កម្ពុជាដុតកម្ទេចគ្រឿងញៀនជាង២តោន ក្នុងឱកាសទិវាប្រឆាំងគ្រឿងញៀនអន្ដរជាតិ២៦មិថុនា
ក្នុងឱកាសទិវាប្រឆាំងគ្រឿងញៀនអន្ដរជាតិ អាជ្ញាធរកម្ពុជា នាព្រឹកថ្ងៃទី២៦មិថុនានេះ បានដុតកម្ទេចគ្រឿងញៀនជាច្រើនប្រភេទ ចំនួនជាង២តោន។ ពិធីដុតកម្ទេចគ្រឿងញៀននេះ ធ្វើឡើងក្រោមអធិបតីភាពលោក ស ខេង រដ្ឋមន្ដ្រីក្រសួងមហាផ្ទៃ នៅមជ្ឈមណ្ឌលកោះពេជ្រ រាជធានីភ្នំពេញ។ គួរកត់សម្គាល់ថា ការជួញដូរនិងប្រើប្រាស់គ្រឿងញៀន នៅតែជាបញ្ហាប្រឈមសម្រាប់កម្ពុជា។ បច្ចុប្បន្ននេះ គ្រឿងញៀនមិនត្រឹមតែមានវត្តមាននៅតាមទីក្រុងទេ ប៉ុន្តែវាបានជ្រាបចូលទៅដល់គ្រប់ច្រកល្ហកនៃទីជនបទស្រុកស្រែចម្ការថែមទៀត។ អ្នកជំនាញបានព្រមានថា បញ្ហាគ្រឿងញៀននេះ អាចក្លាយទៅជាសង្គ្រាមថ្មីមួយទៀតសម្រាប់កម្ពុជា ប្រសិនបើគ្មានវិធានការការពារទប់ស្កាត់ឲ្យបានម៉ត់ចត់ទេនោះ។
ចុះផ្សាយនៅថ្ងៃ៖
ស្តាប់ - ០២:២៤
នៅដើមឆ្នាំ២០១៩នេះ ព័ត៌មានអំពីការបង្ក្រាបគ្រឿងញៀន ហាក់មានសន្ទុះកើនឡើងគួរឲ្យកត់សម្គាល់។ របាយការណ៍របស់អគ្គស្នងការនគរបាលជាតិបានឲ្យដឹងថា នៅក្នុងឆមាសទី១នៃឆ្នាំ២០១៩នេះ អាជ្ញាធរបង្ក្រាបបានបទល្មើសគ្រឿងញៀនបានជិត៤ពាន់ករណី ឃាត់ខ្លួនអ្នកពាក់ព័ន្ធបានចំនួនជាង៨ពាន់៣រយនាក់។ ចំណែកគ្រឿងញៀនដែលរឹបអូសបានរួមមាន មេតំហ្វេតាមីន ខេតាមីន ហេរ៉ូអ៊ីន កញ្ឆា និងម្សៅសង្ស័យគ្រឿងញៀនសរុបទាំងអស់ប្រមាណ ៣៤០គីឡូក្រាម។
សន្ទុះកើនឡើងនៃការបង្ក្រាបគ្រឿងញៀននៅកម្ពុជា ត្រូវបានមតិមួយចំនួនអបអរសាទរ។ ប៉ុន្តែសូមកុំភ្លេចថា សន្ទុះកើនឡើងនេះ ក៏អាចឆ្លុះបញ្ចាំងឲ្យឃើញថា ការជួញដូរនិងការប្រើប្រាស់គ្រឿងញៀននៅកម្ពុជាកំពុងតែកើនឡើងដូចគ្នាដែរ។
សព្វថ្ងៃនេះ ការជួញដូរនិងប្រើប្រាស់គ្រឿងញៀន មិនមែនមានតែនៅក្នុងទីក្រុងធំៗប៉ុណ្ណោះទេ ប៉ុន្តែវាបានជ្រាបចូលទៅដល់គ្រប់ច្រកល្ហកនៃទីជនបទ ស្រុកស្រែចម្ការថែមទៀត។ យុវជននៅតាមទីជនបទកាន់តែច្រើនឡើងៗ បានធ្លាក់ខ្លួនប្រើប្រាស់គ្រឿងញៀន បើទោះបីជាអាជ្ញាធរបានដាក់ចេញវិធានការបង្ការ ទប់ស្កាត់ និងបង្ក្រាបជាបន្តបន្ទាប់ក៏ដោយ។
លោក ម៉ក់ ជីតូ អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន បានអះអាងពីការប្ដេជ្ញាចិត្តរបស់អាជ្ញាធរក្នុងការបង្ក្រាបករណីប្រើប្រាស់និងជួញដូរគ្រឿងញៀនគ្រប់ករណី ទាំងករណីតូចៗនៅតាមបណ្ដាខេត្តនិងទីជនបទ ទាំងករណីជួញដូរធំៗនៅក្នុងរាជធានីភ្នំពេញ។
ប៉ុន្តែយ៉ាងណាក៏ដោយ អ្នកតាមដានបញ្ហាសង្គមយល់ឃើញថា ចំពោះមុខបញ្ហាគ្រឿងញៀនដែលរីកធំធាត់ឡើងដូចសព្វថ្ងៃនេះ វិធានការជាក់លាក់ដើម្បីដោះស្រាយគួរតែត្រូវបានដាក់ចេញជាបន្ទាន់ និងជាដាច់ខាត ជាពិសេសការរឹតបន្តឹងសកម្មភាពបង្ក្រាបគ្រឿងញៀននៅតាមទីជនបទ និងច្រកនាំចេញនាំចូលនៃប្រទេសកម្ពុជា។ ការស៊ើបអង្កេតប្រមូលភស្តុតាងដើម្បីឈានទៅចាប់មេខ្លោងជួញដូរគ្រឿងញៀន ក៏ជារឿងចាំបាច់ ដែលគួរតែត្រូវបានលើកទឹកចិត្តផងដែរ។ សម្រាប់អ្នកតាមដានបញ្ហាសង្គម ការបណ្ដែតបណ្ដោយឲ្យបញ្ហាគ្រឿងញៀននេះ រីកធំធាត់ដោយគ្មានការការពារទប់ស្កាត់ឲ្យបានម៉ត់ចត់ វាអាចបង្កើតជាសង្គ្រាមថ្មីមួយទៀត សម្រាប់ប្រទេសកម្ពុជាផងក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ