បញ្ជីបេក្ខភាពនៃសមាជិកព្រឹទ្ធសភារបស់បក្សប្រឆាំងដាក់ដល់ គ.ជ.ប ខណៈមានភាពចម្រូងចម្រាស
មន្ត្រីបក្សសង្រ្គោះជាតិបានឲ្យដឹងថា បក្សបានបញ្ជូនបញ្ជីបេក្ខភាពនៃសមាជិកព្រឹទ្ធសភា ទៅកាន់ គ.ជ.ប រួចរាល់ហើយ ក្រោយការសម្រេចទទួលស្គាល់ពីលោក កឹម សុខា។ ការបញ្ជូននេះ ធ្វើឡើងខណៈដែលលោក សម រង្ស៊ី អតីតប្រធានគណបក្សនេះ បានចេញវីដេអូមួយ កាលពីថ្ងៃទី២៧ តុលា លើកឡើងថាការសម្រេចចិត្តណាមួយនៅពេលនេះ របស់លោក កឹម សុខា ធ្វើឡើងក្រោមគំនាប ដែលមិនមែនជាការសម្រេចរបស់លោកពិតប្រាកដទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
លោក កឹម សុខា ប្រធានគណបក្សសង្រ្កោះជាតិ ដែលកំពុងជាប់ឃុំនៅក្នុងពន្ធនាគារក្នុងខេត្តត្បូងឃ្មុំ កាលពីថ្ងៃទី២៦ ខែតុលា បានសម្រេចចុះហត្ថលេខាទទួលស្គាល់បេក្ខជនពេញសិទ្ធិ៥៨នាក់ និងបម្រុងចំនួន៥៨នាក់ សម្រាប់ការបោះឆ្នោតជ្រើសតាំងសមាជិកព្រឹទ្ធសភានៅខែកុម្ភៈ ឆ្នាំ២០១៨ខាងមុខ។
លោក ម៉ៅ មុនីវណ្ណ ប្រធានស្តីទីគណកម្មាធិការប្រតិបត្តិគណបក្សសង្រ្គោះជាតិ ដែលកំពុងតែរងការចោទប្រកាន់ថា ជា “ជនបង្កប់” បានថ្លែងប្រាប់វិទ្យុបារាំងអន្តរជាតិនៅថ្ងៃទី២៩ ខែតុលាថា ការសម្រេចចុះហត្ថលេខានេះគឺធ្វើទៅតាមនីតិវិធីត្រឹមត្រូវ ហើយលោកគឺជាអ្នកកាន់យកទៅដាក់ទៅ គ.ជ.ប។
លោក សម រង្ស៊ី អតីតប្រធានគណបក្សសង្រ្គោះជាតិ ពីក្រៅប្រទេសបានចេញវីដេអូមួយ ជាមួយនឹងតំណាងរាស្ត្រ និងអ្នកគាំទ្រផ្សេងទៀត របស់គណបក្សសង្រ្គោះជាតិ លើកឡើងថាលោកប្រធានកឹម សុខា មិនមានសេរីភាពពេញលេញទេ ដូច្នេះលោកមិនអាចធ្វើសេចក្តីសម្រេចអ្វីបានត្រឹមត្រូវនោះទេ។
លោកបញ្ជាក់ថាតាមផ្លូវច្បាប់សេចក្តីសម្រេច ដែលធ្វើឡើងក្រោមការគំរាមកំហែង គឺមិនអាចយកជាការបាននោះទេ។ លោកសម រង្ស៊ីបន្តថា បច្ចុប្បន្ននេះលោក កឹម សុខា ស្ថិតនៅក្នុងការគំរាមកំហែង ដូច្នេះរាល់សេចក្តីសម្រេចទាំងឡាយណា មិនមែនជាការសម្រេចរបស់លោក កឹម សុខា ពិតប្រាកដនោះទេ។
លោក សម រង្ស៊ី បន្ថែមថាសេចក្តីសម្រេចរបស់គណបក្សសង្រ្គោះជាតិ មានតែគណៈកម្មាធិការអចិន្ត្រៃយ៍របស់គណបក្សទេ ហើយម្យ៉ាងសមាជិកគណៈកម្មាធិការអចិន្ត្រៃយ៍ភាគច្រើន គឺបានចេញមកក្រៅប្រទេសគ្មានអ្នកណាសម្លុតបាន ដូច្នេះមានតែគណៈកម្មាធិការអចិន្ត្រៃយ៍មតិភាគច្រើន ដែលអាចធ្វើសេចក្តីសម្រេចក្នុងនាមគណបក្សសង្រ្គោះជាតិ។
ភ្លាមៗបន្ទាប់ពីការចុះហត្ថលេខារបស់លោក កឹម សុខា ទទួលស្គាល់ នៅថ្ងៃទី២៦ ខែតុលា ក៏មានបេក្ខជនមួយចំនួន ដែលបានដាក់ឈ្មោះសុំឈរឈ្មោះជាសមាជិកព្រឹទ្ធសភា បានស្នើសុំដកពាក្យចេញពីបញ្ជីបេក្ខជនព្រឹទ្ធសភា អាណត្តិទី៤ វិញ។ លោក ម៉ៅ មុនីវណ្ណ បញ្ជាក់ថាលោកក៏បានទទួលលិខិតសុំដកពាក្យចេញបីបញ្ជីបេក្ខជនព្រឹទ្ធសភា អាណត្តិទី៤នេះដែរ ហើយលោកបន្ថែមថាគណបក្សនឹងធ្វើការកែតម្រូវបញ្ជីបេក្ខភាពសមាជិកព្រឹទ្ធសភា ទៅតាមច្បាប់របស់គ.ជ.ប។
ជុំវិញការបោះឆ្នោតជ្រើសតាំងសមាជិកព្រឹទ្ធសភា រដ្ឋាភិបាលកម្ពុជានៅថ្ងៃទី២៧ ខែតុលា បានសម្រេចកែសម្រួលកាលបរិច្ឆេទ នៃការបោះឆ្នោតជ្រើសតាំងសមាជិកព្រឹទ្ធសភា ទៅថ្ងៃទី២៥ ខែកុម្ភ ឆ្នាំក្រោយវិញ។ ការលើកពេលនេះ ត្រូវបានអ្នកជំនាញឃ្លាំមើលការបោះឆ្នោតនៅកម្ពុជាចាត់ទុកថា ដោយសាររដ្ឋាភិបាលកំពុងរងចាំឲ្យវិសោធនកម្មច្បាប់៤ អនុវត្តជាផ្លូវការ ក្រោយការឡាយព្រះហត្ថលេខា ដោយព្រះមហាក្សត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ