អង្គការសង្គមស៊ីវិល៖ សេរីភាពសារព័ត៌មាននៅកម្ពុជា រងការធ្វើទុក្ខបុកម្នេញ
អង្គការសង្គមស៊ីវិលចំនួន៧៩ស្ថាប័ន បានសម្ដែងការសោកស្ដាយយ៉ាងខ្លាំងចំពោះការបន្តធ្វើទុក្ខបុកម្នេញលើសេរីភាពសារព័ត៌មាននៅកម្ពុជា។ នេះបើតាមសេចក្ដីថ្លែងការណ៍រួមរបស់អង្គការសង្គមស៊ីវិល ចេញផ្សាយនៅថ្ងៃពុធ ទី០៩ ខែឧសភានេះ។ សេចក្ដីថ្លែងការណ៍នេះ ធ្វើឡើងបន្ទាប់ពីម្ចាស់ថ្មីនៃកាសែតភ្នំពេញប៉ុស្តិ៍ បញ្ជាឲ្យលុបចោលអត្ថបទព័ត៌មានដែលចេញផ្សាយរួចហើយ និងការបណ្ដេញនិពន្ធនាយកនៃកាសែតនេះចេញពីការងារ នៅថ្ងៃចន្ទដើមសប្ដាហ៍នេះ។
ចុះផ្សាយនៅថ្ងៃ៖
បញ្ហាចម្រូងចម្រាស់ដែលកើតឡើងនៅកាសែតភ្នំពេញប៉ុស្តិ៍ ក្រោយពេលដែលកាសែតនេះត្រូវគ្រប់គ្រងដោយម្ចាស់ថ្មី ត្រូវបានអង្គការសង្គមស៊ីវិលចាត់ទុកថា ជាការធ្វើទុកបុកម្នេញចុងក្រោយ លើសេរីភាពសារព័ត៌មាននៅកម្ពុជា។ សម្រាប់អង្គការសង្គមស៊ីវិលចំនួន៧៩ស្ថាប័ន ករណីនេះ បានធ្វើឲ្យប៉ះពាល់យ៉ាងធ្ងន់ធ្ងរដល់លំហសារព័ត៌មាននៅកម្ពុជា ចាប់តាំងពីពាក់កណ្ដាលឆ្នាំ២០១៧មក។
គួរជម្រាបថា លោក កៃ គឹមសុង និពន្ធនាយកកាសែតភ្នំពេញប៉ុស្តិ៍ ត្រូវបានម្ចាស់កាសែតថ្មីជនជាតិម៉ាឡេស៊ី បញ្ឈប់ពីការងារនៅថ្ងៃចន្ទ ទី០៧ឧសភា បន្ទាប់ពីលោកអនុញ្ញាតឲ្យកាសែតមួយនេះចេញផ្សាយនៅលើទំព័រមុខ នូវអត្ថបទស្តីពីការផ្លាស់ប្តូរម្ចាស់ក្រុមហ៊ុន Post Media។ ក្រោយការបណ្ដេញលោក កៃ គឹមសុង បុគ្គលិកនិងអ្នករាយការណ៍ព័ត៌មាននៃកាសែតនេះយ៉ាងហោចណាស់១៣នាក់ផ្សេងទៀត ក៏បានសម្រេចចិត្តលាឈប់ពីការងារដែរ។ ចំណែកម្ចាស់ថ្មីនៃកាសែតភ្នំពេញប៉ុស្តិ៍ បានចេញសេចក្ដីថ្លែងការណ៍បរិហារថា ការចុះផ្សាយអត្ថបទស្ដីពីការទិញលក់កាសែត គឺបានដើរលើសព្រំដែនរបស់កាសែត ហើយជាការរំលោភធ្ងន់ធ្ងរ ចំពោះបទបញ្ជាផ្ទៃក្នុងក្រុមហ៊ុន។
ហេតុការណ៍ដែលបានកើតឡើងដូចបានរៀបរាប់នេះ ធ្វើឲ្យអង្គការសង្គមស៊ីវិលមានកង្វល់ ពាក់ព័ន្ធនឹងឯករាជ្យភាពរបស់កាសែតនាពេលខាងមុខ។ សម្រាប់អង្គការសង្គមស៊ីវិលទាំង៧៩ស្ថាប័ន ករណីកាសែតភ្នំពេញប៉ុស្តិ៍ដូច្នេះ គឺជាការរឹតត្បិតចុងក្រោយ បន្ទាប់ពីមានការបិទហ្វ្រេកង់ស៍របស់វិទ្យុចំនួន៣២ដែលផ្សាយព័ត៌មានបន្តពីវិទ្យុអាស៊ីសេរី វិទ្យុសំឡេងសហរដ្ឋអាមេរិក និងវិទ្យុសំឡេងប្រជាធិបតេយ្យ, ការឃុំខ្លួនអតីតអ្នកកាសែតវិទ្យុអាស៊ីសេរីពីរនាក់, និងការភៀសខ្លួនរបស់អ្នកកាសែតមួយចំនួនទៀតទៅបរទេស ដោយសារភ័យខ្លាចនឹងការផ្ដន្ទាទោសជាដើម។
តាមរយៈក្ដីកង្វល់ដូច្នេះ អង្គការសង្គមស៊ីវិលទាំង៧៩ស្ថាប័ន បានទទូចឲ្យមានការគោរពចំពោះប្រព័ន្ធផ្សព្វផ្សាយឯករាជ្យ សេរីភាពនៃការបញ្ចេញមតិ និងសូមឲ្យបញ្ឈប់ការធ្វើទុក្ខបុកម្នេញតាមផ្លូវតុលាការ ទៅលើសកម្មជនប្រព័ន្ធផ្សព្វផ្សាយឯករាជ្យ និងអ្នកសារព័ត៌មាននៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ