កម្ពុជាចាប់ដៃជាមួយជប៉ុនត្រៀមអនុវត្តគម្រោងវាយតម្លៃហេតុប៉ះពាល់បរិស្ថាន
នៅថ្ងៃទី៦មីនាស្អែកនេះ ក្រសួងបរិស្ថាននិងអង្គការជប៉ុន JICA នឹងចុះកិច្ចព្រមព្រៀងរួមគ្នាមួយលើការអនុវត្តគម្រោង នៃការវាយតម្លៃហេតុប៉ះពាល់បរិស្ថាន និងការត្រួតពិនិត្យការបំពុលបរិស្ថាននៅទីស្ដីការក្រសួងបរិស្ថាន។ គម្រោងនេះគឺសំដៅធ្វើយ៉ាងណា ត្រួតពិនិត្យផលប៉ះពាល់បរិស្ថានិងបំពុលបរិស្ថានជាមុនសិន ទើបទទួលបានការវិនិយោគនានាតាមក្រោយ។ គម្រោងនៃការវាយតម្លៃហេតុប៉ះពាល់បិរស្ថាន និងការត្រួតពិនិត្យការបំពុលបរិស្ថាននឹងដាក់ឲ្យដំណើរការជាផ្លូវការនៅពាក់កណ្ដាលឆ្នាំ២០១៧នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
លោក សៅ សុភាព អ្នកនាំពាក្យក្រសួងបរិស្ថានអះអាងថា ការវាយតម្លៃហេតុប៉ះពាល់បរិស្ថានគឺត្រូវមានការចូលរួមពីវិស័យឯកជន អង្គការសង្គមស៊ីវិល និង រដ្ឋាភិបាល។ ហើយគម្រោងនេះសំដៅធ្វើយ៉ាងណា សិក្សាពីផលប៉ះពាល់ផ្នែកបរិស្ថានជាមុនសិនទើបទទួលបានការវិនិយោគ។ ការវិនិយោគដែលរួមមានៈ ការផ្ដល់ដីសម្បទានសេដ្ឋកិច្ច ការដាំដុះដំណាំកសិឧស្សាហកម្ម ឬ ការវិនិយោគគម្រោងនៃការអភិវឌ្ឍរីសត ឬរមណីយដ្ឋាន និង ការអភិវឌ្ឍទៅជាតំបន់ទេសចរណ៍ធម្មជាតិជាដើម។
បន្ថែមពីលើនេះទៀត ការស្ថាបនាផ្លូវ ស្ពានថ្នល់ រោងចក្រ សហគ្រាសជាដើម ក៏ត្រូវឆ្លងកាត់ការត្រួតពិនិត្យការវាយហេតុប៉ះពាល់បរិស្ថានដែរ។ ហើយដោយឡែកចំពោះការត្រួតពិនិត្យការបំពុលបរិស្ថានវិញ ផ្ដោតទៅលើការបំពុលទឹក ដី ខ្យល់ និងសំឡេងជាដើម។ នេះមានន័យថា រាល់រោងចក្រសហគ្រាសដែលបានបញ្ចេញសំណល់រឹងឬក៏រ៉ាវនោះគឺកម្ពុជាចាំបាច់ត្រូវមានមន្រ្តីជំនាញចុះទៅស្រាវជ្រាវបញ្ហាទាំងនេះតាមរយៈការបណ្ដុះបណ្ដាលសមត្ថភាពពីប្រទេសជប៉ុន។
តែយ៉ាងណាក៏ដោយលោក សៅ សុភាព បានគូសបញ្ជាក់ថា ការត្រៀមអនុវត្តគម្រោង នៃការវាយតម្លៃហេតុប៉ះពាល់បរិស្ថាន និងការត្រួតពិនិត្យការបំពុលបរិស្ថាននេះ មិនមែនទើបតែចាប់ផ្ដើមអនុវត្តនៅពេលនេះទេ ពោលគឺគម្រោងនេះមានរួចទៅហើយដោយការអនុវត្តពីមុនផ្អែកតាមអនុក្រឹត្យរបស់រដ្ឋាភិបាល។
ហើយចំពោះកិច្ចសហការជាមួយជប៉ុនដើម្បីឲ្យប្រទេសមួយនេះ ជួយអភិវឌ្ឍសមត្ថភាពរបស់មន្ត្រីឲ្យមានជំនាញក្នុងការចុះវាយតម្លៃទៅលើហេតុប៉ះពាល់បរិស្ថាន។ បើតាមលោក សៅ សុភាព គម្រោង នៃការវាយតម្លៃហេតុប៉ះពាល់បរិស្ថាន និងការត្រួតពិនិត្យការបំពុលបរិស្ថាន ជាការរត់ឲ្យទាន់និន្នាការនៃការអភិវឌ្ឍ។
លោក តឹក វណ្ណរ៉ា នាយកប្រតិបត្តិនៃវេទិកាអង្គការមិនមែនរដ្ឋាភិបាលស្ដីពីកម្ពុជាបានចាត់ទុកជារឿងមួយដ៏ល្អ ដែលជប៉ុនជួយកសាងសមត្ថភាពមន្ត្រីកម្ពុជា ចំពោះគម្រោង នៃការវាយតម្លៃហេតុប៉ះពាល់បរិស្ថាន និងការត្រួតពិនិត្យការបំពុលបរិស្ថាននេះ។ លោកថា កន្លងមកមានក្រុមហ៊ុនខ្លះបានធ្វើការវាយតម្លៃហេតុប៉ះពាល់បរិស្ថានបានត្រឹមត្រូវ តែមួយចំនួនទៀតមិនបានត្រឹមត្រូវនោះទេ។ បើតាមលោក តឹក វណ្ណរ៉ា ភាពមិនត្រឹមត្រូវបានធ្វើឲ្យប៉ះពាល់បរិស្ថានយ៉ាងធ្ងន់ធ្ងរ និងធ្វើឲ្យពលរដ្ឋក្លាយជាជនរងគ្រោះពីការអភិវឌ្ឍទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ