បក្សសង្រ្គោះជាតិហែក្បួនឃោសនាផ្តាច់ព្រ័ត្រ ក្រោមពពកបាំងថ្ងៃ
គណបក្សសង្រ្គោះជាតិ នៅថ្ងៃឃោសនាចុងក្រោយ បានដង្ហែក្បួនឃោសនាទ្រង់ទ្រាយធំរបស់ខ្លួន ចាកចេញពី វត្តចាស់ ក្នុងសង្កាត់ជ្រោយចង្វារ កាត់ស្ពានជ្រោយចង្វារ ឆ្លងចូលទីក្រុង។ មិនដូច តម្រាយផ្លូវគិតទុកជាមុន ដែលបានព្រមព្រៀងជាមួយ សាលាក្រុង ថា បក្សសង្រ្គោះជាតិ នឹង រំសាយក្បួនឃោសនានៅលើ ផ្លូវ៦០ម៉ែត្រ ឬមហាវិថីសម្តេចតេជោ តែ ក្បួនឃោសនារបស់បក្សប្រឆាំង បែរជា ប្រកាសរំសាយ នៅក្បែរ តុលាការក្រុងដំបូង កណ្តាលក្រុងភ្នំពេញទៅវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៣
បន្ទាប់ពីថ្លែងសារនយោបាយ នៅថ្ងៃឃោសនាផ្តាច់ព្រ័ត្រចប់ លោក កឹម សុខា ប្រធានបក្សសង្រ្គោះជាតិ បានចុះពីលើវេទិកា ដែលជា រថយន្តចល័ត ហើយ ដើរប្រហែល ៥០០ម៉ែត្រ ដើម្បីចាប់ដៃ អ្នកគាំទ្រ រាប់សិបនាក់ កំពុងឈររងចាំនាបរិវេណមុខ វត្តពោធិយ៉ារ៉ាម(ហៅវត្តចាស់) ក្នុងសង្កាត់ជ្រោយចង្វារ ជាទីធ្លាប់តម្កល់សពលោកបណ្ឌិត កែម ឡី ដែលត្រូវបានឃាតករបាញ់សម្លាប់កាលពីថ្ងៃទី១០ ខែកក្កដា ឆ្នាំមុន។
ក្រោមឥទ្ធិពលនៃ ពពកបាំងថ្ងៃរសៀល ផ្ទៃមេឃស្រទន់ ក្បួនឃោសនាទ្រង់ទ្រាយធំ ដឹកនាំដោយលោក កឹម សុខា បានឆ្លងកាត់ស្ពានជ្រោយចង្វារ មិត្តភាពកម្ពុជា ចិន ដែលនាំឲ្យ កកស្ទុះចរាចរ អស់ជាង មួយម៉ោង លើស្ពានជ្រោយចង្វារមិត្តភាពកម្ពុជា-ជប៉ុន ខណៈគ្មាន ប៉ូលីសចរាចរត្រួយត្រាយផ្លូវ ដូចក្បួនឃោសនារបស់ គណបក្សប្រជាជនកម្ពុជា កាលពីព្រឹកមិញ។
លោក កឹម សុខា បានដឹកនាំ ក្បួនឃោសនា ដែលមានអ្នកគាំទ្ររាប់ម៉ឺននាក់ លើផ្លូវស្របផ្តាច់មុខតែឯង ប្រវែងជាង ៥គីឡូដី ដោយ ក្បាលនៅ អង់តែនទូរទស្សន៍ទួលគោក ចំណែកកន្ទុយក្បួននៅ វត្តចាស់។ នៅពីមុន ក្បួនឃោសនារបស់បក្សប្រឆាំង មាន ម៉ូតូប៉ូលីសចរាចរមួយគ្រឿង ក្រៅពីនោះ ភាគច្រើនជា ម៉ូតូ រ៉ឺមក់កង់បី រួមជាមួយនឹង រថយន្តមួយចំនួនរបស់អ្នកគាំទ្រ។ នៅក្នុងក្បួនឃោសនា អ្នកគាំទ្រ មានពាក់អាវស រូបសញ្ញាព្រះអាទិត្យ ដៃកាន់ទង់ជាតិខ្មែរ ទង់សញ្ញាបក្ស រូបថតលោក កឹម សុខា តែម្នាក់ឯង ឬរូបថត លោក កឹម សុខា លើកដៃរួមគ្នាជាមួយលោក សម រង្ស៊ី។ នៅពេលគ្រឿងបំពងសម្លេង ដែលចាក់តន្រ្តីផង និងសារនយោបាយខ្លីៗ «ដូរ ឬមិនដូរ» ឈុ្នះ ឬមិនឈ្នះ ផង ម្តងម្កាលគេឮអ្នកគាំទ្រ ស្រែក ព្រមគ្នា ថា ដូរ ឬឈ្នះ !
ឈរជិត ៥ម៉ោង នៅលើរថយន្ត Ford Ranger មួយបាំងកន្លះ អត់ដំបូល ដោយមានអង្គរក្សទប់ចង្កេះពីក្រោយ លោក កឹម សុខា តែងឈៀងចាប់ដៃអ្នកគាំទ្រតាមផ្លូវផង ឈរលើកដៃគ្រវីផង សំពះផង ញញឹមផង រាល់ពេលឃើញពលរដ្ឋអមសងខាងផ្លូវសាទរជាមួយក្បួនឃោសនា។ ក្នុងពេលប្រធានបក្សប្រកាសរំសាយ នៅម៉ោង ៧យប់ នាបរិវេណផ្សារស៊ីធីម៉ល កណ្តាលក្រុងភ្នំពេញ លោក កឹម សុខា បានអំពាវនាវឲ្យពលរដ្ឋទៅបោះឆ្នោតគ្រប់គ្នា ព្រមទាំងឆ្លៀតប្រកាសពី ជ័យជំនះនៅថ្ងៃបោះឆ្នោតទី៤ មិថុនាខាងមុខ ដោយសំអាងលើ អ្នកឃោសនា និងអ្នកគាំទ្រតាមដងផ្លូវដ៏ច្រើនលើសលប់ ដែលមានន័យស្មើនឹង បក្សសង្រ្គោះជាតិ មានសម្លេងច្រើនលើសលប់។
ជាការកត់សំគាល់ ក្បួនយុទ្ធនាការឃោសនាបោះឆ្នោតរបស់បក្សសង្រ្គោះជាតិ នៅថ្ងៃចុងក្រោយនេះ មិនបានធ្វើតាម តម្រាយផ្លូវគ្រោងទុកទេ ពោលគឺ បន្ទាប់ពីឆ្លងកាត់ស្ពានជ្រោយចង្វារ ស្ពានអាកាស៧មករា មហាវិថីព្រះមុនីវង្ស និងផ្លូវសំខាន់ៗមួយចំនួន ក្បួនឃោសនា មិនបានប្រកាសរំសាយនៅលើ ផ្លូវ ៦០ម៉ែត្រ ឬមហាវិថីសម្តេចតេជោ ជាទីដែល បក្សប្រជាជនកម្ពុជា បានប្រកាសបើកក្បួនឃោសនាកាលពីព្រឹកនោះទេ តែបក្សសង្រ្គោះជាតិ ជ្រើសយកការប្រកាសរំសាយ ក្បួនឃោសនា នៅក្បែរ តុលាការដំបូងក្រុងភ្នំពេញ ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ