សង្គមស៊ីវិល៤២រួមគ្នាអំពាវនាវឲ្យអាជ្ញាធរកម្ពុជាបង្កើនការប្រយុទ្ធប្រឆាំងនិទណ្ឌភាពនៃឧក្រិដ្ឋកម្មលើអ្នកកាសែត
ថ្ងៃទី០២ វិច្ឆិកានេះ គឺជាទិវាអន្តរជាតិបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន។ កាលពីម្សិលមិញ សង្គមស៊ីវិលចំនួន៤២ស្ថាប័នបានចេញសេចក្តីថ្លែងការណ៍រួមមួយ ដោយសម្តែងនូវការព្រួយបារម្ភពីបញ្ហានិទណ្ឌភាពឧក្រិដ្ឋកម្មលើអ្នកសារព័ត៌មាន។ ជាមួយគ្នានេះ ពួកគេក៏បានអំពាវនាវឲ្យអាជ្ញាធរកម្ពុជាបង្កើនការប្រយុទ្ធប្រឆាំងទៅនឹងបញ្ហានិទណ្ឌភាពនេះ នៅក្នុងប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ក្រុមអង្គការសង្គមស៊ីវិលចំនួន៤២ស្ថាប័ននេះ រួមមានជាអាទិ៍ អង្គការលើកលែងទោសអន្តរជាតិ មជ្ឈមណ្ឌលសិទ្ធិមនុស្សកម្ពុជា សមាគមអាដហុក អង្គការលីកាដូ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ សមាជិកសភាអាស៊ានដើម្បីសិទ្ធិមនុស្ស វេទិកាអាស៊ីដើម្បីសិទ្ធិមនុស្សនិងការអភិវឌ្ឍ បណ្តាញលទ្ធិប្រជាធិបតេយ្យអាស៊ី រួមទាំងអង្គការឃ្លាំមើលសិទ្ធិមនុស្សជាដើម។ អង្គការទាំងនេះ បានសម្តែងនូវការព្រួយបារម្ភយ៉ាងខ្លាំងចំពោះនិទណ្ឌភាពដែលបន្តរីករាលដាល ធ្វើឲ្យអ្នកប្រព្រឹត្តបទល្មើសទៅលើអ្នកសារព័ត៌មាន និងអ្នកការពារសិទ្ធិមនុស្សនៅក្នុងប្រទេសកម្ពុជា ពុំសូវត្រូវបានយកមកផ្តន្ទាទោស។ ដូច្នេះហើយ ពួកគេបានទទួចឲ្យអាជ្ញាធរកម្ពុជាចាត់វិធានការជាបន្ទាន់ ដើម្បីធានាឲ្យមានការស៊ើបអង្កេតប្រកបដោយប្រសិទ្ធភាព ឯករាជ្យភាព និងតម្លាភាព។
គួរកត់សម្គាល់ថា ចាប់តាំងពីឆ្នាំ១៩៩៤មក អ្នកសារព័ត៌មានចំនួន១៣នាក់ត្រូវបានសម្លាប់នៅក្នុងប្រទេសកម្ពុជា។ ជនរងគ្រោះទាំងអស់នេះ ត្រូវបានសម្លាប់ដោយសារតែការងាររបស់ពួកគេ។ នេះបើតាមការគូសបញ្ជាក់របស់ក្រុមអង្គការសង្គមស៊ីវិលទាំង៤២ស្ថាប័ន។ បើតាមក្រុមអង្គការសង្គមស៊ីវិល ១២នាក់នៃជនរងគ្រោះ គឺត្រូវបានគេសម្លាប់ក្នុងខណៈធ្វើសកម្មភាពរាយការណ៍ព័ត៌មាន ដែលបង្កជាហានិភ័យដោយផ្ទាល់ដល់បុគ្គលមានអំណាចនៅកម្ពុជា។ ក្នុងនោះ អ្នកសារព័ត៌មាន៥នាក់ជាអ្នកធ្វើការឲ្យកាសែតរិះគន់បក្សកាន់អំណាច ខណៈ៧នាក់ផ្សេងទៀតធ្វើការស៊ើបអង្កេតនិងរាយការណ៍ពីអំពើពុករលួយ ពាក់ព័ន្ធបុគ្គលជាន់ខ្ពស់ក្នុងជួររដ្ឋាភិបាល និងស្ថាប័នយោធាកម្ពុជា។
ប៉ុន្តែនៅក្នុងចំណោមអ្នកសារព័ត៌មានរងគ្រោះទាំងនេះ គឺ១១ករណីពុំមានជនប្រព្រឹត្តបទល្មើសណាម្នាក់ត្រូវបានកាត់ទោសនោះទេ ពោល គឺមានតែ២ករណីប៉ុណ្ណោះដែលជនល្មើសចំនួនពីរនាក់ត្រូវបានយកទៅកាត់ទោស។ ក្រុមអង្គការសង្គមស៊ីវិលបានថ្កោលទោសចំពោះបញ្ហានិទណ្ឌភាពដែលកើតមានចំពោះអ្នកសារព័ត៌មានទាំងនេះ។
ពួកគេក៏បានអំពាវនាវដល់អាជ្ញាធរកម្ពុជាឲ្យផ្តន្ទាទោសជនល្មើសនៃឧក្រិដ្ឋកម្មប្រព្រឹត្តមកលើអ្នកសារព័ត៌មានក៏ដូចជាអ្នកការពារសិទ្ធិមនុស្ស ដោយការស៊ើបអង្កេត និងកាត់ទោសដោយមានអត្ថន័យ ឯករាជ្យ និងតម្លាភាព ស្របទៅតាមបទដ្ឋានសិទ្ធិមនុស្សអន្តរជាតិ រួមទាំងកតិកាសញ្ញាអន្តរជាតិស្តីពីសិទ្ធិមនុស្ស និងសិទ្ធិនយោបាយជាដើម។ សម្រាប់ក្រុមអង្គការសង្គមស៊ីវិល នៅពេលដែលរដ្ឋាភិបាលខកខានក្នុងការស៊ើបអង្កេត និងដាក់ទណ្ឌកម្មចំពោះអំពើហិង្សាលើអ្នកសារព័ត៌មាន គឺជាសារបង្ហាញថា ឧក្រិដ្ឋកម្មប្រឆាំងអ្នកសារព័ត៌មាន គឺត្រូវបានអនុញ្ញាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ