តំណាងកម្ពុជាប្រចាំនៅ អសប ចោទប្រតិភូសហភាពអឺរ៉ុបថា បំបាក់មុខកម្ពុជា
តំណាងអចិន្ត្រៃយ៍កម្ពុជា ប្រចាំនៅអង្គការសហប្រជាជាតិ បានបញ្ចេញប្រតិកម្មចំពោះគណៈប្រតិភូសហភាពអឺរ៉ុប ដែលបានលើកឡើងពីបញ្ហាសិទ្ធិមនុស្សនៅក្នុងប្រទេសកម្ពុជា នៅមុនពេលកំណត់នៃកិច្ចប្រជុំលើកទី៣៩របស់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងសឺណែវ ប្រទេសស្វីស។ សម្រាប់កម្ពុជា ការលើកឡើងរបស់ប្រតិភូសហភាពអឺរ៉ុប គឺជាការរំលោភបំពានយ៉ាងជាក់ច្បាស់ ទៅលើវិធានជាមូលដ្ឋាន និងការអនុវត្តជាធរមាន របស់ក្រុមប្រឹក្សាសិទ្ធិមនុស្ស ក្នុងន័យបំបាក់មុខរបស់កម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៥
តាមពិតទៅ របៀបវារៈស្តីពីបញ្ហាសិទ្ធិមនុស្សនៅក្នុងប្រទេសកម្ពុជា នឹងត្រូវលើកយកទៅពិភាក្សាជាទូទៅ នៅក្នុងរបៀបវារៈទី១០ នៅថ្ងៃទី ២៦ កញ្ញា សប្តាហ៍ក្រោយឯណោះទេ។ ប៉ុន្តែប្រតិភូសហភាពអឺរ៉ុប តំណាងដោយប្រទេសអូទ្រីស បានឡើងថ្លែងរិះគន់ពីបញ្ហាសិទ្ធិមនុស្សនៅក្នុងប្រទេសកម្ពុជា នៅចំពោះមុខក្រុមប្រឹក្សាសិទ្ធិមនុស្សអង្គការសហប្រជាជាតិមុនកាលកំណត់ ដើម្បីបន្តុះបង្អាប់កិត្តិយសរាជរដ្ឋាភិបាលកម្ពុជា។
នេះគឺជាប្រតិកម្មរបស់លោក ណី សំអុល ឯកអគ្គរាជទូតតំណាងអចិន្ត្រៃយ៍កម្ពុជា ប្រចាំមន្ទីរអង្គការសហប្រជាជាតិ និងអង្គការអន្តរជាតិនានា ឆ្លើយតបទៅនឹងសេចក្តីថ្លែងការណ៍របស់ប្រតិភូសហភាពអឺរ៉ុប នៅក្នុងកិច្ចប្រជុំលើកទី៣៩ នៃក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី ១៨ កញ្ញា។
សម្រាប់កម្ពុជា ការលើកឡើងពីបញ្ហាសិទ្ធិមនុស្សរបស់កម្ពុជា នៅមុនរបៀបវារៈដែលបានកំណត់រួចជាស្រេចហើយនោះ គឺប្រៀបដូចជាកងកម្លាំងអង្គរក្សការពារព្រះចៅអធិរាជរ៉ូម៉ាំង ដោយបានរំលោភបំពានយ៉ាងជាក់ច្បាស់ទៅលើវិធានជាមូលដ្ឋាន និងការអនុវត្តជាធរមានរបស់ក្រុមប្រឹក្សាសិទ្ធិមនុស្ស និងដើម្បីរិះគន់អំពីបញ្ហាសិទ្ធិមនុស្សនៅក្នុងប្រទេសកម្ពុជា។ តំណាងអចិន្ត្រៃយ៍កម្ពុជាប្រចាំនៅអង្គការសហប្រជាជាតិ លោក ណី សំអុល បានចាត់ទុកទង្វើរបស់ប្រតិភូសហភាពអឺរ៉ុបថា ជាយុទ្ធសាស្ត្រមិនគួរគប្បីនៃការដុតផ្ទះ ដើម្បីស្ងោរស៊ុតនេះ មិនខុសពីការបង្កើតអាបធ្មប់ដ៏កាចសាហាវ ដោយជ្រកក្រោមឈ្មោះអ្នកតស៊ូមតិសិទ្ធិមនុស្ស ដែលមិនផ្តល់ប្រយោជន៍អ្វីឡើយ។ ប៉ុន្តែផ្ទុយទៅវិញ វានឹងបំផ្លាញប្រព័ន្ធសិទ្ធិមនុស្សទាំងមូលរបស់អង្គការសហប្រជាជាតិ។ ទោះជាយ៉ាងណាក៏ដោយ ការលើកឡើងបែបនេះ មិនមែនមានន័យថា កម្ពុជាទាមទារនូវការរួចផុតពីការរិះគន់ពីបញ្ហាសិទ្ធិមនុស្សនោះទេ។ នេះបើតាមការបញ្ជាក់បន្ថែមពីលោក ណី សំអុល តំណាងអចិន្ត្រៃយ៍កម្ពុជា។
សេចក្តីថ្លែងការណ៍របស់តំណាងអចិន្ត្រៃយ៍កម្ពុជាប្រចាំនៅអង្គការសហប្រជាជាតិ ក៏បានវាយបកទៅកាន់ប្រតិភូសហភាពអឺរ៉ុបថា បានវាយតម្លៃពីស្ថានភាពសិទ្ធិមនុស្សនៅក្នុងប្រទេសកម្ពុជា ដោយគ្រាន់តែផ្អែកលើអវត្តមានអតីតគណបក្សនយោបាយមួយ ដែលមិនបានចូលរួមក្នុងការបោះឆ្នោតជាតិកាលពីខែកក្កដានោះថា ការបោះឆ្នោតរបស់កម្ពុជា គឺមានភាពស្រពិចស្រពិលលើផ្លូវច្បាប់នោះទេ។
គួរជំរាបជូនថា សភាសហភាពអឺរ៉ុប កាលពីសប្តាហ៍មុន ទើបតែបានអនុម័តលើសេចក្តីសម្រេចចិត្តមួយ ស្តីពី ការស្តារស្ថានការណ៍នយោបាយនៅក្នុងប្រទេសកម្ពុជាឡើងវិញ។ ក្នុងនោះ ប្រមុខការទូតអឺរ៉ុបលោកស្រី ហ្វេដេរីកា ម៉ូហ្កេរីនី ក៏បានទទូចឲ្យរដ្ឋាភិបាលកម្ពុជាគិតគូរឡើងវិញពីបញ្ហានេះ និងបានព្រមានទុកជាមុនថា បើគ្មានការផ្លាស់ប្តូរឥរិយាបទណាមួយពីរដ្ឋាភិបាលកម្ពុជាពីពេលនេះទេ នោះក្រុមប្រឹក្សាអឺរ៉ុប នឹងចាត់វិធានការឲ្យសក្តិសមបំផុត។ មិនតែប៉ុណ្ណោះ កិច្ចប្រជុំកាលពីថ្ងៃទី ១៣ កញ្ញា សភាសហភាពអឺរ៉ុបក៏បានប្រាប់ឲ្យសមាជិករបស់ខ្លួន លើកឡើងពីបញ្ហាអាសនៈរបស់កម្ពុជានៅអង្គការសហប្រជាជាតិផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ