គណបក្សធំពីរប្រកាសជ័យជំនះរៀងខ្លួន ខណៈ គ.ជ.ប នៅមិនទាន់ប្រកាសលទ្ធផលផ្លូវការ
លទ្ធផលក្រៅផ្លូវការនៃការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤បង្ហាញថាគណបក្សប្រជាជនកម្ពុជា នឹងទទួលបានតំណែងឃុំ-សង្កាត់ចំនួនជាង៧០% ខណៈដែលគណបក្សសង្គ្រោះជាតិទទួលបានជិត៣០%។ ទោះជាលទ្ធផលនេះ មិនទាន់ផ្លូវការក្តី ប៉ុន្តែលទ្ធផលនេះ អាចនឹងមិនប្រែប្រួលច្រើនពីលទ្ធផលផ្លូវការនោះទេ។
ចុះផ្សាយនៅថ្ងៃ៖
ស្តាប់ - ០២:៥៨
បើផ្អែកតាមលទ្ធផលក្រៅផ្លូវការ គណបក្សប្រជាជនកម្ពុជាបានឈ្នះអាសនៈមេឃុំ-ចៅសង្កាត់ចន្លោះពី ១១៦០ទៅ១១៦៣ឃុំសង្កាត់ ខណៈដែលគណបក្សសង្គ្រោះជាតិឈ្នះបានអាសនៈចំនួន៤៨២ ទៅ៤៨៥ឃុំសង្កាត់នៅទូទាំងប្រទេស។ នេះបើផ្អែកតាមលទ្ធផលក្រៅផ្លូវការដែលប្រកាសដោយគណបក្សនយោបាយធំៗទាំងពីរ ចាប់តាំងពីយប់មិញមកម្លេះ។ លទ្ធផលនេះ ត្រូវបានតំណាងគណបក្សនីមួយៗអះអាងថា គឺជាជ័យជំនះរៀងៗខ្លួន។
សម្រាប់គណបក្សប្រជាជនកម្ពុជា ត្បិតតែបាត់បង់អាសនៈមេឃុំ-ចៅសង្កាត់មួយចំនួនក្តី ប៉ុន្តែគណបក្សនេះបានចាត់ទុកការបោះឆ្នោតនេះថា គឺជាជ័យជំនះ។ ជ័យជំនះត្បិតចំនួនអ្នកទៅបោះឆ្នោតឲ្យគណបក្សប្រជាជនកម្ពុជា បានកើនឡើងជាង៣០ម៉ឺនសម្លេង បើប្រៀបធៀបនឹងការបោះឆ្នោតជាតិកាលពីខែកក្កដាឆ្នាំ២០១៣ ដែលធ្វើឲ្យគណបក្សនេះ បានឈ្នះនិងដឹកនាំឃុំសង្កាត់ចំនួនជាង៧០%នៅទូទាំងប្រទេស។ ពោលគឺ ក្នុងចំណោមអ្នកចេញទៅបោះឆ្នោតជាង៦លាន៧សែននាក់ (6,743,329) មានអ្នកបោះឆ្នោតឲ្យគណបក្សប្រជាជនជាង៣លាន៥សែននាក់ (3,529,400) ដែលស្មើនឹង 51,39% ដែលចំនួននេះ នឹងធ្វើឲ្យគណបក្សប្រជាជនកម្ពុជាបន្តឈ្នះឆ្នោតដឹកនាំរដ្ឋាភិបាលនៅឆ្នាំ២០១៨ទៀត។
ចំណែកគណបក្សសង្គ្រោះជាតិដែលជាគណបក្សប្រឆាំងឯណោះវិញ ក៏បានប្រកាសពីជ័យជំនះរបស់ខ្លួនផងដែរ។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានថ្លែងនៅក្នុងសន្និសីទកាសែតកាលពីយប់មិញថា បើទោះបីជាការបោះឆ្នោតនេះ មិនទាន់មានលក្ខណៈសេរី ត្រឹមត្រូវ និងមានការគំរាមពីសង្គ្រាមក្តី តែគណបក្សសង្គ្រោះជាតិនៅតែអាចឈ្នះបានអាសនៈមេឃុំ-ចៅសង្កាត់ប្រមាណជិត៥០០ឃុំ-សង្កាត់នៅទូទាំងប្រទេស។ ជាពិសេស គឺឈ្នះនៅក្នុងរាជធានីខេត្តសំខាន់ៗចំនួន៣ គឺរាជធានីភ្នំពេញ ខេត្តសៀមរាប និងខេត្តកំពង់ចាម។ ទន្ទឹមគ្នានេះ លោក កឹម សុខា ប្រធានគណបក្សសង្គ្រោះជាតិ ដែលបានចេញសារលិខិតអរគុណដល់ម្ចាស់ឆ្នោតនៅថ្ងៃនេះ បានចាត់ទុកថា ចំនួនមេឃុំ-ចៅសង្កាត់អាណត្តិទី៤ឆ្នាំ២០១៧នេះ គណបក្សសង្គ្រោះជាតិបានកើនឡើងដល់១២ដង ច្រើនជាងអាណត្តិទី៣ឆ្នាំ២០១២ ដែលមានតែ៤០រូបប៉ុណ្ណោះ។ ហើយចំនួនសមាជិកក្រុមប្រឹក្សាឃុំ-សង្កាត់ ក៏បានកើនឡើងស្ទើរជិតពាក់កណ្តាលផងដែរ។ សម្រាប់លោក កឹម សុខា លទ្ធផលនេះ គឺជាមូលដ្ឋាននៃការឈានទៅរកជ័យជំនះរបស់គណបក្សសង្គ្រោះជាតិនៅឆ្នាំ២០១៨ ត្បិតតាមទម្លាប់ចំនួនអ្នកបោះគាំទ្រគណបក្សប្រឆាំងនឹងកើនឡើង១៥% នៅពេលការបោះឆ្នោតជ្រើសរើសតំណាងរាស្ត្រ។
សូមបញ្ជាក់ថា ចំនួនអ្នកចេញទៅបោះឆ្នោតកាលពីថ្ងៃអាទិត្យ មានចំនួនជាង៧លាន៤ម៉ឺននាក់ ដែលស្មើនឹង៩០% នៃចំនួនអ្នកចុះឈ្មោះបោះឆ្នោតជាង៧លាន៨សែននាក់។ ហើយអ្វីដែលគួរឲ្យកត់សំគាល់ដែរនោះ គឺថា មុនមានការប្រកាសលទ្ធផលក្រៅផ្លូវការនេះ មហាជនមួយចំនួនបានរិះគន់ ទៅលើការផ្សាយរបស់ទូរទស្សនជាតិកម្ពុជា ស្តីពីលទ្ធផលបោះឆ្នោតបណ្តោះអាសន្ន ដែលមហាជនមួយចំនួនបានអះអាងថា បានធ្វើឲ្យពួកគេច្រឡំបល់ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ