កម្ពុជាបង្កើតយុទ្ធនាការពង្រឹងឯករាជ្យភាពសេដ្ឋកិច្ច ទប់ទល់នឹងការដកពន្ធអនុគ្រោះពីអឺរ៉ុបនិងអាមេរិក
លោកនាយករដ្ឋមន្ត្រី ហ៊ុន សែន បានប្រកាសនៅក្នុងជំនួបជាមួយអ្នកកាសែតជាង៤៥០០នាក់នៅឯមជ្ឈមណ្ឌលកោះពេជ្រ កាលពីយប់ថ្ងៃទី ១១ មករាថា កម្ពុជាកំពុងបង្កើតយុទ្ធនាការមួយ ដើម្បីពង្រឹងឯករាជ្យភាពសេដ្ឋកិច្ចរបស់ខ្លួន ដើម្បីត្រៀមទប់ទល់នឹងការដកប្រព័ន្ធអនុគ្រោះពន្ធរបស់អឺរ៉ុបនិងអាមេរិក។ ការលើកឡើងរបស់លោកនាយករដ្ឋមន្ត្រី គឺបន្ទាប់ពីសមាជិកព្រឹទ្ធសភាអាមេរិកពីររូប ទើបស្នើសេចក្តីព្រាងច្បាប់ថ្មីមួយ ស្តីពី ពាណិជ្ជកម្មកម្ពុជាឆ្នាំ២០១៩ ដើម្បីឲ្យរដ្ឋបាលអាមេរិកលោក ដូណាល់ ត្រាំ ពិចារណាឡើងវិញនូវការអនុគ្រោះពន្ធទូទៅ GSPដល់កម្ពុជា និងខណៈពេលដែលសហភាពអឺរ៉ុប កំពុងដំណើរការដកប្រព័ន្ធអនុគ្រោះពន្ធ EBA ពីកម្ពុជា។
ចុះផ្សាយនៅថ្ងៃ៖
ស្តាប់ - ០២:៥៩
ជាវិធានការដំបូងនិងក្តៅៗ ដើម្បីឈានទៅពង្រឹងឯករាជ្យភាពនៃសេដ្ឋកិច្ចរបស់កម្ពុជា លោកនាយករដ្ឋមន្ត្រី ហ៊ុន សែន បានអះអាងថា លោកទើបតែបានបញ្ជារឲ្យដកកងកម្លាំងនិងស្ថាប័នផ្សេងៗចេញពីគ្រប់ច្រកព្រំដែនទាំងអស់ ដោយទុកឲ្យមានតែស្ថាប័នអន្តោប្រវេសន៍ និងគយតែប៉ុណ្ណោះ។ ចំណែកឯស្ថាប័នផ្សេងៗទៀត នឹងត្រូវជម្រុះចោលទាំងអស់។ នេះគឺជាវិធានការមួយ ក្នុងចំណោមវិធានការឯទៀត ដែលប្រមុខរដ្ឋាភិបាលកម្ពុជាលោក ហ៊ុន សែន បានអះអាងថា ជាយុទ្ធនាការពង្រឹងឯករាជ្យភាពសេដ្ឋកិច្ចរបស់កម្ពុជា បើទោះបីជាគេដកប្រព័ន្ធអនុគ្រោះពន្ធពីកម្ពុជាក៏ដោយ ក៏កម្ពុជា នៅតែអាចរស់បានដោយខ្លួនឯង។
ថ្លែងនៅក្នុងជំនួបប្រចាំឆ្នាំលើកទី ០៣ រវាងអ្នកកាសែតកម្ពុជាជាមួយនាយករដ្ឋមន្ត្រីនៅឯមជ្ឈមណ្ឌលកោះពេជ្រ កាលពីយប់ថ្ងៃទី ១១ មករា លោកនាយករដ្ឋមន្ត្រី ហ៊ុន សែន បានអះអាងថា លោកបានអនុញ្ញាតឲ្យរដ្ឋមន្ត្រីក្រសួងសេដ្ឋកិច្ចកម្ពុជាលោក អូន ព័ន្ធមុនីរ័ត្ន ជាអ្នកអនុវត្តយុទ្ធនាការនេះ ដោយជាបឋមត្រូវដកចេញនូវស្ថាប័ននានា ដែលជាឧបសគ្គដល់ការធ្វើពាណិជ្ជកម្មនៅតាមច្រកព្រំដែន។ បន្ថែមលើនេះ នៅក្នុងក្របខណ្ឌនៃគោលនយោបាយក្នុងការគាំទ្រដល់វិស័យធុរកិច្ចនៅកម្ពុជា លោកនាយករដ្ឋមន្ត្រី ហ៊ុន សែន ក៏បានដាក់ចេញនូវវិធានការមួយចំនួនទៀត តួយ៉ាងការលុបបំបាត់ចោលលុយក្រោមតុ ការកាត់បន្ថយតម្លៃស្កេន និងរួមទាំងការកាត់បន្ថយតម្លៃចំណាយក្រៅផ្លូវការផ្សេងៗទៀត។ អ្វីដែលរដ្ឋាភិបាលកម្ពុជាធ្វើនៅពេលនេះ គឺដើម្បីធានាឲ្យអ្នករកស៊ីនៅកម្ពុជា រក្សាបាននូវផលចំណេញរបស់ខ្លួន។
លោក ចាន់ សុផល អ្នកវិភាគសេដ្ឋកិច្ចកម្ពុជាបានចាត់ទុកវិធានការនេះ ថាជាការបោះជំហានដ៏ធំមួយរបស់កម្ពុជា។ នេះគឺជាការកែទម្រង់មួយ ដើម្បីបង្កើនភាពប្រជែងឈ្នះរបស់កម្ពុជា និងដើម្បីកាត់បន្ថយការពឹងពាក់លើសម្បទានពាណិជ្ជកម្មពីអឺរ៉ុបនិងអាមេរិក។ ប៉ុន្តែលោក ចាន់ សុផល បានលើកឡើងថា នៅមានការងារច្រើនថែមទៀត ដែលកម្ពុជាត្រូវធ្វើដើម្បីជំរុញកម្ពុជាឱ្យទៅជាប្រទេសមួយមានសមត្ថភាពប្រកួតប្រជែងដោយពេញលេញនៅលើឆាកអន្តរជាតិ។
គួរជម្រាបជូនថា ការលើកឡើងរបស់លោកនាយករដ្ឋមន្ត្រី ហ៊ុន សែន នៅពេលនេះ គឺបន្ទាប់ពីសមាជិកព្រឹទ្ធសភាអាមេរិកពីររូប គឺលោក ថិត គ្រូស (TED Cruz) មកពីគណបក្សសាធារណៈរដ្ឋនិងសមាជិកព្រឹទ្ធសភាម្នាក់ទៀត លោក គ្រីស ខូនស៍ (Chris Coons) មកពីគណបក្សប្រជាធិបតេយ្យ កាលពីថ្ងៃទី ០៩ មករា ទើបបានស្នើសេចក្តីព្រាងច្បាប់ថ្មីមួយ ស្តីពី ពាណិជ្ជកម្មកម្ពុជាឆ្នាំ២០១៩ ដើម្បីឲ្យរដ្ឋបាលអាមេរិកលោក ដូណាល់ ត្រាំ ពិចារណាឡើងវិញនូវការអនុគ្រោះពន្ធទូទៅ GSP ដល់កម្ពុជា និងស្របពេលដែលសហភាពអឺរ៉ុប កំពុងដំណើរការដកប្រព័ន្ធអនុគ្រោះពន្ធ EBA ពីកម្ពុជា។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានអះអាងថា កម្ពុជានឹងខាតបង់ប្រាក់ពី៣០០ ទៅ ៤០០លានដុល្លារអាមេរិក នៅក្នុងមួយឆ្នាំ បើអាមេរិកដកការអនុគ្រោះពន្ធ (GSP) ពីកម្ពុជាមែន។ កម្ពុជាដែលទទួលបានការអនុគ្រោះពន្ធ (GSP) ពីអាមេរិកនេះ តាំងពីឆ្នាំ១៩៩៧ មកម្លេះ។ ហើយនេះគឺលើកទីមួយហើយ ដែលព្រឹទ្ធសភាអាមេរិក ចាប់ផ្តើមធ្វើសេចក្តីស្នើច្បាប់ ដើម្បីស្នើផ្តាច់ការអនុគ្រោះពន្ធពីកម្ពុជា បន្ទាប់ពីសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ