លោក សួន សេរីរដ្ឋា ត្រូវបានចោទប្រកាន់ចំនួន៣បទល្មើស ចំពោះការប្រមាថកងទ័ព
នៅទីបំផុតទៅ លោក សួន សេរីរដ្ឋា ប្រធានគណបក្សអំណាចខ្មែរ ត្រូវបានតុលាការក្រុងភ្នំពេញសម្រេចចោទប្រកាន់ចំនួន៣បទល្មើស ទាក់ទងនឹងការប្រមាថទៅលើកងទ័ព។ ភ្លាមៗ បន្ទាប់ពីការចោទប្រកាន់នេះ លោក សួន សេរីរដ្ឋា ត្រូវបានបញ្ជូនខ្លួនទៅកាត់ទោសតែម្តង។ ប៉ុន្តែ ដោយសារមិនមានមេធាវី តុលាការបានសម្រេចលើកពេលទៅបើកសវនការនៅថ្ងៃទី ២៤ សីហា វិញ។
ចុះផ្សាយនៅថ្ងៃ៖
ស្តាប់ - ០២:៣៧
លោក សួន សេរីរដ្ឋា ត្រូវបានបញ្ជូនខ្លួនយកទៅកាត់ទោសភ្លាមៗ នៅតែប៉ុន្មាននាទី ក្រោយពីព្រះរាជអាជ្ញារងតុលាការក្រុងភ្នំពេញ លោក សៀង សុខ បានសម្រេចចោទប្រកាន់ចំនួន៣បទល្មើស នាល្ងាចថ្ងៃទី ១៤ សីហា។ ប៉ុន្តែ សវនាការដែលបើកធ្វើយ៉ាងតក់ក្រហល់ និងដោយគ្មានមេធាវីការពារក្តីផងនេះ ត្រូវបានលើកពេលទៅធ្វើនៅថ្ងៃទី ២៤ ខែសីហា ខាងមុខនេះវិញ បន្ទាប់ពីភាគីជនជាប់ចោទ បានស្នើសុំរកមេធាវីដើម្បីការពារក្តី។
ទាក់ទងទៅនឹងការលើកឡើងថា ហេតុអ្វីករណីរបស់លោក សួន សេរីរដ្ឋា ត្រូវបានតុលាការលើកយកទៅបើកសវនាការកាត់ទោសភ្លាមៗបែបនេះ? ត្រូវបាន លោក លី សុផាន់ណា អ្នកនាំពាក្យតុលាការក្រុងភ្នំពេញ អះអាងថា ករណីរបស់លោក សួន សេរីរដ្ឋា គឺជាបទល្មើសជាក់ស្តែង ហើយជាសំណុំរឿងដែលបានបំពេញលក្ខខណ្ឌនៃនីតិវិធីបង្ហាញខ្លួនភ្លាម តាមបញ្ញត្តិមាត្រា ៤៧ និងមាត្រា ៤៨ នៃក្រមនីតិវិធីព្រហ្មទណ្ឌកម្ពុជា។
លោក សួន សេរីរដ្ឋា ប្រធានគណបក្សអំណាចខ្មែរ មានអាយុ៤៣ឆ្នាំ ត្រូវបានសមត្ថកិច្ចកម្ពុជាចាប់ខ្លួន កាលពីរសៀលថ្ងៃទី ១៣ សីហា ខណៈដែលលោកកំពុងធ្វើដំណើរវិលត្រលប់មកពីខេត្តកំពង់ចាមចូលមកកាន់ទីក្រុងភ្នំពេញ។ ការចាប់ខ្លួនភ្លាមៗនេះ គឺបន្ទាប់ពីលោក សួន សេរីរដ្ឋា ត្រូវបានក្រុមមេយោធាកម្ពុជាចោទប្រកាន់ថា បានបង្ហោះសារប្រមាថមកលើមេយោធាកម្ពុជា ថា ជាចោរ។ បន្ទាប់ពីបានចាប់ខ្លួននិងឃុំខ្លួននៅស្នងការដ្ឋាននគរបាលរាជធានីភ្នំពេញអស់មួយយប់ លោក សួន សេរីរដ្ឋា ត្រូវបានបញ្ជូនខ្លួនទៅកាន់តុលាការក្រុងភ្នំពេញ នៅរសៀលថ្ងៃទី ១៤ សីហា ហើយត្រូវបានព្រះរាជអាជ្ញារងអមតុលាការក្រុងភ្នំពេញ លោក សៀង សុខ សម្រេចចោទប្រកាន់ចំនួន៣បទល្មើស។ ទី១. គឺបទញុះញង់កុំឲ្យយោធិនស្តាប់បង្គាប់ តាមមាត្រា ៤៧១ នៃក្រមព្រហ្មទណ្ឌកម្ពុជា ទី២.បទល្មើសធ្វើឲ្យខួចទឹកចិត្តកងទ័ព តាមមាត្រា ៤៧២ និងទី៣ គឺបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌកម្ពុជា។ ក្រៅពីសំណុំរឿងដែលធ្វើឲ្យយោធាមានកំហឹង និងបានចេញញត្តិថ្កោលទោសបន្តកន្ទុយគ្នានេះ លោក សួន សេរីរដ្ឋា ក៏ត្រូវបានចោទប្រកាន់មួយករណីទៀត ទាក់ទងទៅនឹងការប្រមាថព្រះមហាក្សត្រ។ ទាក់ទងករណីចុងក្រោយនេះ គេអាចនឹងឈានទៅរំលាយគណបក្សរបស់លោក សួន សេរីរដ្ឋា ចោលតែម្តង។ នេះបើតាមប្រសាសន៍របស់ប្រមុខរដ្ឋាភិបាលកម្ពុជា លោក ហ៊ុន សែនកាលពីព្រឹកមិញនេះ។
សូមបញ្ជាក់ថា គិតត្រឹមល្ងាចថ្ងៃទី ១៤ សីហា លោក សួន សេរីរដ្ឋា ប្រធានគណបក្សអំណាចខ្មែរ ត្រូវបានតុលាការសម្រេចបញ្ជូនខ្លួនទៅឃុំឃាំងជាបណ្តោះអាសន្ននៅពន្ធនាគារ ដើម្បីរងចាំការកាត់ទោសនៅសប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ