ប្រព័ន្ធ FMIS ត្រូវបានបំពាក់លើក្រសួងចំនួន១០ ខណៈក្រសួង១០ទៀត នឹងត្រូវដាក់ឲ្យសាកល្បង
ប្រព័ន្ធបច្ចេកវិទ្យាព័ត៌មាន សម្រាប់គ្រប់គ្រងហិរញ្ញវត្ថុសាធារណៈ ហៅកាត់ថា (FMIS) ត្រូវបានប្រកាសដាក់ឲ្យប្រើជាផ្លូវការហើយនៅថ្ងៃទី២៦ខែមករានេះ នៅតាមក្រសួងសំខាន់ៗចំនួន១០។ ការដាក់ឲ្យមានប្រព័ន្ធបច្ចេកវិទ្យាព័ត៌មាន សម្រាប់គ្រប់គ្រងហិរញ្ញវត្ថុសាធារណៈនេះ បានប្រព្រឹត្តទៅនៅសណ្ឋាគារសូហ្វីតែល ដោយមានការពន្យល់ពីតំណាងក្រសួងហិរញ្ញវត្ថុ ពីសារៈសំខាន់នៃការដាក់ឲ្យមានប្រព័ន្ធនេះ និងមានការគាំទ្រពីសំណាក់ឯកអគ្គរដ្ឋទូតសហភាពអឺរ៉ុប ប្រចាំនៅកម្ពុជាផងដែរ។
ចុះផ្សាយនៅថ្ងៃ៖
ស្តាប់ - ០២:១៩
ក្រសួងទាំង១០ដែលត្រូវបានដាក់បញ្ជូលប្រព័ន្ធបច្ចេកវិទ្យាព័ត៌មាន សម្រាប់គ្រប់គ្រងហិរញ្ញវត្ថុសាធារណៈនេះ រួមមាន ក្រសួងហិរញ្ញវត្ថុ ក្រសួងកសិកម្ម ក្រសួងសុខាភិបាល ក្រសួងអប់រំ ក្រសួងការងារ ក្រសួងបរិស្ថាន ក្រសួងប្រៃសនីយ៍ ក្រសួងមុខងារសាធារណៈ ក្រសួងឧស្សាហកម្មនិងសិប្បកម្ម និងក្រសួងកិច្ចការនារី។
រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ លោក ហ៊ាន សាហ៊ីប បានថ្លែងនៅចំពោះមុខអ្នកចូលរួមប្រមាណ៤០០នាក់ថា ការអនុវត្តគម្រោង ប្រព័ន្ធបច្ចេកវិទ្យាព័ត៌មាន សម្រាប់គ្រប់គ្រងហិរញ្ញវត្ថុសាធារណៈនេះ នឹងដើរតួជាកញ្ចក់ឆ្លុះបញ្ចាំងអំពីលទ្ធភាពនិងតម្រូវការជាក់ស្តែង ក្នុងការកែលម្អជាជំហានៗ នូវនីតិវិធីអនុវត្តការងារហិរញ្ញវត្ថុ ដែលមានភាពស្មុគ្រស្មាញនិងមិនផ្តល់តម្លៃបន្ថែម ក្នុងគោលដៅពង្រឹងវិន័យថវិកា។ លោករដ្ឋលេខាធិការបន្ថែមថា ប្រព័ន្ធនេះនឹងជួយកាត់បន្ថយពេលវេលា និងធនធានមិនចាំបាច់និងជួយសម្រាលបន្ទុកការងាររបស់មន្ត្រីអនុវត្តថវិកា និងកិច្ចការហិរញ្ញវត្ថុ។
ជាការកត់សម្គាល់ប្រព័ន្ធ FMIS នេះ គឺជាឧបករណ៍មួយដ៏សំខាន់ក្នុងការគាំទ្រកម្មវិធីកែទម្រង់ ការគ្រប់គ្រងហិរញ្ញវត្ថុសាធារណៈនៅកម្ពុជា ដែលត្រូវបានវាយតម្លៃខ្ពស់ដោយក្រសួងហិរញ្ញវត្ថុ និងដៃគូអភិវឌ្ឍនានាដូចជា សហភាពអឺរ៉ុប ធនាគារពិភពលោក មូលនិធិរូបិយវត្ថុអន្តរជាតិជាដើមថាជាឆ្អឹងខ្នងមិនអាចខ្វះបាន ក្នុងការងារគ្រប់គ្រងហិរញ្ញវត្ថុសាធារណៈ ក្នុងបរិការណ៍ សេដ្ឋកិច្ចឆ្ពោះទៅមុខ ឥតឈប់ឈររបស់កម្ពុជា។
ជាមួយគ្នានេះ លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា បានចាត់ទុកថាការដាក់ឲ្យប្រើប្រព័ន្ធ FMIS នេះ គឺជាចំណុចវិជ្ជមានមួយដែលរួមចំណែក ជួយកាត់បន្ថយអំពើពុករលួយ លើកកំពស់ប្រសិទ្ធភាពក្នុងការប្រើប្រាស់ធនធានថវិការដ្ឋ លុបបំបាត់ការិយាធិបតេយ្យជាដើម។
សូមបញ្ជាក់ថា ក្រៅពីប្រកាសដាក់ឲ្យប្រើប្រាស់ជាផ្លូវការចំពោះក្រសួងចំនួន១០នាពេលនេះ ក្រសួងហិរញ្ញវត្ថុក៏បានពង្រីកការប្រើប្រាស់ប្រព័ន្ធបច្ចេកវិទ្យា FMIS នេះទៅគ្រប់មន្ទីរហិរញ្ញវត្ថុ ទាំង២៥ខេត្ត-រាជធានី និងដាក់ឲ្យសាកល្បងដល់ក្រសួងចំនួន១០ផ្សេងទៀត នៅក្នុងឆ្នាំ២០១៨នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ