លោក ហេង សំរិន ថាស្មារតី២ធ្នូ បានលុបបំបាត់នូវស្នាមបែកបាក់ក្នុងសង្គមជាតិ
ដូចរៀងរាល់ឆ្នាំដែរ គណបក្សប្រជាជនកម្ពុជាបានធ្វើពិធីរំឭកខួប៤១ឆ្នាំនៃការបង្កើត«រណសិរ្សសាមគ្គីសង្គ្រោះជាតិកម្ពុជា»នៅថ្ងៃ២ធ្នូ កាលពីឆ្នាំ១៩៧៨។ ពិធីនេះត្រូវបានធ្វើឡើងក្រោមវត្តមានលោក ហេង សំរិន និងមន្ត្រីជាន់ខ្ពស់គណបក្សកាន់អំណាចជាច្រើនទៀត នៅសាលសន្និសីទចតុមុខ ប៉ុន្តែមិនមានវត្តមានលោកនាយករដ្ឋមន្ត្រី ហ៊ុន សែន ទេ។
ចុះផ្សាយនៅថ្ងៃ៖ កែប្រែថ្ងៃទី៖
តាមរយៈសុន្ទរកថា លោក ហេង សំរិន ប្រធានរដ្ឋសភាបានថ្លែងថា រណសិរ្ស ២ធ្នូ មិនត្រឹមតែសង្គ្រោះជាតិ និងប្រជាជនកម្ពុជា ឱ្យចាកផុតពីមហន្ដរាយ នៃរបបប្រល័យពូជសាសន៍ប៉ុណ្ណោះទេ ប៉ុន្ដែរណសិរ្ស ២ធ្នូ នៅបានជួយស្ដារ និងអភិវឌ្ឍន៍ សង្គមជាតិនៅគ្រប់ទិសទី ធ្វើឱ្យមាតុភូមិកម្ពុជាមានការកែប្រែមុខមាត់ថ្មីជាបន្ដបន្ទាប់រហូតដល់សព្វថ្ងៃ។
លោក ហេង សំរិន អះអាងថា កម្ពុជា«បានលុបបំបាត់នូវស្នាមបែកបាក់ប្រេះឆាក្នុងសង្គមជាតិ ធ្វើឱ្យធ្លុងមហាសាមគ្គីជាតិកាន់តែរឹងមាំឡើង។ ជាមួយគ្នានោះ លោក ហេង សំរិន ដែលជាប្រធានកិត្តិយសគណបក្សប្រជាជនកម្ពុជា បានអំពាវនាវដល់សមាជិកបក្ស ឲ្យប្រកាន់ខ្ជាប់នូវប្រពៃណីស្នេហាជាតិ និងផ្សារភ្ជាប់ជាមួយប្រជាជន ហើយខិតខំបម្រើប្រទេសជាតិ តាមកម្មវិធីនយោបាយ របស់រាជរដ្ឋាភិបាល។
លោក ហ៊ុយ វណ្ណៈ ជាសមាជិកគណៈកម្មាធិការកណ្តាលគណបក្សប្រជាជនកម្ពុជា និងជារដ្ឋលេខាធិការក្រសួងមហាផ្ទៃ បានលើកឡើងថា «ស្មារតី២ធ្នូ» រំលឹកយើងថា ដំណើររស់ឡើងវិញរបស់ប្រជាជនយើងពីអតីតកាល និងការរីកចម្រើនរបស់ប្រទេសជាតិយើងនាពេលបច្ចុប្បន្ន គឺមានដំណើរ ប្រវត្តិសាស្ត្រ សច្ចៈធម៌ និងគុណធម៌។
សូមរំឭកថា រណសិរ្ស ២ ធ្នូ ត្រូវបានបង្កើតឡើងនៅឆ្នាំ១៩៧៨ ស្ថិតនៅភូមិជើងឃ្លូ ឃុំ២ធ្នូ ស្រុក ស្នួល ខេត្តក្រចេះ។ ឈ្មោះដើមគឺ«រណសិរ្សសាមគ្គីសង្គ្រោះជាតិកម្ពុជា» បច្ចុប្បន្នត្រូវបាន ប្តូរឈ្មោះជា «រណសិរ្សសាមគ្គី អភិវឌ្ឍន៍កម្ពុជា» ជាអង្គការចាត់តាំងមហាជនឈានមុខរបស់ គណបក្សប្រជាជនកម្ពុជា ដោយទទួលបានការជួយឧបត្ថម្ភយ៉ាងធំធេងពីកងទ័ពស្ម័គ្រចិត្តវៀតណាម ក្នុងគោលបំណងផ្តួលរំលំរបបកម្ពុជាប្រជាធិបតេយ្យ(ខ្មែរក្រហម) នៅថ្ងៃទី៧ មករា ឆ្នាំ១៩៧៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ