុករបស់សកម្មជនអតីតគណបក្សសង្គ្រោះជាតិ នាពេលថ្មីៗនេះ គេឃើញមានការចែករំលែកយ៉ាងព្រោងព្រាតពីវីដេអូ បង្ហាញពីពលរដ្ឋជាក្រុម សំណូមពរឲ្យរដ្ឋាភិបាលកម្ពុជា ស្តារឡើងវិញនូវលទ្ធិប្រជាធិបតេយ្យក្នុងប្រទេសកម្ពុជា ដើម្បីបញ្ចៀសការដកប្រព័ន្ធអនុគ្រោះពន្ធ EBA ពីសហភាពអឺរុប។ មន្ត្រីជាន់ខ្ពស់អតីតគណបក្សសង្គ្រោះជាតិ ស្នើឲ្យរដ្ឋាភិបាល យកកង្វល់របស់ពលរដ្ឋទាំងនេះ ទៅពិចារណា ខណៈអ្នកនាំពាក្យក្រសួងមហាផ្ទៃ ថាមិនអាចពិចារណាអ្វីលើសនេះបានទេ ប៉ុន្តែរដ្ឋាភិបាលក៏មិនហាមឃាត់ការបញ្ចេញមតិរបស់ពលរដ្ឋនោះដែរ។
ចុះផ្សាយនៅថ្ងៃ៖
ស្តាប់ - ០១:៤០
ក្នុងវីដេអូ មិនដល់មួយនាទីផង គេសង្កេតឃើញថា មានពលរដ្ឋ ដែលប្រមូលគ្នាជាក្រុម ដោយអះអាងថា មកពីស្រុកស្ទឹងត្រង់ ខេត្តកំពង់ចាម និងមួយក្រុមទៀត មកពីស្រុកពញ្ញាក្រែក ខេត្តត្បូងឃ្មុំ បានសំណូមពរឲ្យរដ្ឋាភិបាលកម្ពុជា អនុវត្តការគោរពសិទ្ធិមនុស្ស និងស្តារលទ្ធិប្រជាធិបតេយ្យនៅកម្ពុជាឡើងវិញ ដើម្បីបញ្ចៀសការព្យួរប្រព័ន្ធអនុគ្រោះពន្ធ EBA ពីសហគមន៍អឺរុប។
លោកអ៊ូ ច័ន្ទរ័ត្ន មន្ត្រីជាន់ខ្ពស់អតីតគណបក្សសង្គ្រោះជាតិ លើកឡើងថា រដ្ឋាភិបាលកម្ពុជា គួរតែយកកង្វល់ដែលពលរដ្ឋ បានធ្វើជាវីដូអូ បង្ហោះលើបណ្តាញសង្គមនេះ ទៅពិចារណា ក្នុងការធ្វើយ៉ាងណាទប់ស្កាត់ការដកប្រព័ន្ធអនុគ្រោះពន្ធ EBA ចេញពីកម្ពុជា។ ក្នុងនោះលោក អ៊ូ ច័ន្ទរ័ត្ន ក៏សំណូមពរ កុំឲ្យមានការបង្ក្រាបណាមួយ ឬ ប្រើវិធានាការផ្លូវច្បាប់ណាមួយទៅលើការទាមទារបែបនេះ ទោះបីជាអ្នកទាមទារនោះ ជាពលរដ្ឋធម្មតា ឬ ជាសកម្មជននយោបាយក៏ដោយ។
យ៉ាងណាមិញ អ្នកនាំពាក្យក្រសួងមហាផ្ទៃ លោក ខៀវ សុភក្ត អះអាងប្រាប់វិទ្យុបារាំងនៅព្រឹកនេះថា សកម្មភាពទាំងនោះ គ្រាន់តែជាការបញ្ចេញមតិរបស់ពលរដ្ឋ ដែលរដ្ឋាភិបាល នឹងមិនរឹតត្បិតអ្វីនោះទេ។ តាមលោក ខៀវ សុភក្ត គឺពលរដ្ឋ អាចបង្ហោះសារបង្ហាញកង្វល់របស់ខ្លួនបានដោយសេរី ប៉ុន្តែលោកថា ទោះបីជាបែបណា ក៏រដ្ឋាភិបាល មិនអាចធ្វើតាមការស្នើសុំរបស់សហភាពអឺរុប ដែលត្រូវយកអធិបតេយ្យកម្ពុជា ជាថ្នូរដូរនឹង EBA ដែរ។
គួរកត់សម្គាល់ថា ការបង្ហោះសារបង្ហាញកង្វល់របស់ពលរដ្ឋបែបនេះ គឺកើតឡើងបន្ទាប់ពីសមាគមរោងចក្រកាត់ដេរនៅកម្ពុជា ហៅថា GMAC ទើបបានបញ្ចេញសេចក្តីថ្លែងការណ៍មួយ នៅក្នុងសប្តាហ៍នេះ ដោយព្រមានថា បើសហភាពអឺរ៉ុបផ្អាកប្រព័ន្ធអនុគ្រោះពន្ធ (EBA)នៅពេលខាងមុខនេះ នឹងធ្វើឲ្យរងគ្រោះដល់កម្មករ ៧៥ម៉ឺននាក់ ព្រមទាំងប៉ះពាល់ដល់គ្រួសាររបស់ពួកគេជាង ៣លាននាក់ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ