ទីស្នាក់ការគណបក្សសង្រ្គោះជាតិស្ងប់ស្ងាត់ នៅថ្ងៃប្រកាសសាលក្រមរំលាយគណបក្សសង្រ្គោះជាតិ
ខណៈដែលសន្តិសុខត្រូវបានរឹតបន្តឹងនៅជុំវិញតុលាការកំពូល នៅថ្ងៃប្រកាសសាលក្រមគណបក្សសង្រ្គោះជាតិ នៅថ្ងៃនេះ ។ នៅទីស្នាក់ការកណ្តាលគណបក្សសង្រ្គោះជាតិឯណោះ វិញ គ្មានការជួបប្រជុំ ពី សំណាក់ថ្នាក់ដឹកនាំ និងជួបជុំសកម្មជននិងអ្នកគាំទ្រគណបក្សសង្រ្គោះជាតិនោះទេ ។ យ៉ាងណាក៏ដោយ លោក ម៉ៅ មុន្នីវណ្ណ ប្រធានស្តីទីគណៈកម្មាធិការប្រតិបត្តិគណបក្សសង្រ្គោះ និងជាតំណាងរាស្រ្តគណបក្សសង្រ្គោះជាតិអះអាងថា មេធាវីតំណាងរាស្រ្តគណបក្សសង្រ្គោះជាតិ នឹងបន្តពិភាក្សាគ្នាហើយតវ៉ាតាមនីតិវិធីច្បាប់ជាបន្តទៀត។
ចុះផ្សាយនៅថ្ងៃ៖
ស្តាប់ - ០១:៤៤
លោក ម៉ៅ មុនីវណ្ណ តំណាងរាស្រ្តគណបក្សសង្រ្គោះជាតិដែលទើបត្រូវបានរំលាយនៅថ្ងៃនេះ បានបញ្ជាក់ប្រាប់វិទ្យុបារាំងអន្តរជាតិRFI នៅមុននេះបន្តិច ថា ពេញមួយថ្ងៃព្រហស្បត្តិ៍នេះ ដែលជាថ្ងៃប្រកាសសាលដីការំលាយគណបក្សសង្រ្គោះជាតិ មិនមានការជួបជុំប្រមូលផ្តុំពីសំណាក់មេឃុំ ចៅសង្កាត់ ក្រុមប្រឹក្សាឃុំ សង្កាត់ មកពីគ្រប់រាជធានីខេត្ត រួមទាំងសកម្មជន និងអ្នកគាំទ្រ គណបក្សសង្រ្គោះជាតិ នៅឯទីស្នាក់ការកណ្តាលគណបក្សសង្រ្គោះជាតិ ស្ថិតនៅសង្កាត់ចាក់អង្រែ រាជធានីភ្នំពេញនោះទេ ។
លោក ម៉ៅ មុនីវណ្ណ ថ្លែងកុំថាឡើយការជួបជុំនៅភ្នំពេញ ចលនានៃការឡើងមកពីតាមខេត្តដើម្បីមកតាមដានសវនាការរំលាយគណបក្សនេះក៏គ្មានដែរ។ គ្មានការជួបជុំដោយសារគណបក្សសង្គ្រោះជាតិ និងអ្នកគាំទ្រជ្រើសរើសវិធីសាស្ត្រអត់ធ្មត់។ តំណាងរាស្រ្តគណបក្សសង្រ្គោះជាតិរូបនេះ បន្តអះអាងថា គណបក្សសង្គ្រោះជាតិ មានបទពិសោធន៍ច្រើន និងភាពចាស់ទុំផ្នែកនយោបាយ ដូច្នេះហើយគណបក្ស នឹងធ្វើការតស៊ូមតិដោយអហឹង្សា ពោលគឺតាមលទ្ធិប្រជាធិបតេយ្យជំនួសវិញ ដើម្បីជៀសវាងការប្រឈមមុខដាក់គ្នា ឬការឈានដល់ការប្រើប្រាស់អំពើហិង្សាណាមួយកើតឡើង។
ទោះបីគ្មានការជួបជុំគ្នាណាមួយ ពីសំណាក់ថ្នាក់ដឹកនាំគណបក្សសង្រ្គោះជាតិនៅក្នុងប្រទេស នៅថ្ងៃសម្រេចរំលាយគណបក្សសង្រ្គោះជាតិរបស់តុលាការកំពូលក៏ដោយ។ ក៏ប៉ុន្តែ ចាប់តាំងពីមុនថ្ងៃប្រកាសសាលក្រមតំណាងរាស្ត្រ ៧ រូប មកពីគណបក្សសង្គ្រោះជាតិ បានទៅជួបសន្ទនា ជាមួយលោក ជាសមាជិកព្រឹទ្ធសភា នៃសហរដ្ឋអាមេរិក និងជាប្រធានអនុគណៈកម្មាធិការកិច្ចការទ្វីបអាស៊ី ភាគខាងកើត ក្នុងគណៈកម្មាធិការកិច្ចការបរទេស នៃព្រឹទ្ធសភាសហរដ្ឋអាមេរិក។
មិនត្រឹមតែប៉ុណ្ណោះ លោក ម៉ោ មុនីវណ្ណ ប្រធានស្តីទីគណៈកម្មាធិការប្រតិបត្តិគណបក្សសង្រ្គោះជាតិបញ្ជាក់ទៀតថា ថ្នាក់ដឹកនាំគណបក្សសង្រ្គោះជាតិ ក៏មានគម្រោងបន្តជួបថ្នាក់ដឹកនាំប្រទេសផ្សេងទៀត ដើម្បីស្វែងរកកិច្ចអន្តរាគមន៍បន្ធូរបន្ថយស្ថានការណ៍នយោបាយនៅកម្ពុជា។ ក៏ដូចជា ធ្វើយុទ្ធនាការជាលក្ខណៈអន្តរជាតិ ដើម្បីទាមទារឲ្យមានការដោះលែងប្រធានគណបក្សសង្រ្គោះជាតិ ដែលកំពុងជាប់ឃុំនៅពន្ធនាគារត្រពាំងផ្លុង ខេត្តត្បូងឃ្មុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ