អតីតបុគ្គលិកស្ថានទូតអាមេរិក ទាមទាររកយុត្តិធម៌បន្ទាប់ពីបញ្ឈប់ការងារអស់រយៈពេល៣ខែ
អតីតបុគ្គលិកស្ថានទូតអាមេរិកប្រចាំក្រុងភ្នំពេញនាព្រឹកនេះ បានប្រមូលផ្តុំគ្នាទាមទារឲ្យស្ថានទូតអាមេរិកផ្តល់យុត្តិធម៌ឲ្យពួកគេ បន្ទាប់ពីបណ្តេញពួកគេចេញពីការងារ ក្រោមការចោទប្រកាន់ថាបានចែកចាយរូបភាពអាសអាភាស។ ចំណែកអ្នកនាំពាក្យស្ថានទូតអាមេរិក បានបង្ហាញការស្វាគមន៍ចំពោះការធ្វើការតវ៉ា ដោយអហិង្សា។
ចុះផ្សាយនៅថ្ងៃ៖
អតីតបុគ្គលិកស្ថានទូតប្រមាណ២០នាក់ ដែលតំណាងឲ្យអតីតបុគ្គលិកស្ថានទូតអាមេរិក៣២នាក់ បានកាន់បដា ដែលមានរូបលោកនាយករដ្ឋមន្ត្រីហ៊ុន សែន លោកប្រធានាធិបតីអាមេរិក ដូណាល់ ត្រាំ និងទង់ជាតិអាមេរិកផង ឈរទល់មុខស្ថានទូតអាមេរិកក្បែរវត្តភ្នំ និងស្រែកទាមទារឲ្យស្ថានទូតអាមេរិកប្រចាំក្រុងភ្នំពេញ ដោះស្រាយ រកយុត្តិធម៌ឲ្យពួកគេ។ រកយុត្តិធម៌ បន្ទាប់ពីស្ថានទូតបានបណ្តេញពួកគេចេញពីការងារ កាលពីខែមីនាកន្លងទៅ។
ក្នុងការតវ៉ារកយុត្តិធម៌នេះ អតីតបុគ្គលិកស្ថានទូតអាមេរិក បានដាក់ញត្តិ ដែលមានខ្លឹមសារ ទាមទារឲ្យស្ថានទូតកែពាក្យពីការបណ្តេញចេញ មកជាការកាត់បន្ថយបុគ្គលិកវិញ, ទាមទារសំណង៦ខែទៅតាមច្បាប់កាត់បន្ថយបុគ្គលិក, ប្តឹងទារសំណងជំងឺចិត្តទៅលើការបង្ខូចកេរ្តិ៍ឈ្មោះ ដោយសារការចោទប្រកាន់របស់ស្ថានទូត។ ក្រៅពីនេះ ក៏មានការទាមទារឲ្យទូទាត់លុយមូលនិធិឧបត្ថម្ភ ដែលមិនបានទូទាត់រយៈពេល៣ខែ, និងទាមទារឲ្យសមាគមបុគ្គលិកខ្មែរមានសិទ្ធិចូលរួមដោះស្រាយបញ្ហាបញ្ឈប់បុគ្គលិកខ្មែរក្នុងស្ថានទូតអាមេរិក។
លោក ញឹម សោភ័ណ្ឌ អតីតបុគ្គលិកស្ថានទូតអាមេរិកបានថ្លែងប្រាប់វិទ្យុបារាំងអន្តរជាតិថា នៅព្រឹកនេះស្ថានទូតអាមេរិក បានទទួលយកញត្តិរបស់ពួកលោក ដើម្បីដោះស្រាយបញ្ហាហើយ។ លោកបន្ថែមថា កន្លងមកក្រុមអតីតបុគ្គលិកស្ថានទូតអាមេរិកប្រចាំកម្ពុជាបានដាក់លិខិតទាមទារជាបន្តបន្ទាប់ ប៉ុន្តែមិនមានការឆ្លើយតបណាមួយពីស្ថានទូតទេ រហូតធ្វើឲ្យពួកលោកប្រមូលគ្នាមកតវ៉ាទាមទារនៅខាងមុខស្ថានទូតនាថ្ងៃនេះ។
លោក ញឹម សោភ័ណ្ឌ បន្ថែមថា ការចោទប្រកាន់ពួកលោកថាបានមើល ឬចែកចាយរូបភាពអាសអាភាស ហាក់មិនត្រឹមត្រូវទេ និងធ្វើឲ្យលោកឈឺចាប់ ព្រោះស្ថានទូតមិនបានបង្ហាញប្រាប់លោកថារូបភាពណាជារូបអាសអាភាស នៅពេលដែលស្ថានទូតបានហៅលោកទៅសួរនាំ។
លោក ដាវីត ចូសារ (David Josar) អ្នកនាំពាក្យស្ថានទូតអាមេរិកប្រចាំក្រុងភ្នំពេញ បានបញ្ជាក់ប្រាប់វិទ្យុបារាំងអន្តរជាតិ តាមរយៈសារអេឡិចត្រូនិចថា ស្ថានទូតអាមេរិកគោរពសិទ្ធិអ្នកគ្រប់គ្នា ដែលធ្វើការតវ៉ាដោយសន្តិវិធី រួមទាំងការតវ៉ារបស់អតីតបុគ្គលិកស្ថានទូតនាពេលនេះផង។ លោកបន្ថែមថា រដ្ឋាភិបាលអាមេរិកចាត់ទុកករណីពាក់ព័ន្ធនឹងរូបអាសអាភាសរបស់កុមារ និងការកេងប្រវ័ញ្ចលើកុមារ គឺជារឿងដែលធ្ងន់ធ្ងរបំផុត។
សូមជម្រាបជូនថា អតីតបុគ្គលិកស្ថានទូតអាមេរិក៣២នាក់ ត្រូវបានបញ្ឈប់ពីការងារកាលពីថ្ងៃទី២៣ ខែមីនា ឆ្នាំ២០១៨ ដោយរងការចោទប្រកាន់ថាបានចែកចាយរូបភាពអាសអាភាសរបស់ក្មេងស្រីនៅក្នុងសារនៃប្រព័ន្ធទំនាក់ទំនងសង្គមហ្វេសប៊ុក(Facebook Messenger chat group)។ បុគ្គលិក ដែលត្រូវបានស្ថានទូតអាមេរិកប្រចាំកម្ពុជាបណ្តេញចេញ ខ្លះបានធ្វើការងាររយៈពេល២០ឆ្នាំ និងខ្លះទៀតបានធ្វើការងារជាង១០ឆ្នាំ ឬ៥ឆ្នាំ ហើយពួកគេភាគច្រើនគឺជាជនជាតិខ្មែរ និងបំរើការងារផ្នែកសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ