អាជ្ញាធរបន្តអំពាវនាវឲ្យពលរដ្ឋនៅខេត្តភាគពាយព្យប្រុងប្រយ័ត្នចំពោះគ្រោះទឹកជំនន់
គណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃនេះ បានអំពាវនាវឲ្យប្រជាពលរដ្ឋនៅភាគពាយព្យនៃប្រទេសកម្ពុជា ពិសេសពលរដ្ឋនៅខេត្តបន្ទាយមានជ័យ ឲ្យបង្កើនការប្រុងប្រយ័ត្នខ្ពស់ ចំពោះការហក់ឡើងនៃជំនន់ទឹកភ្លៀង។ ការប្រកាសយ៉ាងដូច្នេះធ្វើឡើង ក្រោយជំនន់ទឹកភ្លៀង កាលពីយប់ថ្ងៃទី២ ឈានចូលថ្ងៃទី ៣ ខែតុលា ជន់លិចផ្ទះប្រជាពលរដ្ឋជាង ១៣៨២ ខ្នង នៅស្រុកម៉ាឡៃ ខេត្តបន្ទាយមានជ័យ និងបង្កឲ្យខូចខាតដំណាំមួយចំនួនផង។
ចុះផ្សាយនៅថ្ងៃ៖
ស្តាប់ - ០១:២៧
បើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ភ្លៀងធ្លាក់ជាប់ៗគ្នា រយៈពេលប៉ុន្មានថ្ងៃចុងក្រោយនៅក្របខណ្ឌទូទាំងប្រទេសកម្ពុជា បានធ្វើឲ្យប៉ះពាល់ខេត្តជាច្រើន។ ក៏បុន្តែនៅក្នុងនោះមាន ឃុំចំនួន ៥ស្ថិតក្នុងស្រុកម៉ាឡៃ ខេត្តបន្ទាយមានជ័យ បានរងផលប៉ះពាល់ខ្លាំងជាងគេ រហូតដល់មានការជម្លៀសប្រជាពលរដ្ឋមួយចំនួនចេញពីលំនៅដ្ឋាន និងសត្វចិញ្ចឹមមួយចំនួន ដើម្បីទៅទីទួលសុវត្ថិភាព ពីសំណាក់អាជ្ញាធរផង។ នេះបើតាម លោក កែវ វី ប្រធានក្រុមអ្នកនាំពាក្យនៃគណៈកម្មាធិការជាតិគ្រប់គ្រងគ្រោះមហន្តរាយ។
យ៉ាងណាក៏ដោយ លោក កែវ វី បន្តថា រហូតមកទល់ពេលនេះ ទឹកជំនន់បានចាប់ផ្តើមស្រកជាបណ្តើរៗហើយ ហើយប្រជាពលរដ្ឋក៏បានត្រឡប់ទៅកាន់លំនៅដ្ឋានរបស់ខ្លួនៗជាបន្តបន្ទាប់ដែរ។ ក៏ប៉ុន្តែ អ្នកនាំពាក្យគណៈកម្មាធិការជាត់គ្រប់គ្រងគ្រោះមហន្តរាយ បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្នខ្ពស់ចំពោះបញ្ហាសុខភាព នៅពេលត្រឡប់ទៅកាន់លំនៅដ្ឋាន។
គណៈកម្មាធិការជាតិគ្រប់គ្រងគ្រោះមហន្តរាយ ឲ្យដឹងថាទៀតថា ជំនន់ទឹកភ្លៀងនឹងនៅតែបន្តកើតឡើជាថ្មីម្តងទៀត ពិសេសនៅតំបន់ភាគពាយ័ព្យនៃប្រទេសកម្ពុជា ដោយសារតែប្រទេសកម្ពុជា កំពុងរងប្រព័ន្ធសម្ពាធទាប។ បើតាមការព្យាករណ៍របស់ក្រសួងធនធានទឹក និងឧតុនិយម នៅយប់ថ្ងៃទី ៦ ខែតុលា នឹងមានសម្ពាធថ្មីមួយ ធ្វើដំណើរមកកាន់ប្រទេសវៀតណាមភាគកណ្តាល រួចបន្តរំកិលខ្លួនមកស្ថិតនៅលើប្រទេសកម្ពុជា។ ចំណែកនៅថ្ងៃទី ៩ ខែតុលា នឹងមានសម្ពាធទាបសកម្មមួយកើតឡើងនៅក្នុងសមុទ្រចិនខាងត្បូង ដែលធ្វើឲ្យភ្លៀងបន្តធ្លាក់រាយប៉ាយក្នុងក្របខណ្ឌទូទាំងប្រទេសដដែល ចាប់ពីថ្ងៃទី៧តុលាតទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ