ក្រសួងសុខាភិបាលព្យាករថា ឆ្នាំ២០១៩ ជម្ងឺគ្រុនឈាមអាចកើតឡើងដល់៥ម៉ឺនករណី
មជ្ឈមណ្ឌលជាតិប្រយុទ្ធជម្ងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ បានព្យាករណ៍ថា នៅក្នុងឆ្នាំ២០១៩នេះ ជម្ងឺគ្រុនឈាមនៅក្នុងប្រទេសកម្ពុជា នឹងកើតឡើងជាង៥ម៉ឺនករណី។ សូមជម្រាបថា គិតត្រឹមខែមិថុនានេះ ករណីជម្ងឺគ្រុនឈាមនៅកម្ពុជា បានកើតឡើងប្រមាណជា១ម៉ឺនករណីហើយ ក្នុងនោះអ្នកជម្ងឺ២៤នាក់បានស្លាប់។ ទោះជាយ៉ាងនេះក្តី មន្ត្រីបានអះអាងថា ស្ថានភាពនៃជម្ងឺគ្រុនឈាមនេះ ស្ថិតនៅក្នុងកម្រិតដែលអាចគ្រប់គ្រងបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
គិតត្រឹមខែមិថុនានេះ ជម្ងឺគ្រុនឈាមបានកើតឡើងប្រមាណជាង១ម៉ឺនករណី ក្នុងនោះ អ្នកជម្ងឺ២៤នាក់បានស្លាប់បាត់បង់ជីវិត។ ចំនួននេះ បានកើនឡើង បើធៀបនឹងឆ្នាំ២០១៨ ដែលមានចំនួនអ្នកស្លាប់៧នាក់ប៉ុណ្ណោះ។ ប៉ុន្តែទោះជាយ៉ាងនេះក្តី ចំនួននេះនៅមិនទាន់ដល់កម្រិតប្រកាសអាសន្ននៅឡើយទេ។ ការព្យាករណ៍របស់ក្រសួងសុខាភិបាលបង្ហាញថា នៅក្នុងឆ្នាំ២០១៩នេះ ជម្ងឺគ្រុនឈាមអាចនឹងកើតឡើងដល់ជាង៥ម៉ឺនករណី ដោយសារតែឆ្នាំនេះ គឺជាវដ្តនៃការផ្ទុះឡើងខ្លាំងនៃជម្ងឺគ្រុនឈាម ដែលតែងតែផ្ទុះឡើងខ្លាំងនៅរៀងរាល់៤ទៅ៥ឆ្នាំម្តង។
ថ្លែងនៅក្នុងសន្និសីទកាសែត នៅព្រឹកថ្ងៃទី ២៧ មិថុនានេះ ដែលរៀបចំឡើងដោយអង្គភាពអ្នកនាំពាក្យរដ្ឋាភិបាលកម្ពុជា លោកវេជ្ជបណ្ឌិត ហ៊ុយ រ៉េកុល នាយកមជ្ឈមណ្ឌលជាតិប្រយុទ្ធជម្ងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ បានថ្លែងថា ក្រសួងបានបែងចែកថ្នាំអាប៊ែត ១៨៤ តោននៅទូទាំងប្រទេស និងត្រៀមបាញ់ថ្នាំមូសប្រមាណជា៧០០លីត្រនៅក្នុង២៥រាជធានីខេត្តទូទាំងប្រទេស ដើម្បីកំចាត់មូសខ្លា។ តែទោះជាយ៉ាងនេះក្តី លោកវេជ្ជបណ្ឌិត បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្ន ដោយកុំឲ្យមូសខ្លាខាំ និងដោយស្លៀកពាក់ឲ្យបានជិតៗខ្លួនប្រាណ ត្រូវដេកក្នុងមុងទាំងថ្ងៃនិងយប់ ត្រូវសំអាតព្រៃស៊ុបទ្រុបនៅក្បែរផ្ទះ ត្រូវបើកទ្វារបង្អួចនៅក្នុងផ្ទះឲ្យមានពន្លឺ និងជាពិសេសត្រូវប្រមូលសំបកកំប៉ុង សំបកកង់ឡាន និងម៉ូតូចាស់ៗ ឬរបស់របរដែលដក់ទឹក ដើម្បីបញ្ឈប់ការកកើតនៃសត្វមូសខ្លា។ មូសខ្លា ដែលជាភ្នាក់ងារនៃការចម្លងវីរុសគ្រុនឈាម។ បើតាមលោកវេជ្ជបណ្ឌិត រហូតមកទល់នឹងពេលនេះ មិនមានថ្នាំណា អាចព្យាបាលជម្ងឺគ្រុនឈាមបានទេ គឺមានតែការធ្វើរោគវិនិច្ឆ័យឲ្យបានត្រឹមត្រូវ ការថែមទាំ និងការព្យាបាល តាមមន្ទីរពេទ្យជំនាញប៉ុណ្ណោះ។
សូមបញ្ជាក់ថា នៅក្នុងឆមាសទី១នៃឆ្នាំ២០១៩នេះ អ្នកកើតជម្ងឺគ្រុនឈាមនៅទូទាំងប្រទេសកម្ពុជា មានចំនួនជាង១ម៉ឺនករណីហើយ។ ចំនួននេះ បានកើនឡើងច្រើន បើធៀបនឹងរយៈពេលដូចគ្នាក្នុងឆ្នាំ២០១៨កន្លងទៅ។ ក្រសួងសុខាភិបាល បានអះអាងថា កត្តាដែលបណ្ដាលឲ្យមានករណីគ្រុនឈាមច្រើនដូច្នេះ គឺដោយសារតែកត្តាបម្រែបម្រួលអាកាសធាតុ និងកត្តាវត្តមានជម្រកមូសខ្លានៅតាមផ្ទះសម្បែង ឬទីធ្លាសាធារណៈ។ មួយវិញទៀត គឺដោយសារតែឆ្នាំ២០១៩នេះ គឺជាវដ្តរបស់ជម្ងឺគ្រុនឈាម ដែលតែងតែផ្ទុះឡើងរៀងរាល់៤ទៅ៥ឆ្នាំម្ដង។ យ៉ាងណាក៏ដោយ លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជម្ងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រនៃក្រសួងសុខាភិបាល បានអះអាងថា ស្ថានភាពនៃជម្ងឺគ្រុនឈាមនេះ ស្ថិតនៅក្នុងកម្រិតដែលអាចគ្រប់គ្រងបាន មិនទាន់ឈានចូលដល់កម្រិតប្រកាសអាសន្ននៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ