នាយករដ្ឋមន្ត្រីនិងធនាគារជាតិអះអាងផ្សេងគ្នា ករណីទប់ទល់នឹងការបិទសេដ្ឋកិច្ចនិងគ្មានជំនួយបរទេស
ទោះគ្មានជំនួយពីបរទេសក៏កម្ពុជា មានសមត្ថភាពបើកប្រាក់ខែឲ្យ មន្រ្តីរាជការនិងកងកម្លាំងប្រដាប់អាវុធ លើសពី១ឆ្នាំដែរ។ នេះជាការលើកឡើងរបស់លោកនាយករដ្ឋមន្ត្រីហ៊ុន សែន នាថ្ងៃទី២៩ ខែកក្កដានេះ ខណៈមន្ត្រីជាន់ខ្ពស់នៃធនាគារជាតិអះអាងថាកម្ពុជាអាចរស់បានជិតកន្លះឆ្នាំ បើមានការហ៊ុមព័ទ្ធសេដ្ឋកិច្ច។
ចុះផ្សាយនៅថ្ងៃ៖
នាយករដ្ឋមន្ត្រីកម្ពុជា លោក ហ៊ុន សែន បានថ្លែងថា បើទោះបីជាគ្មានប្រាក់ចំណូលបន្ថែម ក៏កម្ពុជាមានលទ្ធភាពបើកប្រាក់ខែឲ្យ មន្ត្រីរាជការ ឬកម្លាំងប្រដាប់អាវុធលើសពីមួយឆ្នាំដែរ។ ជាការលើកឡើងក្នុងឱកាសពិនិត្យការដ្ឋានសាងសង់ពហុកីឡដ្ឋានជាតិ មរតកតេជោ ដែលបាន និងកំពុងដំណើរការសាងសង់ នៅ សង្កាត់ព្រែកតាសេក ខណ្ឌជ្រាយចង្វារ រាជធានីភ្នំពេញនៅព្រឹកថ្ងៃទី២៩ ខែកក្កដា។
ការលើកឡើងរបស់លោកនាយករដ្ឋមន្ត្រីហ៊ុន សែន ក៏ជាការឆ្លើយតបនឹងការលើកឡើងថាការអនុម័តច្បាប់ច្បាប់ស្តីពីលទ្ធិប្រជាធិបតេយ្យកម្ពុជា ដែលមានឈ្មោះថា (Cambodia Democracy Act) ឬ H.R. 526 របស់សភាជាន់ទាបអាមេរិកកាលពីពាក់កណ្តាលខែកក្កដា បានធ្វើឲ្យកម្ពុជាខ្វះខាតថវិកាសម្រាប់បើកប្រាក់ខែឲ្យមន្ត្រីរាជការ និងយោធា។
ដោយមិនគិតប្រាក់បម្រុងអន្តរជាតិប្រមាណ១៥ពាន់លានដុល្លារ លោក ហ៊ុន សែន បញ្ជាក់ថា កម្ពុជាមានសាច់ប្រាក់សុទ្ធ ដែលតម្កល់នៅរតនាគារជាតិ និងផ្ញើនៅធនាគារជាតិឡើងជិត១៤លានលានរៀល (១លានលានរៀលស្មើ២៥០លានដុល្លារ) ហើយមួយខែចំណាយប្រមាណ៣០០លានដុល្លារប៉ុណ្ណោះ ខណៈប្រាក់ចំណូលរបស់កម្ពុជាមានលើសពី៤០០លានដុល្លារក្នុងមួយខែ។ លោកបន្ថែមថា កម្ពុជាអាចដំឡើងប្រាក់ខែឲ្យមន្ត្រីរាជការ ហើយបើកប្រាក់ទាំងនោះ២សប្តាហ៍ម្តងថែមទៀតក៏បាន។
សូមជម្រាបជូនថាសម្រាប់រយៈពេល១ឆមាសឆ្នាំ២០១៩នេះ ធនាគារជាតិកម្ពុជាបានបង្កើនទុនបម្រុងអន្តរជាតិដុលកើនដល់ប្រមាណ១១,១ពាន់លានដុល្លារ។ នេះបើតាមការលើកឡើងរបស់លោកស្រី ជា សិរី អគ្គនាយិកាបច្ចេកទេសនៃធនាគារជាតិ ដែលដកស្រង់សំដីដោយសារព័ត៌មានអនឡាញថ្មីៗ កាលពីថ្ងៃទី ២៨ ខែកក្កដា។ លោកស្រី ជា សិរី អះអាងថា ប្រសិនបើមានការហ៊ុមព័ទ្ធសេដ្ឋកិច្ចណាមួយ កម្ពុជានឹងមានលទ្ធភាពទប់ទល់បញ្ហាទាំងនោះបានរយៈពេល ៥ខែ តាមរយៈទុនបម្រុងអន្តរជាតិ ដែលកម្ពុជាមានស្រាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ