វិស័យកាត់ដេរកម្ពុជានៅតែប្រឈមជាមួយដៃគូក្នុងតំបន់ ខណៈការនាំចេញឆមាសទី១កើនឡើង
ការនាំចេញផលិតផលកាត់ដេរសម្លៀកបំពាក់ និងស្បែកជើង ក្នុងរយៈពេល៦ខែ ឆ្នាំ២០១៨នេះ មានកំណើនប្រមាណ១១,១ភាគរយ ខ្ពស់ជាងឆមាសទី១ ឆ្នាំ២០១៧ ដែលមានត្រឹមតែ៧ភាគរយ។ នេះបើតាមរបាយការណ៍ឆមាសទី១របស់ធនាគារជាតិកម្ពុជា។
ចុះផ្សាយនៅថ្ងៃ៖
ស្តាប់ - ០១:៤៥
ទន្ទឹមនឹងកំណើននៃការនាំចេញផលិតផលសម្លៀកបំពាក់ និងស្បែកជើងទៅដល់៤ពាន់លានដុល្លារនៅឆមាសទី១ឆ្នាំ២០១៨ របាយការណ៍នេះ បានបញ្ជាក់ថាវិស័យឧហស្សាហកម្ម ជាពិសេសវិស័យកាត់ដេរសម្លៀកបំពាក់ និងស្បែកជើង បន្តមានបញ្ហាប្រឈមលើការរក្សាភាពប្រកួតប្រជែងជាមួយប្រទេសក្នុងតំបន់ ដែលមានវៀតណាម បង់ក្លាដែស និងមីយ៉ាន់ម៉ា។
បើតាមធនាគារជាតិកម្ពុជា បញ្ហាប្រឈមនោះ ក៏រួមមានការកើនឡើង យ៉ាងឆាប់រហ័សនៃប្រាក់ឈ្នួលអប្បបរមាក្នុងវិស័យកាត់ដេរនៅកម្ពុជា ដែលបានកើនឡើងពី១៥៣ដុល្លារអាមេរិក នៅឆ្នាំ២០១៧ ដល់១៧០ដុល្លារក្នុងមួយខែ ក្នុងឆ្នាំ២០១៨នេះ។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា (GMAC) បញ្ជាក់ការកើនឡើងនៃការនាំចេញនេះកើតឡើងទន្ទឹមនឹងការបញ្ជាទិញនៅលើទីផ្សារពិភពលោក ដែលមានការកើនឡើងដែរ។
លោកបន្ថែមថា បញ្ហាប្រឈមនៅតែមានដដែលនៅក្នុងវិស័យកាត់ដេរសម្លៀកបំពាក់ និងស្បែកជើង ដែលបញ្ហាទាំងនោះ គឺការកើនឡើងតម្លៃពលកម្ម។ លោកបញ្ជាក់ថាបញ្ហានេះ បានធ្វើឲ្យប៉ះពាល់ទៅដល់ការប្រកួតប្រជែងរបស់កម្ពុជាជាមួយនឹងប្រទេសក្នុងតំបន់។
ជុំវិញការព្រមានដកប្រព័ន្ធអនុគ្រោះពន្ធ(EBA)ដោយអឺរ៉ុប អគ្គលេខាធិការរងនៃសមាគមរោងចក្រកាត់ដេរនៅកម្ពុជាបានទទួលស្គាល់ថា EBA មានសារៈសំខាន់សម្រាប់ប្រទេសកម្ពុជាជាពិសេសសម្រាប់វិស័យកាត់ដេរ ប៉ុន្តែលោកគិតថានឹងមិនមានការដាក់ទណ្ឌកម្មណាមួយមកលើប្រទេសកម្ពុជានោះទេ។
គួរជម្រាបជូនថា អាមេរិក និងអឺរ៉ុបគឺ ជាទីផ្សារនាំចេញធំជាងគេរបស់កម្ពុជា ក្នុងវិស័យវាយនភណ្ឌកាត់ដេរសម្លៀកបំពាក់ និងស្បែកជើង។ របាយការណ៍ឆ្នាំ២០១៧របស់ក្រសួងការងារបង្ហាញថា កម្ពុជាបាននាំចេញផលិតផលវាយនភណ្ឌ សម្លៀកបំពាក់ និងស្បែកជើង ទៅកាន់ទីផ្សារអន្ដរជាតិប្រមាណ៧ពាន់៦រយលានដុល្លារសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ