ប្រមុខការទូតកម្ពុជាចាត់ទុក សន្តិភាព ជាអាទិភាព តែអ្នករាយការណ៍ពិសេស អសប យល់ផ្សេង
បើទោះបីជាលោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិស្ដីពីស្ថានភាពសិទ្ធិមនុស្សនៅកម្ពុជា បានបញ្ចប់ដំណើរទស្សនកិច្ចលើកទី៥របស់លោកស្រី និងបានចាកចេញពីកម្ពុជាហើយក៏ដោយ ក៏ការជជែកវែកញែកពីបញ្ហាសិទ្ធិមនុស្សនៅតែបន្ត។ រវាងសន្តិភាព ស្ថេរភាព និងការអភិវឌ្ឍ និងសិទ្ធិមនុស្ស ថាតើមួយណាមានអាទិភាពសំខាន់ជាងគេ? ប្រមុខការទូតកម្ពុជា តាមរយៈសេចក្ដីថ្លែងការណ៍មួយ ចុះថ្ងៃទី១៥ខែមីនានេះ គូសបញ្ជាក់ថា សន្តិភាព ស្ថេរភាព និងការអភិវឌ្ឍ ជាលក្ខខណ្ឌចាំបាច់មិនអាចខ្វះបានសម្រាប់ការលើកស្ទួយសិទ្ធិមនុស្ស។ ប៉ុន្តែលោកស្រី រ៉ូណា ស្មីត អ្នករាយការណ៍ពិសេសនៃអង្គការសហប្រជាជាតិស្ដីពីសិទ្ធិមនុស្សនៅកម្ពុជា យល់ឃើញផ្សេង។
ចុះផ្សាយនៅថ្ងៃ៖
ស្តាប់ - ០២:០៣
ប្រមុខការទូតកម្ពុជា លោក ប្រាក់ សុខុន ចាត់ទុកសន្តិភាព ស្ថិរភាព និងការអភិវឌ្ឍ ជាអាទិភាព ខណៈលោកស្រី រ៉ូណា ស្មីត អ្នករាយការណ៍ពិសេសនៃអង្គការសហប្រជាជាតិស្ដីពីសិទ្ធិមនុស្សនៅកម្ពុជា យល់ឃើញថា បញ្ហាសិទ្ធិមនុស្ស គួរតែជាអាទិភាពទីមួយ។
សម្រាប់លោកស្រី រ៉ូណា ស្មីត សិទ្ធិមនុស្សគឺចាំបាច់សំខាន់ខ្លាំងណាស់សម្រាប់សន្តិភាព ស្ថេរភាព និងការអភិវឌ្ឍដ៏ស្ថិតស្ថេរជានិរន្ត៍។ សិទ្ធិមនុស្សមិនអាចត្រូវបានគោរពដោយអន្លើៗ ឬមើលរំលងទេ ហើយសិទ្ធិមនុស្សក៏មិនត្រូវលះបង់ដែរ។ អ្នករាយការណ៍ពិសេសអង្គការសហប្រជាជាតិរូបនេះបញ្ជាក់បន្ថែមថា សន្តិភាពដែលខ្វះយុត្តិធម៌ គឺមិនស្ថិតស្ថេរទេ ហើយការអភិវឌ្ឍដែលខ្វះសេរីភាព គឺជាការបោះបង់ប្រជាជនចោល។
លោក ប្រាក់ សុខុន ប្រមុខការទូតកម្ពុជា ដែលយល់ផ្សេង បានសង្កត់ធ្ងន់ថា សន្តិភាព ស្ថេរភាព និងការអភិវឌ្ឍទៅវិញទេ ដែលជាលក្ខខណ្ឌមិនអាចខ្វះបានសម្រាប់ការលើកស្ទួយសិទ្ធិមនុស្ស។ ហើយសន្តិភាព ស្ថេរភាព និងការអភិវឌ្ឍនេះ គឺជាការទទួលខុសត្រូវរបស់រាជរដ្ឋាភិបាល។ លោករដ្ឋមន្ដ្រី ប្រាក់ សុខុន ថ្លែងបន្តថា អ្វីដែលប្រជាជនចង់បាន គឺសន្តិភាព ស្ថេរភាព និងការអភិវឌ្ឍ ពុំមែនការផ្លាស់ប្ដូររបបតាមរយៈការធ្វើបដិវត្តពណ៌ឡើយ។ បន្ថែមលើសពីនេះ លោក ប្រាក់ សុខុន បានគូសបញ្ជាក់អំពីភាពចាំបាច់នៃការគោរពឯករាជ្យ និងអធិបតេយ្យភាពរបស់កម្ពុជា រួមទាំងអធិបតេយ្យភាពរបស់ស្ថាប័ននីតិបញ្ញត្តិ ព្រមទាំងតុលាការ។
គួរជម្រាបជូនថា ការជជែកវែកញែករវាងប្រមុខការទូតកម្ពុជា និងលោកស្រី រ៉ូណា ស្មីត ស្ដីពីសន្តិភាព ស្ថិរភាព ការអភិវឌ្ឍ និងសិទ្ធិមនុស្សនេះ ធ្វើឡើងនៅក្នុងជំនួបពិភាក្សាការងារនៅថ្ងៃ ទី១៤ខែមីនា មុនពេលលោកស្រី រ៉ូណា ស្មីត បិទបញ្ចប់ដំណើរទស្សនកិច្ចលើកទី៥របស់លោកស្រី នៅកម្ពុជានាពេលរសៀលថ្ងៃដដែល។ តាមរយៈដំណើរទស្សនកិច្ចនេះ លោកស្រី រ៉ូណា ស្មីត បានសម្ដែងក្ដីកង្វល់ជុំវិញស្ថានភាពសិទ្ធិមនុស្សនៅកម្ពុជា ដែលលោកស្រីចាត់ទុកថា បានដើរដល់ផ្លូវបំបែក។ លោកស្រីបានអំពាវនាវឲ្យរដ្ឋាភិបាលកម្ពុជា វិលមកដើរលើមាគ៌ាសិទ្ធិមនុស្សឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ