អាល្លឺម៉ង់៖ កម្ពុជានៅតែអាចទទួលបានការអនុគ្រោះពន្ធEBA បើប្រទេសនេះបើកចំហនយោបាយ
ប្រទេសអាល្លឺម៉ង់ បានអះអាងថា កម្ពុជានៅតែមានឱកាសទទួលបានការបន្តការអនុគ្រោះពន្ធEBA ប្រសិនបើរដ្ឋាភិបាលកម្ពុជាបើកចំហបរិយាកាសនយោបាយ និងសិទ្ធិសង្គមស៊ីវិលឡើងវិញ។ ការលើកឡើងដូចនេះ គឺធ្វើឡើងដោយ លោក Nobert BARTHLE សមាជិកសហព័ន្ធអាល្លឺម៉ង់ និងជារដ្ឋលេខាធិការក្រសួងសហប្រតិបត្តិការ នៃប្រទេសអាល្លឺម៉ង់ ក្នុងជំនួបជាមួយលោកនាយករដ្ឋមន្រ្តី ហ៊ុន សែន កាលពីថ្ងៃចន្ទ។
ចុះផ្សាយនៅថ្ងៃ៖
ស្តាប់ - ០១:៥៩
នៅក្នុងសំណេរជាងពីរបន្ទាត់នៅលើទំព័រហ្វេសប៊ុក ស្ថានទូតអាល្លឺម៉ង់ប្រចាំកម្ពុជា បានគូសបញ្ជាក់ថា កម្ពុជានៅតែមានឱកាសទទួលបានការអនុគ្រោះពន្ធហៅកាត់ថាEBAដើម្បីនាំទំនិញទៅកាន់ទីផ្សារអឺរ៉ុបដដែល។ នោះប្រសិនបើកម្ពុជាបើកចំហបរិយាកាសនយោបាយ និងសិទ្ធិសង្គមស៊ីវិលឡើងវិញ។ បើតាមស្ថានទូតអាល្លឺម៉ង់ «យើងត្រូវកសាងទំនុកចិត្តឡើងវិញនិងស្វែងរកដំណោះស្រាយ»។
ដោយឡែក នៅលើទំព័រហ្វេសប៊ុករបស់លោកនាយករដ្ឋមន្រ្តី ហ៊ុន សែន វិញ ពុំមានឃើញលើកឡើងពីបញ្ហាEBAនេះទេនៅក្នុងជំនួបជាមួយលោក Nobert BARTHLE សមាជិកសហព័ន្ធអាល្លឺម៉ង់ និងជារដ្ឋលេខាធិការក្រសួងសហប្រតិបត្តិការ នៃប្រទេសអាល្លឺម៉ង់នោះ។ ប៉ុន្តែបានបញ្ជាក់សារជាថ្មីថា អាល្លឺម៉ង់នៅគាំទ្រ និងបន្តសហការជាមួយកម្ពុជា ក្នុងការជួយដល់វិស័យកសិកម្ម អគ្គិសនីការប្រើប្រាស់ផ្ទាំងសូឡា ប្រព័ន្ធស្រោចស្រពទឹក និងជំរុញការវិនិយោគនៅប្រទេសកម្ពុជា ព្រមទាំងជួយដោះស្រាយបញ្ហាការកកស្ទះចរាចរណ៍ផងដែរ។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបានអះអាងថាលោកមិនបានដឹងអ្វីដែលអាល្លឺម៉ង់លើកឡើងនោះទេ ប៉ុន្តែលោកបញ្ជាក់ថា កម្ពុជានៅតែរក្សាដូចមុនដដែល។ ជាជំហរដែលរដ្ឋាភិបាលកម្ពុជាធ្លាប់អះអាងថា មិនឱនក្បាលរណបបរទេសដើម្បីជាថ្នូរនឹងការទទួលបានជំនួយនោះឡើយ។
សូមបញ្ជាក់ថា អាល្លឺម៉ង់ គឺជាសមាជិកសំខាន់មួយរបស់សហភាពអឺរ៉ុប។ សហភាពអឺរ៉ុប កាលពីថ្ងៃទី១១ ខែកុម្ភៈ បានប្រកាសអំពីការចាប់ផ្ដើមនីតិវិធីរបស់ខ្លួនឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធលើទំនិញទាំងអស់លើកលែងតែអាវុធពីកម្ពុជាឬហៅកាត់ថាEBA។
ដោយឡែក សមាជិកសភាអាមេរិកពីររូប គឺ លោក Alan Lowenthal និង លោក Steve Chabot កាលពីថ្ងៃអង្គារ ក៏បានដាក់សេចក្តីស្នើច្បាប់របស់ខ្លួនដោយជំរុញឲ្យ លោក ដូណាល់ ត្រាំ ពិនិត្យលើប្រព័ន្ធអនុគ្រោះពន្ធដល់កម្ពុជា ដោយអះអាងថា កម្ពុជាមានការរំលោភសិទ្ធិមនុស្ស និងសិទ្ធិការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ