គណបក្សសង្រ្គោះជាតិ គ្រោងចំណាយថវិការកន្លះលានដុល្លារ ដើម្បីផ្លាស់ប្តូរស្លាកសញ្ញាថ្មី
ស្របពេលដែលច្បាប់ស្តីពីគណបក្សនយោបាយត្រូវបានប្រមុខរដ្ឋស្តីទីប្រកាសដាក់ឲ្យប្រើប្រាស់ជាការប្រញាប់កាលពីថ្ងៃទី ២៨ កក្កដា មក គណបក្សសង្រ្គោះជាតិដែលជាគណបក្សគូប្រជែងដ៏គ្រោះថ្នាក់របស់គណបក្សកាន់អំណាច បានចាប់ផ្តើមបោះពុម្ពផ្លាកសញ្ញាថ្មី ដែលមិនមានរូបលោក សម រង្ស៊ី ឈរចាប់ដៃជាមួយលោក កឹម សុខា ទៀតទេ។ កាលពីដើមសប្តាហ៍នេះ លោក កឹម សុខា ក្នុងនាមជាប្រធានគណបក្ស បានអំពាវនាវស្វែងរកការឧបត្ថម្ភថវិការ ពីថ្នាក់ដឹកនាំ សមាជិក-សមាជិកានិងអ្នកគាំទ្រ ទាំងក្នុងនិងក្រៅប្រទេស ដើម្បីធ្វើស្លាកសញ្ញាថ្មីនេះ។ តាមគម្រោង គណបក្សប្រឆាំង គ្រោងចំណាយថវិកាប្រមាណជាកន្លះលានដុល្លារអាមេរិកដើម្បីផ្លាស់ប្តូរស្លាកថ្មី។
ចុះផ្សាយនៅថ្ងៃ៖
ស្តាប់ - ០១:៤២
លោក កឹម សុខា ក្នុងនាមជាប្រធានគណបក្សសង្រ្គោះជាតិ កាលពីថ្ងៃទី ៣១ កក្កដា បានអំពាវនាវដល់ថ្នាក់ដឹកនាំ សមាជិក-សមាជិកា និងអ្នកគាំទ្រទាំងក្នុងនិងក្រៅប្រទេស ឲ្យចូលរួមឧបត្ថម្ភជាថវិកាទៅតាមលទ្ធភាពរៀងៗខ្លួន ដើម្បីផ្លាស់ប្តូរ ផ្ទាំងស្លាកគណបក្សសង្រ្គោះជាតិថ្មី នៅទូទាំងប្រទេស។
បើផ្អែកតាមសេចក្តីអំពាវនាវរបស់លោក កឹម សុខា ចុះថ្ងៃទី ៣១ កក្កដា ថា ការផ្លាស់ប្តូរផ្ទាំងស្លាកគណបក្សប្រឆាំងនៅទូទាំងប្រទេសនេះ គឺធ្វើឲ្យស្របទៅនឹងច្បាប់ ស្តីពី គណបក្សនយោបាយ ដែលទើបធ្វើវិសោធនកម្មថ្មីៗនេះ និងស្របពេលដែលគណបក្សសង្រ្គោះជាតិ ត្រៀមចូលរួមបោះឆ្នោតជាតិនៅឆ្នាំ ២០១៨ ខាងមុខ។ តាមគម្រោង គណបក្សសង្រ្គោះជាតិ អាចនឹងចំណាយថវិកាប្រមាណពី៣០ម៉ឺន ទៅ៥០ម៉ឺនដុល្លារអាមេរិក ឬកន្លះលាន ដើម្បីធ្វើការផ្លាស់ប្តូរផ្ទាំងសញ្ញាគណបក្សសង្រ្គោះជាតិនៅទូទាំងប្រទេស។ ការផ្លាស់ប្តូរផ្ទាំងស្លាកសញ្ញាគណបក្សសង្រ្គោះជាតិ នឹងត្រូវធ្វើឲ្យរួចរាល់នៅមុនថ្ងៃទី ៣០ ខែ កញ្ញា ឆ្នាំ២០១៧ ខាងមុខ ពោលគឺឲ្យបានមុនវិសោធនកម្មច្បាប់ស្តីពីគណបក្សនយោបាយចូលជាធរមាន បន្ទាប់ពីប្រមុខរដ្ឋស្តីទីលោក សាយ ឈុំ បានប្រកាសដាក់ឲ្យប្រើប្រាស់ជាផ្លូវការ កាលពីថ្ងៃទី ២៨ កក្កដា កន្លងទៅ។
លោក កឹម សុខា បានលើកឡើងនៅក្នុងសេចក្តីអំពាវនាវកាលពីថ្ងៃទី៣១កក្កដាថា ជោគជ័យរបស់គណបក្សសង្រ្គោះជាតិនៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០១៧កន្លងទៅ និងដំណើរឆ្ពោះទៅរកជ័យជំនះរបស់គណបក្សប្រឆាំងជាលើកដំបូងនៅឆ្នាំ២០១៨ខាងមុខ គឺជាកត្តាដែលជំរុញឲ្យគេធ្វើទុក្ខបុកម្នេញ និងបង្កឧបសគ្គមកលើគណបក្សប្រឆាំងឥតឈប់ឈរ។ ក៏ប៉ុន្តែគណបក្សប្រឆាំងនៅតែអះអាងថា ខ្លួននឹងរក្សាគោលដៅឲ្យនៅដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ