លោក ជួង ជូងី៖ ១០០%កូនក្តីរបស់លោកនឹងមិនអាចអនុវត្តន៍សេចក្តីសម្រេចរបស់តុលាការនៅថ្ងៃនេះបានទេ
តុលាការក្រុងភ្នំពេញនៅរសៀលថ្ងៃទី ១០ សីហានេះបានកាត់ទោសលោក គឹម សុខ អ្នកវិភាគនយោបាយវ័យក្មេង ឲ្យជាប់ពន្ធនាគាររយៈពេល១៨ខែ និងពិន័យជាប្រាក់ជាង ៨០៨ លានរៀល ពីបទបរិហារកេរ្តិ៍ជាសាធារណៈ និង ញុះញង់ ឲ្យមានភាពវឹកវរដល់សន្តិសុខសង្គម។ លោក គី តិច មេធាវីតំណាងឲ្យលោក ហ៊ុន សែន បានស្វាគមន៍ចំពោះសេចក្តីសម្រេចនេះ។ ចំណែកឯមេធាវីការពារក្តីឲ្យលោក គឹម សុខ បានហៅការកាត់ទោសនេះថា វាធ្ងន់ធ្ងរពេកហើយសម្រាប់កូនក្តីរបស់ខ្លួន ហើយថា ១០០ភាគរយនិងមិនអាចអនុវត្តបានទេ។
ចុះផ្សាយនៅថ្ងៃ៖
ស្តាប់ - ០២:៤៤
តុលាការក្រុងភ្នំពេញ នៅរសៀលថ្ងៃទី១០ខែសីហានេះ បានសម្រេចផ្តន្ទាទោសដាក់ពន្ធនាគារលោក គឹម សុខ រយៈពេល១៨ខែ និងពិន័យជាប្រាក់៨០៨លានរៀល។ ក្នុងនោះ តុលាការបានបង្គាប់ឲ្យលោក គឹម សុខ បង់៨លានរៀលចូលថវិការដ្ឋ និង៨០០លានរៀលទៀត គឺសម្រាប់សងជំងឺចិត្តដល់លោកនាយករដ្ឋមន្ត្រី ហ៊ុន សែន។ ប៉ុន្តែមេធាវីការពារក្តីលោក គឹម សុខ អះអាងថា ១០០ភាគរយ កូនក្តីរបស់លោក នឹងមិនអាចអនុវត្តបានទេ។
គួរជំរាបជូនថា លោក គឹម សុខ អ្នកអត្ថាធិប្បាយនយោបាយវ័យក្មេង ដែលទើបតែលេចមុខមិនបានប៉ុន្មានផងនោះ ត្រូវបានតុលាការក្រុងភ្នំពេញចាប់ឃុំខ្លួន កាលពីខែកុម្ភៈ ឆ្នាំ ២០១៧ បន្ទាប់ពីលោកនាយករដ្ឋមន្ត្រី ហ៊ុន សែន បានប្តឹងពីបទបរិហារកេរ្តិ៍ជាសាធារណៈ និងញុះញង់ឲ្យមានភាពវឹកវរដល់សន្តិសុខសង្គម តាមមាត្រា ៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌកម្ពុជា។ ការឈានទៅដល់ការប្តឹងចាប់ខ្លួនលោក គឹម សុខ នេះ គឺបន្ទាប់ពីអ្នក វិភាគនយោបាយមិនសំចៃមាត់រូបនេះ បានថ្លែងដោយចោទប្រកាន់លោកនាយករដ្ឋមន្ត្រី ហ៊ុន សែននិងគណបក្សប្រជាជនកម្ពុជាថា ស្ថិតនៅពីក្រោយខ្នង នៃអំពើឃាតកម្មបាញ់សម្លាប់លោកបណ្ឌិត កែម ឡី កាលពីថ្ងៃទី ១០ កក្កដា ឆ្នាំ២០១៦។ ប៉ុន្តែត្រូវបានលោកនាយករដ្ឋមន្ត្រី និងមេធាវីបានច្រានចោល ហើយសម្រេចដាក់ពាក្យប្តឹងលោក គឹម សុខ ដើម្បីទាមទារភាពស្អាតស្អំ និងសំណងជំងឺចិត្តកន្លះលានដុល្លារអាមេរិក (៥០ម៉ឺនដុល្លារអាមេរិក) ពីលោក គឹម សុខ។
លោក គឹម សុខ ដែលត្រូវបានបង្ហាញខ្លួននៅចំពោះមុខអង្គចៅក្រមនៅថ្ងៃនេះបានបន្តរិះគន់ និងវាយប្រហារដោយមិនសំចៃមាត់ ទៅលើរដ្ឋាភិបាលកម្ពុជានិងលោកនាយករដ្ឋមន្ត្រី ហ៊ុន សែន រួមទាំងចៅក្រមនៃតុលាការក្រុងភ្នំពេញផងដែរ។ ហើយជាអ្វីដែលលោក គី តិច មេធាវីតំណាងលោកនាយករដ្ឋមន្ត្រី ហ៊ុន សែន ចាត់ទុកថា គឺសុទ្ធសឹងតែជាបទល្មើស។ យ៉ាងណាក៏ លោក គី តិច មេធាវីតំណាងលោកនាយករដ្ឋមន្ត្រី ហ៊ុន សែន បានប្រកាសទទួលយកសាលក្រមនេះ ហើយបានថ្លែងបន្ថែមថា វាជាសេចក្តីសម្រេចប្រកបដោយភាពយុត្តិធម៌សម្រាប់កូនក្តីរបស់លោក។ ប៉ុន្តែផ្ទុយទៅវិញ លោក ជួង ជូងី មេធាវីការពារក្តីឲ្យលោក គឹម សុខ បានចាត់ទុកសេចក្តីសម្រេចនេះថា អយុត្តិធម៌សម្រាប់កូនក្តីរបស់លោក។ លោកមេធាវី យល់ឃើញថា បើទោះបីជាសាលក្រមនេះចូលជាស្ថាពរក្តី ក៏កូនក្តីរបស់លោក ១០០% នឹងមិនអាចអនុវត្តន៍បានទេ។ លោកបានចោទជាសំណួរថា តើថវិការដ៏ច្រើនសន្ធឹកសន្ធាប់បែបនេះ កូនក្តៅរបស់លោកទៅរកនៅឯណា? យ៉ាងណាក៏ដោយលោកមេធាវី ជូង ជូងី ថា នឹងពិភាក្សាជាមួយកូនក្តីរបស់លោក ដើម្បីត្រៀមប្តឹងឧទ្ធរណ៍ ដើម្បីប្រឆាំងនឹងសេចក្តីសម្រេចនេះ។
គួរជំរាបជូនថា ក្រៅពីសំណុំរឿងនេះ លោក គឹម សុខ នៅរងបណ្តឹងមួយករណីទៀតពីលោកនាយករដ្ឋមន្ត្រី ហ៊ុន សែន។ គឺជាពាក្យបណ្តឹង ដែលលោក គឹម សុខ បានចោទប្រកាន់រដ្ឋាភិបាលកម្ពុជាសព្វថ្ងៃដែរថា បានបង្កើតប្រព័ន្ធសម្លាប់មនុស្ស រួចរកឃាតកមិនដែលឃើញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ