អ្នកជំនាញអចលនៈព្រទ្យ៖ វិស័យខុនដូរ ចាប់ផ្តើមមានតម្រូវការច្រើនពីពេលនេះទៅថ្ងៃខាងមុខ
ដូចរៀងរាល់ឆ្នាំដែរ ពិព័រណ៍អចលនទ្រព្យកម្ពុជាលើកទី៤ ត្រូវរៀបចំឡើងនៅថ្ងៃទី៤ខែតុលានេះ នៅសណ្ឋាគារណាហ្គាវើល។ ព្រឹត្តិការណ៍ពិព័រណ៍អចលនទ្រព្យរយៈពេល២ថ្ងៃនេះ គឺបានដាក់បង្ហាញគម្រោងជាច្រើន ដូចជា ខុនដូរ បុរី និងការអភិវឌ្ឍវិស័យសំណង់ចម្រុះនៅកម្ពុជាដែលភាគច្រើនជាគម្រោងធំៗរបស់ថៅកែចិន។ ទន្ទឹមនឹងការបន្តរីកចម្រើនវិស័យអចលនទ្រព្យនៅកម្ពុជា វិស័យខុនដូ ក៏ចាប់ផ្តើមមានតម្រូវច្រើនពីពេលនេះតទៅថ្ងៃខាងមុខ នោះក៏ព្រោះតែអ្នកមានលទ្ធភាពមធ្យមអាចទិញខុនដូស្នាក់នៅ ខណៈផ្ទះជាប់ដីឡើងថ្លៃវាល់លានដុល្លារនៅកណ្តាលទីក្រុង។
ចុះផ្សាយនៅថ្ងៃ៖
ស្តាប់ - ០២:០៨
លោកឧកញ៉ា ស៊ា រិទ្ធី អគ្គនាយក្រុមហ៊ុនអចលនទ្រព្យកម្ពុជា World bridge Group ជាវាគ្មិនម្នាក់នៅក្នុងពិព័រណ៍អចលនទ្រព្យបានថ្លែងថា បច្ចុប្បន្ននេះ ពលរដ្ឋដែលមានលទ្ធភាពមធ្យមមិនអាចទិញផ្ទះជាប់ដីនៅកណ្តាលទីក្រុងភ្នំពេញរស់នៅបានឡើយ។ តួយ៉ាងផ្ទះនៅតាមបណ្តោយផ្លូវព្រះមុនីវង្ស គឺមានតម្លៃរហូតដល់២ទៅ៣លានដុល្លារឯណោះ ខណៈផ្ទះនៅតាមផ្ទះតូចៗ នៅកណ្តាលក្រុង ក្នុងមួយល្វែងមានតម្លៃពី៣០ទៅ៤០ម៉ឺនដុល្លារផងដែរ។ នេះជាការបញ្ជាក់ របស់ លោក ស៊ា រិទ្ធី។
អ្នកជំនាញអចលនទ្រព្យរូបនេះ បានបញ្ជាក់ថា នាពេលបច្ចុប្បន្ននេះ វិស័យខុនដូ គឺជាឱកាសមួយសម្រាប់អ្នកមានចំណូលមធ្យម អាចមានលទ្ធភាពទិញបាននៅ ព្រោះនៅមានតម្លៃទាបជាងផ្ទះជាប់ដី ហើយនៅកណ្តាលទីក្រុងងាយស្រួលធ្វើដំណើរទៅកន្លែងការងារ។ លោកបានលើកឧទាហរណ៍ថា កាលពីដើមឡើយ ប្រជាជនថៃមិនចាប់អារម្មណ៍ទិញខុនដូរស់នៅទេ គឺមានតែជនបរទេសប៉ុណ្ណោះ។ ប៉ុន្តែនាពេលបច្ចុបប្បន្ននេះ ជនជាតិថៃភាគច្រើនគឺរស់នៅខុនដូរ ហើយថា ប្រជាជនកម្ពុជាក៏មាននិន្នាការដូចគ្នានេះដែរនៅប៉ុន្មានឆ្នាំខាងមុខទៀតនេះ។
លោក ហ៊ឹម សីហា នាយកផ្នែកស្រាវជ្រាវនៃក្រុមហ៊ុនVTRUST APPRAISAL ធ្លាប់បានលើកឡើងកាលពីខែកញ្ញាថា តាមការព្យាករណ៍នៅឆ្នាំ២០៣០ខាងមុខ តម្រូវការផ្ទះសំបែង និងខុនដូរ គឺរង្វង់៧០ម៉ឺនកន្លែងក្នុងមួយឆ្នាំ ខណៈបច្ចុប្បន្នតម្រូវការផ្ទះសំបែងមានចំនួន២ម៉ឺនខ្នង និងតម្រូវការខុនដូរចំនួន១ម៉ឺនកន្លែងក្នុងមួយឆ្នាំ។
លោកក៏បានទទួលស្គាល់ថា បច្ចុប្បន្នជនជាតិខ្មែរមិនសូវចាប់អារម្មណ៍ទិញខុនដូរដូចជនបរទេសនោះទេ ប៉ុន្តែច្រើនឆ្នាំទៅមុខទៀត ជនជាតិខ្មែរនឹងងាកមកទិញខុនដូរពីជនបរទេសវិញ ហើយនឹងធ្វើឲ្យតម្លៃខុនដូរកើនឡើងទៅតាមនោះដែរ។ ការកើននៃតម្រូវការខុនដូរទៅថ្ងៃខាងមុខ បើតាមក្រុមអ្នកជំនាញ គឺ៥ឆ្នាំទៅមុខទៀត ដីនៅក្នុងទីក្រុងភ្នំពេញនឹងអស់មិនមានកន្លែងសាងសង់ផ្ទះសំបែងបានទៀតឡើយ គឺអាចសង់បានតែខុនដូរប៉ុណ្ណោះ។ ហើយក្រុមហ៊ុនផ្ទះល្វែងនឹងរត់ទៅសាងសង់ផ្ទះសំបែងនៅចំងាយយ៉ាងតិចក៏២០គីឡូម៉ែត្រពីចំណុចកណ្តាលនៃទីក្រុងភ្នំពេញ ដែលត្រូវចំណាយពេលវេលាច្រើនក្នុងការធ្វើដំណើរមកកន្លែងការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ