ពន្ធនាគារបដិសេធសំណើអតីតតំណាងរាស្ត្របក្សប្រឆាំង ដែលសុំជួបអ្នកជាប់ឃុំចំនួន១២នាក់
សំណើរបស់លោក អ៊ូ ចាន់រ័ត្ន អតីតតំណាងរាស្ត្រ ដែលស្នើសុំជួបអតីតសកម្មជន និងមន្ត្រីជាន់ខ្ពស់គណបក្សសង្គ្រោះជាតិចំនួន១២នាក់នៅពន្ធនាគារ ត្រូវបានអគ្គនាយកដ្ឋានពន្ធនាគារនៃក្រសួងមហាផ្ទៃបដិសេធ។ អគ្គនាយកដ្ឋានពន្ធនាគារ គូសបញ្ជាក់ប្រាប់វិទ្យុបារាំងអន្ដរជាតិថា ការបដិសេធនេះ ធ្វើឡើងដោយសារតែនៅក្នុងលិខិតផ្ញើជូនពន្ធនាគារ លោក អ៊ូ ចាន់រ័ត្ន បំពានច្បាប់ តាមរយៈការចាត់ទុកខ្លួនឯងជាអ្នកតំណាងរាស្ត្រ។
ចុះផ្សាយនៅថ្ងៃ៖
ស្តាប់ - ០២:២៦
លោក នុត សាវនា អ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃបានថ្លែងប្រាប់វិទ្យុបារាំងអន្តរជាតិថា អតីតតំណាងរាស្ត្រគណបក្សសង្គ្រោះជាតិគួរតែមើលខ្លឹមសារនៃលិខិតដើមរបស់ខ្លួនឯងឡើងវិញ មុននឹងសម្រេចដាក់មកអគ្គនាយកដ្ឋានពន្ធនាគារ ដើម្បីស្នើសុំជួបអ្នកជាប់ឃុំ។ នៅក្នុងលិខិតនោះ លោក អ៊ូ ចាន់រ័ត្ន ហៅខ្លួនឯងថាជាអ្នកតំណាងរាស្ត្រ។ ប៉ុន្តែលោក នុត សាវនា ប្រតិកម្មតបវិញ ដោយបញ្ជាក់ថា លោក អ៊ូ ចាន់រ័ត្ន លែងជាអ្នកតំណាងរាស្ត្រទៅហើយ ក្រោយការរំលាយគណបក្សសង្គ្រោះជាតិ។ អ្នកនាំពាក្យអគ្គនាយកដ្ឋានពន្ធនាគាររូបនេះ បានស្នើឲ្យអតីតតំណាងរាស្ត្រគណបក្សសង្គ្រោះជាតិ ធ្វើលិខិតថ្មីឡើងវិញដើម្បីឲ្យពន្ធនាគារសម្រេចចិត្តជាថ្មី។
ឆ្លើយតបនឹងប្រតិកម្មនេះ លោក អ៊ូ ចាន់រ័ត្ន អតីតតំណាងរាស្ត្រគណបក្សសង្គ្រោះជាតិ និងជាម្ចាស់សំណើ បានបង្ហាញឆន្ទៈសរសេរលិខិតជាថ្មី ស្របតាមចង់បានរបស់អគ្គនាយកដ្ឋានពន្ធនាគារ ដើម្បីបានជួបអ្នកជាប់ឃុំចំនួន១២នាក់នោះ។ អ្នកជាប់ឃុំទាំង១២នាក់នោះរួមមាន៖ លោក អ៊ុំ សំអាន អតីតតំណាងរាស្ត្រ លោក មាជ សុវណ្ណរ៉ា អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ រួមនឹងអ្នកឯទៀត។
ជាថ្មីម្ដងទៀត លោក អ៊ូ ចាន់រ័ត្ន ទទូចឲ្យខាងពន្ធនាគារអនុគ្រោះ ព្រោះពួកលោកខានជួបសួរសុខទុកគ្នាយូរមកហើយ។ ពោលគឺចាប់តាំងពីមានករណីអ្នកកាសែតចូលទៅសួរសុខទុក្ខអ្នកជាប់ឃុំជាមួយអ្នកតំណាងរាស្ត្រ កាលពីខែមេសា ឆ្នាំ២០១៧មកម្ល៉េះ។ គួរកត់សម្គាល់ថា សំណើរបស់លោក អ៊ូ ចាន់រ័ត្ន នេះ ធ្វើឡើងជួនចំពេលដែលលោកនាយករដ្ឋមន្ត្រី ហ៊ុន សែន ប្រកាសមិនលើកលែងទោសដល់អតីតមន្ត្រីបក្សប្រឆាំង។ បើតាមលោកនាយករដ្ឋមន្ត្រី ហ៊ុន សែន ការសម្រេចរបស់លោកដូច្នេះ ដោយសារតែមានការបញ្ឆេះពីក្រុមប្រឆាំង ឲ្យពលរដ្ឋខ្មែររស់នៅប្រទេសអូស្ត្រាលី ដុតទីងមោងប្រឆាំងរូបលោក។
សូមរម្លឹកផងដែរថា លោកមាជ សុវណ្ណារ៉ា និងសកម្មជនគណបក្សប្រឆាំងចំនួន១០នាក់ទៀត ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគារក្នុងម្នាក់ៗពី៧ទៅ២០ឆ្នាំ ពីបទដឹកនាំ និងចូលរួមក្នុងហេតុការណ៍រំដោះទីលានប្រជាធិបតេយ្យ នៅខែកក្កដាឆ្នាំ២០១៤។ ចំណែកលោក អ៊ុំ សំអាន ត្រូវបានសមត្ថកិច្ច ចាប់ខ្លួននៅលើទឹកដីខេត្តសៀមរាប កាលពីថ្ងៃទី១០ ខែមេសា ឆ្នាំ២០១៦ ក្រោមបទចោទ ញុះញង់ឲ្យប្រព្រឹត្តបទឧក្រិដ្ឋជាអាដិ៍ និងបទញុះញង់ឲ្យមានការរើសអើង បន្ទាប់ពីលោកបានបង្ហោះសារផែនទីក្លែងក្លាយស្ដីពីព្រំដែនកម្ពុជា វៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ