CNRP បរាជ័យក្នុងការទប់ស្កាត់វិសោធនកម្មច្បាប់ ដែលសំដៅបញ្ចប់ជីវិតនយោបាយលោក សម រង្ស៊ី
គណៈកម្មាធិការអចិន្ត្រៃយ៍នៃរដ្ឋសភា នៅថ្ងៃទី៦កក្កដានេះ បានសម្រេចបញ្ជូនសេចក្តីស្នើវិសោធនកម្មច្បាប់ ស្ដីពី គណបក្សនយោបាយ ទៅឲ្យរដ្ឋសភាអនុម័តនៅថ្ងៃចន្ទដើមសប្តាហ៍ក្រោយនេះ បើទោះបីជាមានការតវ៉ាជំទាស់ពីគណបក្សប្រឆាំងក៏ដោយ។ សម្រាប់សមាជិករដ្ឋសភាគណបក្សប្រជាជនកម្ពុជាថា វិសោធនកម្មច្បាប់នេះ គឺដើម្បីប្រជាធិបតេយ្យនៅកម្ពុជា ប៉ុន្តែតំណាងរាស្រ្តគណបក្សសង្រ្គោះជាតិបានចាត់ទុកថា វិសោធនកម្មច្បាប់ថ្មីនេះ នឹងធ្វើឲ្យមានការបែកបាក់ជាតិកាន់តែខ្លាំងឡើង។ សូមបញ្ជាក់ថា នេះគឺជាលើកទី២ហើយ ដែលមានសំណើរធ្វើវិសោធនកម្មច្បាប់ស្តីពីគណបក្សនយោបាយ។
ចុះផ្សាយនៅថ្ងៃ៖
ស្តាប់ - ០២:៥១
សេចក្ដីស្នើច្បាប់ ស្ដីពី វិសោធនកម្មច្បាប់ស្ដីពីគណបក្សនយោបាយដែលស្នើឡើងដោយក្រុមសមាជិករដ្ឋសភា មកពីគណបក្សប្រជាជនកម្ពុជាចំនួន៤១រូប ត្រូវបានគណៈកម្មាធិការអចិន្ត្រៃយ៍នៃរដ្ឋសភា សម្រេចបញ្ជូនទៅពិភាក្សានិងអនុម័ត នៅក្នុងកិច្ចប្រជុំសភាពេញអង្គ នៅថ្ងៃចន្ទ សប្តាហ៍ក្រោយនេះ បើទោះបីជាមានការជំទាស់ពីក្រុមគណបក្សប្រឆាំងក្តី។
លោក ឈាង វុន សមាជិកគណៈកម្មាធិការអចិន្រ្តៃយ៍នៃរដ្ឋសភា និងជាអ្នកនាំពាក្យគណបក្សប្រជាជនកម្ពុជាប្រចាំនៅរដ្ឋសភា បានថ្លែងប្រាប់ក្រុមអ្នកកាសែតនៅក្រោយពីកិច្ចប្រជុំគណៈអចិន្រ្តៃយ៍នៅថ្ងៃទី ០៦ កក្កដាថា ក្រុមតំណាងរាស្រ្តគណបក្សប្រជាជនកម្ពុជា នឹងមិនរាថយចំពោះការអនុម័តលើវិសោធនកម្មច្បាប់នេះទេ។ នេះគឺជាលើកទី២ហើយ ដែលមានសំណើរសុំធ្វើវិសោធនកម្មច្បាប់ ស្តីពី គណបក្សនយោបាយ បន្ទាប់ពីវិសោធនកម្មលើកទី១ទើបតែត្រូវបានប្រកាសដាក់ឲ្យប្រើប្រាស់កាលពីខែមិនា ដើមឆ្នាំនេះ។
យោងតាមខ្លឹមសារច្បាប់ស្តីពីវិសោធនកម្មច្បាប់ស្តីពីគណបក្សនយោបាយ ដែលបានបែកធ្លាយកាលពីយប់ថ្ងៃទី៥កក្កដា ដោយបន្ថែមខ្លឹមសារសំខាន់៣ចំណុច នៅក្នុងមាត្រា៦ថ្មី (ពីរ) ដែលបានចែងថា គ្រប់គណបក្សនយោបាយមិនត្រូវធ្វើសកម្មភាពណាមួយ ដូចជា ប្រើប្រាស់សារជាសម្លេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិតជាប់ទោសពីបទឧក្រិដ្ឋ ឬពីបទមជ្ឈឹម ដើម្បីជាផលប្រយោជន៍នយោបាយសម្រាប់គណបក្សរបស់ខ្លួនឡើយ។ គ្រប់គណបក្សនយោបាយមិនត្រូវយល់ព្រមដោយចំហរ ឬដោយតុណ្ហីភាព ឬឃុបឃិតជាមួយទណ្ឌិតជាប់ទោសពីបទឧក្រិដ្ឋ ឬពីបទមជ្ឈិម ឲ្យធ្វើសកម្មភាពណាមួយដើម្បីជាផលប្រយោជន៍នយោបាយសម្រាប់គណបក្សនយោបាយរបស់ខ្លួនឡើយ។ ចំណែកចំណុចចុងក្រោយបានចែងថា គ្រប់គណបក្សនយោបាយមិនត្រូវគាំទ្រ ឬរៀបចំផែនការ ឬឃុបឃិតជាមួយរាល់បុគ្គលដែលធ្វើសកម្មភាពក្នុងគោលបំណងប្រឆាំងនឹងផលប្រយោជន៍របស់ព្រះរាជណាចក្រកម្ពុជា ដូចមានចែងពីចំណុចទី១ ដល់ចំណុចទី៥នោះឡើយ។ មាត្រា៦ថ្មី(ពីរ)នេះបានចងភ្ជាប់ដោយមាត្រា៤៤ថ្មី(ពីរ)ថា ដោយមិនទាន់គិតដល់ទោសព្រហ្មទណ្ឌផ្សេងទៀត គណបក្សនយោបាយដែលបានប្រព្រឹត្តល្មើសនឹងមាត្រា៦ថ្មី(ពីរ)នៃច្បាប់នេះ និងមាត្រា៧ នៃច្បាប់ស្តីពីគណបក្សនយោបាយ នោះតុលាការអាចសម្រេចទី១. ផ្អាកសកម្មភាពគណបក្សនយោបាយមិនលើសពី៥ឆ្នាំ ឬ ទី២. ត្រូវរំលាយគណបក្សនយោបាយនោះចោលតែម្តង។
ផ្អែកតាមខ្លឹមសារនៃវិសោធនកម្មច្បាប់ថ្មីនេះ មានន័យថា គណបក្សសង្រ្គោះជាតិនឹងត្រូវផ្តាច់ទំនាក់ទំនងរាល់សកម្មភាពជាមួយលោក សម រង្ស៊ី អតីតប្រធានគណបក្សសង្រ្គោះជាតិ សូម្បីតែរូបភាពរបស់លោក សម រង្ស៊ី។
លោក យ៉ែម បុញ្ញឬទ្ធិ អ្នកនាំពាក្យគណបក្សសង្រ្គោះជាតិប្រចាំនៅរដ្ឋសភា បានចាត់ទុកថា វិសោធនកម្មច្បាប់ថ្មីនេះ នឹងបង្កឲ្យមានការបែកបាក់សាមគ្គីជាតិកាន់តែខ្លាំងឡើង ហើយគណបក្សសង្រ្គោះជាតិ នឹងមិនចូលរួមអនុម័តវិសោធនកម្មច្បាប់ថ្មីនេះទេ។
គួរជំរាបជូនថា វិសោធនកម្មច្បាប់ថ្មីនេះ បានចេញជារូបរាងមិនដល់១សប្តាហ៍ផង ក្រោយពីលោកនាយករដ្ឋមន្រ្តី ហ៊ុន សែន បានស្នើឲ្យតំណាងរាស្រ្តគណបក្សប្រជាជនរបស់លោក រៀបចំធ្វើវិសោធនកម្មច្បាប់ ហាមឃាត់មិនឲ្យទណ្ឌិតមកជាប់ពាក់ព័ន្ធជាមួយគណបក្សនយោបាយ។ លោក សម រង្ស៊ី ដែលកំពុងរស់នៅក្រៅប្រទេស បានហៅការកែច្បាប់នេះថា គឺដើម្បីតែកំចាត់រូបលោកចេញពីឆាកនយោបាយកម្ពុជាប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ