រដ្ឋសភាសម្រេចលុបឈ្មោះ ទីប្រឹក្សា និងជំនួយការអតីតតំណាងរាស្រ្តបក្សប្រឆាំងសរុបជាង១០០នាក់ចេញពីបញ្ជី
រដ្ឋសភានៅថ្ងៃទី ២១ វិច្ឆិកានេះ បានសម្រេចលុបឈ្មោះតំណាងរាស្រ្ត ទីប្រឹក្សា និងជំនួយការ រួមទាំងអ្នកបើករថយន្តរបស់អតីតតំណាងរាស្រ្ត នៃអតីតគណបក្សសង្រ្គោះជាតិ សរុបជាង១០០នាក់ ចេញពីបញ្ជី ក្រោយពីតុលាការកំពូលសម្រេចរំលាយគណបក្សសង្រ្គោះជាតិរួចមក។ ទន្ទឹមគ្នានេះ រដ្ឋសភាក៏បានជូនដំណឹងឲ្យអតីតតំណាងរាស្រ្តនៃអតីតគណបក្សសង្រ្គោះជាតិ ប្រគល់សម្ភារៈនិងរថយន្តឲ្យរដ្ឋសភាវិញផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
គឺចាប់ពីខែវិច្ឆិកានេះតទៅ អតីតតំណាងរាស្រ្តនៃអតីតគណបក្សសង្រ្គោះជាតិចំនួន៥៥រូប រួមទាំងទីប្រឹក្សា ជំនួយការ និងអ្នកបើករថយន្តរបស់ពួកគេសរុបជាង១០០នាក់ នឹងមិនទទួលបានប្រាក់បៀវត្សន៍ប្រចាំខែវិច្ឆិកានេះទេ បន្ទាប់ពីគណៈកម្មាធិការអចិន្ត្រៃយ៍នៃរដ្ឋសភា បានសម្រេចលុបឈ្មោះពួកគេចេញពីបញ្ជីផ្លូវការរបស់រដ្ឋសភា។ ការសម្រេចនេះ គឺធ្វើឡើងស្របតាមនីតិវិធី នៅក្រោយពេលដែលតុលាការកំពូល បានសម្រេចរំលាយគណបក្សសង្រ្គោះជាតិ កាលពីថ្ងៃទី ១៦ វិច្ឆិកា សប្តាហ៍មុន។
បើតាមលោក ឡេង ប៉េងឡុង អគ្គលេខាធិការនៃអគ្គលេខាធិការដ្ឋាននៃរដ្ឋសភា បានអះអាងថា ក្រៅពីបង្កកប្រាក់ខែរបស់ពួកគេចាប់ពីខែវិច្ឆិកានេះហើយ រដ្ឋសភាក៏បានបង្គាប់ឲ្យអតីតតំណាងរាស្រ្តនៃអតីតគណបក្សសង្រ្គោះជាតិប្រគល់មកវិញនូវសម្ភារៈប្រើប្រាស់ ដូចជា រថយន្តទំនើបៗ កុំព្យូទ័រយួរដៃ (Laptop) រួមទាំងសម្ភារៈការិយាល័យ របស់អតីតតំណាងរាស្ត្រនៃអតីតគណបក្សសង្គ្រោះជាតិមកវិញផងដែរ។ យោងតាមលិខិតរបស់លោក ឡេង ប៉េងឡុង កាលពីថ្ងៃទី ២០ វិច្ឆិកា រដ្ឋសភាបានសម្រេចបង្កើតក្រុមការងារមួយដើម្បីទទួលបន្ទុករងចាំទទួលនិងប្រគល់សម្ភារៈទាំងនោះ ចាប់ពីថ្ងៃទី ២០ រហូតដល់ថ្ងៃទី ២៤ វិច្ឆិកា ខាងមុខ។ ហើយគិតត្រឹមថ្ងៃទី ២១ វិច្ឆិកានេះ រដ្ឋសភាបានទទួលរថយន្តមួយគ្រឿងហើយ ពីអតីតប្រធានគណៈកម្មការទី០៧ គឺលោក យ៉ែម បុញ្ញឬទ្ធិ ដែលកំពុងស្ថិតនៅក្រៅប្រទេស។
គួរជំរាបជូនថា តាមរយៈសេចក្តីសម្រេចរបស់តុលាការកំពូល កាលពីថ្ងៃទី ១៦ វិច្ឆិកា ក្រៅពីបានរំលាយគណបក្សសង្រ្គោះជាតិហើយនោះ តុលាការក៏បានសម្រេចហាមឃាត់មន្រ្តីជាន់ខ្ពស់គណបក្សសង្រ្គោះជាតិចំនួន១១៨នាក់ មិនឱ្យធ្វើនយោបាយរយៈពេល៥ឆ្នាំ។ ជាសេចក្តីសម្រេច ដែលធ្វើឲ្យមានប្រតិកម្មពីសហគមន៍អន្តរជាតិនិងប្រទេសម្ចាស់ជំនួយលើកលែងតែប្រទេសចិន ដែលថា ជាសេចក្តីសម្រេចដែលបានសម្លាប់ជីវិតលទ្ធិប្រជាធិបតេយ្យនៅកម្ពុជាក្នុងរយៈពេលជាង២៤ឆ្នាំមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ